‘Wek Kiti Gin ma Lubanga Mito’
1. Wi lok me gure me nino acel me mwaka me ticwa me 2012 tye ningo, dok pingo oporre piwa me nyamone?
1 Kicweyowa pi miti pa Jehovah. (Yabo. 4:11) Pi meno, pe watwero cobo tyen lok me kwowa labongo pwonyo ki timmo miti pa Lubanga. Man pe obedo gin mayot kit ma nen kwede ni, pien myero walweny ki cwiny ma kinywalowa kwede me cobo “miti me komwa ki gin ma watamo piwa kenwa” nyo me “tiyo gin ma jo ma pe ngeyo Lubanga gimaro timo.” (Ep. 2:3; 1 Pet. 4:3; 2 Pet. 2:10) Labongo kony pa Lubanga, waromo poto “i owic pa Catan” ci miyo watiyo gin ma en mito. (2 Tem. 2:26) Yubwa me gure me nino acel me mwaka me ticwa me 2012 bikonyo wan ducu ki acel acel me tic i yo ma rwatte ki kwac ma pire tek me adekke me lega me lapor-ri. (Mat. 6:9, 10) Wi lokke tye ni, “Wek Kiti Gin ma Lubanga Mito.”
2. Kibimiyo lagam me lapeny mene i gure man?
2 Lapeny ma Kibigamogi: Ka iwoto ki lubo yub ma kiketo, ter iti me winyo lagam ma kibimiyone pi lapeny magi: Gin ma pire tek ango ma myero watim mapat ki winyo Lok pa Lubanga? Watwero medde ki niang gin ma Lubanga mito piwa nining? Pingo myero waye me miyo kony bot dano mapat pat? Waromo nongo kwo me lonyo ki yengo nining? Jo matino, myero wunyut gin ango bot Jehovah? Adwogi mabeco ango ma bino pi timo miti pa Lubanga? Pingo obedo gin ma mitte pi oyot ni wadong dok wacuk cwiny jo mukene?
3. Waromo nongo adwogi maber loyo ki i pwony me gure me nino acel man nining?
3 Temme ki tekoni ducu me bedo tye dok iter iti ka winyo pwony ma kibimiyo. Ngat mo ma tiyo i Betel nyo laneno ma woto awota bibedo tye macalo lalok ma obino ka lim. Ma peya yub ocakke, nyo i nge tyekone, bed agonya me lok kwede ki dakone, kace en tye munyomme. I nge dok cen paco, pe idok ngat ma “wiye wil woko,” ento wunen kacel wiye wiye me pwony ma wunongo calo jo me ot, dok wunyam kit ma wutwero medo ticwu i yo ma rwatte ki miti pa Lubanga.—Yak. 1:25.
4. Pingo pire tek ni waket pi tiyo miti pa Lubanga obed mukwongo i kwowa?
4 Cokcok-ki jo ma gitye ka tutte me cobo mitigi dok ma gikwero timmo miti pa Jehovah kibijwerogi woko. (1 Jon 2:17) Watye ki pwoc mada ni Jehovah omiyo ngec man i kare mupore me konyowa ki keto pi tiyo mitine bedo gin mukwongo i kwowa!