Ngec Bot Omege ma Gidoro Yub me Cokke me Ticwa
Cakke ki Ticwa Me Ker me dwe man, kibiloko ngec mogo ma kitiyo kwede i yub me Cokke me Ticwa wek obed ma yot. Ngec manyen magi bimedo dok bitito ka maleng ngo ma myero kitim ma lubbe ki pwony ma wiye tye ni “Kit me Yubbe pi Cokke me Ticwa,” ma tye i Ticwa Me Ker me Mai 2009.
◼ Pwony: Man kwako miyo pwony ma jenge i kom buk nyo magajin labongo leyo tam ki lwak. Lalok omyero olok tutwalle i kom gin ma twero bedo me kony bot kacokke.
◼ Lapeny ki Lagam: Pwony man kibitimone calo pwony me Kwano Watchtower, kicako ki lok macek dok kidolo tere ki lok macek, kun kipenyo lapeny i kom paragraf ducu. Omego ma doro pwony man myero pe odur lok mapol tutwal. Kiromo kwano ginacoya ma pigi tego ka cawa pud tye. Pe myero kikwan paragraf nikwanyo ka kimiyo ngec ni kikwan.
◼ Pwony ki Lapeny: Man obedo pwony ma orubbe ki leyo tam ki lwak. Pe obedo pwony keken dok bene pe kwako lapeny ki lagam keken.
◼ Nyutu Lapor ki Penyo Dano: Ka kimiyo ngec ni nyut lapor te lokke ni omego ma kicimo pi miyo pwony man tye ki tic me neno ni kinyuto lapor; ento pe en aye myero onyut lapor man. Jo ma en oyerogi-ni myero gubed jo ma gitye ki ngec muromo dok gitye lanen maber, dok en myero omi botgi ngec man con ka twere. Bedo ber ka pe kitiyo ki lutit kwena manyen ma ngecgi pud nok me nyutu kit me timo ticwa me pwony pien ni kimito miyogi kare me cung i wi abam, ento i kare mogo kiromo tic kwedgi me bedo calo rwod ot. Lutit kwena ma gitye ka miyo lapor myero gulokke tung bot lwak. Jo ma kibipenyogi i bute me penyo dano myero gumi lagamgi ki i wi abam ento pe ki ka ma gubedo iye. Myero kinwo poro lapor ki penyo dano teretere con. Ka cawa odong manok ci omego ma bimiyo bute man romo ngolo pwonye me bedo macek, ento en myero pe ongol nyutu lapor ki penyo dano woko. Lukony kor tic myero kong gulok ki lakub kin luelda nyo laelda mukene ma peya guyero jo ma gibitic kwedgi i nyutu lapor nyo me apenya.
Ka bute mo tye ki ngec me aluba ma kite dok pat, ci omyero kilub ngec meno kore ki kore. Ka omege ma gidoro Cokke me Ticwa gilubu ngec ma kimiyo malo kany-nyi ci gibiweko Cokke me Ticwa ‘timme i yo maber, dok kore ki kore.’—1 Kor. 14:40.