‘Wek Nying Lubanga Obed me Awora’
1. Wi lok me gure me adwol me mwaka me ticwa me 2012 obedo ngo, dok kikwanyo ki kwene?
1 Pud dong watye ki mot madit ya, ni kilwongowa ki nying Jehovah, Lalo Polo ki Lobo! Lubanga kikome aye omiyo botwa nyinge, tutwalle cakke i mwaka 1931, kingeyowa ki nying ma kite dok pat ni, Lucaden pa Jehovah. (Ic. 43:10) Yecu oilo nying Wonne i rwom ma lamal, dok oketo obedo gin mukwongo i legane me lapor. (Mat. 6:9) Wi lok madit pi yubwa me gure me adwol me mwaka me ticwa me 2012 kikwanyo ki i kwac man. Wi lokke tye ni “Wek Nying Lubanga Obed me Awora.”
2. Pwony ango ma myero wayubbe me winyone?
2 Pwony ma Wabiwinyo: I Ceng Abicel pwony ma wi lokke tye ni “Wek Nying Lubanga Ongene ki Tic pi Kare Malac” kibinyamo iye gin mumiyo tic pi kare malac kelo mot i kwo. Wabiwinyo bene pwony ma kipoko iye ma wi lokke tye ni “Gwokke ki Kelo Lewic i Nying Jehovah,” pwony man bikonyowa me gwokke ki moko i owic mapatpat angwen. Lapeny mogo ma tye ni Ngo ma bikonyowa me tito kwena ki mit kom kadi bed dano pe gimito winyowa? dok Ngo ma biweko wacobo tic me pwonywa maber? kibimiyo lagamgi i pwony ma wi lokke tye ni “Gin Mumiyo Omyero Kilony Nying Lubanga.” I Ceng Cabit wabiwinyo pwony mamit ma kipoko iye i kit ma watwero lonyo kwede nying Lubanga ki tamwa, lokwa, tam ma wamoko ki kitwa. Jo ma gubino manyen gibibedo ki pwoc pi winyo pwony ma kiyubo pi lwak ma wi lokke tye ni, “Jehovah Bilonyo Nyinge i Lweny me Armagedon.”
3. Mot ango ma watye kwede, dok yub me gure man bikonyowa nining?
3 Cokcok-ki Jehovah bicako tic me lonyo nyinge. (Ejek. 36:23) Ma peya en otimo meno, watye ki mot madit me cung pi nying Jehovah maleng. Watye ki gen ni yub me gure me adwol man bikonyo wan ducu me cobo ki mit kom ticwa me bedo jo ma kilwongogi ki nying Lubanga.