Bok Me Lapeny

◼ Anga ma myero opong fom ma kiketo i nge bukkewa nyo i Kabedo me Intanetwa?

Bukkewa pol kare tye ki ka ma ngat moni romo pongone ci cwalo bot jang gang kal ka ce mito penyo pi bukke nyo mito ni Lacaden pa Jehovah mo olime. Medo i kom meno, watye ki fom ma kiketo i Kabedo me Intanetwa me www.watchtower.org ma ngat ma mito kwano Baibul twero pongone. Yub man tye ka konyo dano mapol me pwonyo lok ada. Ento doki, ka lutit kwena gutiyo ki yub man me konyo wadigi nyo jo mukene i yo me cwiny, adwogine bedo marac.

Jo mukene ma kicwalo botgi bukkewa ki i jang gang kal ma pe gupenyo pire, gukok ni kitye ka diyogi tektek. Dok guwacci gitamo ni kiketo nyinggi i kin dano ma dulwa myero ocwal botgi bukke ducu ma gigoyo. Lutit kwena ma gunongo ngec ni ngat moni mito lim, gidok cen ki lewic pi bwura pa ngat meno ma onongo pe tye ki miti i lokwa. Pi meno, ngat ma tye ki miti aye myero opong dok ocwal fom meno i Kabedo me Intanetwa nyo i bukkewa, ento lutit kwena pe omyero gupong pi luwotgi nyo wadigi. Ka jang gang kal oniang ni latit kwena aye opongo fom pi ngat moni, ci pe gitiyo iye.

Dong waromo keto yub ango wek wadiwa nyo jo ma wangeyogi gunong kony i yo me cwiny? Ka imito ni ngat moni onong bukke moni, pingo pe in aye icwal bote macalo mic? Ka ngat meno onyutu miti dok mito ni Lucaden pa Jehovah gulime, ento in pe ingeyo luelda me kabedone, ci cwal fom me Please Follow Up (S-43) bot karan me kacokkewu, ma en bingiyo maber ka dong cwalo bot jang gang kal. Ento ka ngat ma tye ki miti-ni kitweyo i mabuc nyo kigengo i ot yat, omyero pe in aye itit ki jang gang kal pi mitine. Me kaka meno, omyero icuk cwinye me lok ki omego ma gilimo kabedo meno nyo me coyo waraga bot jang gang kal.