Gwok Tammi
1. Wi lok madit pi gurewa me adwol pi mwaka 2013 tye ningo, dok kiyubo pi tyen lokke ango?
1 Yecu ociko lupwonnyene me maro Jehovah ki cwinygi ducu, kwogi ducu, ki tamgi ducu. (Mat. 22:37, 38) I mwaka man, yub me gure madit ki gure me adwol kiyubogi me jingo kitwa ma pe nen ki woko. Ka wi po, gure madit me mwaka-ni wi lokke madit tye ni “Gwok Cwinyi!” Yub me gure me nino acel pi mwaka me ticwa me 2013 wi lokke madit tye ni “Gwok Cwiny ma Ngoli Kop-pi.” Ki yub me gure me adwol ma bicakke i dwe manyen wi lokke tye ni “Gwok Tammi,” ma jenge i Matayo 22:37. Yub man kiketo i yo ma weko ngat acel acel i kinwa nongo kony me ngiyo ngo ma en tamo kun moko me keto alokaloka ma yomo cwiny Jehovah.
2. Mitte ni mono wayeny lagam me lapeny magi i kare ma nongo gitye ka miyo pwony?
2 Pwony ma Kibimiyone: Ka watye ka lubo pwony me gure me adwol, bedo ber ka wayenyo lagam me lapeny magi, ma gitye lok ma pigi tego:
• Watwero gwokke ki tamo tam “pa dano” nining?
• Watwero kwanyo bongo ma oumo tam pa jo ma pe giye nining?
• Kit tam ango ma wamito bedo kwede?
• Lwodo lok mupore kelo adwogi maber ango?
• Waromo ye ni Jehovah odor tamwa nining?
• I yo ma nining ma co, mon, lunyodo ki lutino gitwero kelo kwede yomcwiny i ot?
• Waromo bedo ma wayubbe pi nino pa Jehovah nining?
• Bedo ma wayubbe i tamwa mono tyen lokke ngo?
• Adwogi maber ango ma bino bot jo ma giketo jami ma gipwonyo i tic?
3. Pingo pire tek ni myero wabed tye pi nino aryo-ni ducu, water itwa, dok waket i tic jami ma wapwonyo?
3 Catan tye ka lweny matek me balo tamwa woko. (2 Kor. 11:3) Pi man myero wagwok tamwa ki kitwa. Myero wamedde ki bedo ki tam pa Kricito kun walwenyo ki tam maraco me lobo man. (1 Kor. 2:16) Dong cak yubbe con me bedo tye i gure me nino acel. Ket tammi i pwony ma kibimiyo. Keto ngec ma pire tek man i tic bikonyowa me bedo ma wayubbe i tamwa pi tiyo tic me Ker-ri ki mitkom.—1 Pet. 1:13.