Mic ma Kiyubo pi Lutit Kwena
1. Yub manyen ango ma ocakke i mwaka 1938, dok pingo?
1 I mwaka 1938, dul pa Jehovah ocako yub mo manyen. Kilwongo kacokke mapol me bedo tye i yub me gure me jon, ma dong kombeddi kilwongo ni gure me adwol. Pingo kiyubo gure man? Informant (ma dong kilwongo ni Ticwa Me Ker) me Januari 1939 omiyo lagam ni: “Gure magi gitye but yub ma dul pa Jehovah miyo me konyo doro tic me Ker-ri. Pwony ma kimiyo iye pigi tego pi konyo ngat acel acel me timo maber tic ma kicimo piwa.” Ka waneno kit ma wel lutit kwena omedde kwede cakke ki 58,000 keken i mwaka 1938 nio wa i mwaka 2009 ma dong wel lutit kwena kato 7,000,000 kulu, nyutu atir ni gure me adwol tye ka cobo yub me konyo lutit kwena me “tiyo tic ma kicimo pigi”!
2. Pwony ango ma kibimiyo i gurewa me adwol me mwaka me ticwa manyen?
2 Wi Lok Madit pi Mwaka ma Bino-ni: Watye ka kuro yub me gure me adwol ma bicakke i Sektemba ki cuko cwiny ma wabinongo iye. Wi lokke madit ma tye ni ‘Wun Pe Jo me Lobo-ni’ kikwanyo ki i Jon 15:19. Pwony macalo mene ma lutit kwena binongo adwogi maber ki iye? I Ceng Abicel wabiwinyo pwony ma wi lokke tye ni “Tic pi Kare Malac Gwokowa Nining?” Wabinongo bene mit pa pwony ma kipoko iye i dul adek ma wiye tye ni “Pe Wudok Cilo pi Tim pa . . .” ‘Lee Mager-ri,’ ‘Dako ma Lakwele Marac-ci’ ki “Lucat-wil me Lobo.” I Ceng Cabit wabiwinyo pwony ma kipoko iye ma wi lokke tye ni “Wumar Jehovah, Ento pe Lobo-ni.” Pwony mukene tye ni “Wumedde Macalo ‘Lurok ki Dok Wele’” ki “Wubed ki Tekcwiny! Wuromo Loyo Lobo-ni.”
3. Adwogi maber ango ma wanongo ka wabedo tye pi gure me adwol?
3 I nge bedo tye i gure me adwol mo macok cok-ki, lamego acel ma onongo ticce me pwony okwe woko ocoyo waraga kun wacci yub man pud dong okonye me ngiyo kwone maber dok emoko tamme me “cito woko ka pwony ma ka bedo ka gengo ngeye!” Labongo akalakala mo, yub me gure me adwol pi mwaka me ticwa manyen bikonyo wan ducu me maro Jehovah me ka maro lobo-ni. (1 Jon 2:15-17) Mok tammi me bedo tye iye dok icik iti wek inong adwogi maber mada ki i mic man ma kimiyo ki mar pi lutit kwena!