Kony Dano Wek Guwiny Lok pa Lubanga
1. Brocuwa mene ma kinyuto i gure madit me Distrik me “Wek Ker pa Lubanga Obin!” dok ngo ma oweko brocuwa man odoko gin ma pire tek me ticwa?
1 I Gure Madit me Distrik me “Wek Ker pa Lubanga Obin!” Kinyuto brocuwa aryo, Winy Lok pa Lubanga wek Ibed Kwo Nakanaka ki dok ma wiye tye ni, Winy Lok pa Lubanga ma kicoyo kun kitiyo ki coc manok adada. Kit ma gin aryo ducu pe gitye ki coc mapol-li, kiromo gonyogi i leb mukene oyot. Pi meno, dong kityeko ye ni omyero kigony brocuwa me Winy Lok pa Lubanga wek Ibed Kwo Nakanaka i leb 431 cakke ma kinyut kwede.
2. Ngagi ma gubinongo adwogi maber ki i brocuwa man?
2 Ngagi ma gubinongo adwogi maber ki i brocuwa man? Jo ma kit magi ginonge i but lobo ducu:
• Latit kwena ma tye ka nyamo lok ki rwod ot tyen mukwongo, nyo ma odok ka lim, niang ni rwod ot moni-ni pe ngeyo kwan maber.
• Lutit kwena gitito kwena bot jo ma giloko leb ma pe wagonyo bukke mo iye. Nyo jo mapol me wang ticwa pe gitwero kwano leb ma gin giloko maber.
• Lutit kwena gitiyo ki leb pa luding it bot luding it pi tito kwena i wang ticwa.
• Lunyodo ma gitye ki miti me pwonyo lok me ada bot lutino ma pe gingeyo kwan maber.
3. Kiyubo brocuwa me Winy Lubanga nining?
3 Kit ma Kiyubogi Kwede: Winy Lubanga tye ki coc manok, coc macek cek ki ginacoya acel i tere piny i pot karatac acel acel. Pingo? Go kong ka ngat mo omiyo boti brocuwa ma kicoyo i leb ma pe itwero kwanone, nyo ka nukuta me cocce kidwalo mapat ma pe ingeyo. Tika obiyomo cwinyi, kadi bed tye ki cal mabeco? Pe obiyomo. I yo acel-lu, jo ma pe gingeyo kwano buk, gibedo ki lworo ka guneno bukke ma tye ki coc. Pi meno, cal mabeco tye ma opong i pot karatac ducu, ki lacim me konyi me niang cal mene ma myero wunyam i nge tyeko nyamo cal moni.
4. Winy Lok pa Lubanga wek Ibed Kwo Nakanaka kiyubo nining?
4 Winy Lok pa Lubanga wek Ibed Kwo Nakanaka tye ki cal ma rom aroma ki me Winy Lubanga. Kiyubo me konyo jo ma gitye ki ngec me kwan manok nyo ma gitye ka pwonyo kwan. Brocuwa man bene kiromo tic kwede macalo brocuwa pa lapwony ka wutye ka kwano brocuwa me Winy Lubanga ki ngat mo. I pot karatac aryo aryo kimalo tung acam ibinongo lapeny ma tye pi pwony moni ma kinyamo i igi. Gitye bene ki cal ma tye ki coc ki dok ginacoya ma kiryeyogi. Tung piny me pot karatac mapol, ibinongo bok ma tye ki lok mukene ki Ginacoya ma kimedo ma kitwero nyamogi ma lubbe ki kero me ngec pa latin kwan moni.
5. Awene dok i yo ma nining ma waromo tero kwede brocuwa magi?
5 Kit me Nyuto Brocuwa Magi: Iromo miyo brocuwa mo keken i kingi ka itye i tic me pwony i ot ki ot ka itamo ni opore, Kadi wa i dwe ma nongo pe myero kiter brocuwa. (Nen bok “Kit me Nyuto Brocuwa Magi.”) Itwero nyutone ka idok cen ka lim ki wacone ni itye ki gin mo ma imito nyutone, ci mi acel bot ngat meno.
6. Waromo kwano Baibul ki dano kun watiyo ki brocuwa man nining?
6 Kit macalo Winy Lubanga pe tye ki lapeny-nyi nyamo lok ma iye pe twero bedo lapeny ki lagam kit ma kitimo i buk me Baibul Pwonyo. I tekwaro ducu, dano maro winyo ododo. Dong ti ki cal ma kiketogi me tito ododo ma tye i Baibul. Tit lok ma tye i kom cal magi. Lok ki yamo komi. Mi kare ki latin kwan me lok iye. Wukwan ginacoya ma kireyogi ki piny i pot karatac meno. Wunyam kacel gin ma ginacoya meno loko. Peny lapeny ma miyo en loko dok imi en oniang. Ka latin kwan tye ki brocuwa me Winy Lok pa Lubanga wek Ibed Kwo Nakanaka, wukwan coc ki ginacoya ma tye, ka wutye ka nyamo lok i kom cal moni.
7. Watwero konyo lutino kwanwa me dongo nining?
7 Kony Latin Kwan me Dongo: wageno ni nyamo lokwu bikonyo latin kwan me dongo miti me pwonyo kwan ma weko en bedo ki kero me kwano ngec i kom Jehovah pire kene. (Mat. 5:3; Jon 17:3) Dong, ka nyamo lokwu a ki i brocuwa me Winy Lubanga, ci i kare mo iromo mine me pwonyo latin kwan meno wek onge kwan, man miyo itwero lokke ka kwano Winy Lok pa Lubanga wek Ibed Kwo Nakanaka. Kadi iti ki brocuwa mene i kingi, pe twero weko latin kwan teggi me nongo batija i nge tyeko kwanone. Myero ikob en i buk me Baibul pwonyo nyo buk mukene ma bimiyo latin kwan niang pwony me Baibul matut.
8. Pingo itye ki pwoc pi gin tic manyen magi me pwony?
8 Dano myero guwiny Ngat Mamalo Twal ma loyo polo ki lobo ka gimito kwo pi naka. (Ic. 55:3) Miti pa Jehovah tye ni “jo ducu” ma i kine tye iye jo ma pe gingeyo kwan, gupwony kit me bedo luwiny bote.(1 Tem. 2:3, 4) pud dong watye ki pwoc madit pi gin tic manyen man ma waromo tic kwede me pwonyo dano wek gubed luwiny bot Lubanga!
[Bok i pot karatac 3]
Kit me Nyuto Brucuwa Magi
Nyut bot rwod ot pot karatac 2-3 ci iwacci: “Tika imito bedo i lobo ma macalo man?” [Mine kare wek ogam] Cikke me ginacoya [nyo buk maleng] waco ni Lubanga dong cok biweko lobo doko kabedo mamwonya ma opong ki kuc ma ngat mo pe bibedo lacan nyo latwo iye. Nen kong ngo ma myero watim wek wabed kunu. [Kwan Icaya 55:3, ma tye i pot karatac 3 ki malo] ma waco botwa ni ‘bin bot Lubanga winy en. Ento watwero timo man nining?” Yab pot karatac 4-5 ci wunyam lagamme kacel. Ka en pe ki cawa, wek brocuwa man bote ci wuyub awene ma iromo dwogo iye ka gamo lapeny meno.