Lucaden pa Jehovah—Ticgi me Niye, Bute me 1: Gua ki i Col Piny
I Baibul, dero cung pi lok me ada, ento ki tungcel colpiny cung pi goba. (Jab. 43:3; Ic. 5:20) Catan okelo tic me col piny i lobo i kare ma en obwolo Kawa, mot mot en onyayo tic maraco me col piny i kabedo ducu. (Yabo. 12:9) Vidio ma wiye tye ni Jehovah’s Witnesses—Faith in Action, Part 1: Out of Darkness tito kit ma dero me lok pa Lubanga ocako nen kwede ki i col piny. (Ic. 60:1, 2) I nge neno vidio man, tika itwero gamo lapeny magi?
(1) Col piny marac ocakke nining i nge to pa lukwena? (2) Nicakke i mwaka 1100 ki wiye, alokaloka ango ma obedo tye ma okonyo dano me niang ni dini pa Lukricitayo ata-ni pe gitye ka lubo yo matir? (3) Henry Grew ki George Storrs gubedo angagi? (4) Jami ango ma otimme i kwo pa Charles Russell ma ogudo kwone adada? (5) Omego Russell, ki wonne, ki jo manok mukene gudoro yubgi me kwano Baibul nining, dok ngo ma gin guniang ki i kwangi me Ginacoya? (6) Gurup pa Omego Russell gucako ribbe kacel ki gurup pa Nelson Barbour nining, dok ngo mumiyo Omego Russell opokke woko ki i gurup meno? (7) Ngo ma otimme i Julai me mwaka 1879 ma oweko dero me lok pa Lubanga ocako nen? (8) Lacen, ngo ma Lutino Kwan me Baibul gutimo wek gutit kwena maber-ri i kabedo mapol? (9) Mwaki mapol anyim, Lutino kwan me Baibul gutamo ni ngo ma obitimme i mwaka 1914? (10) Peko ango ma Lutino Kwan me Baibul guwok ki iye i nge to pa Omego Russell? (11) Gin ango ma Lutino Kwan me Baibul gutimo i kare ma kigonyo Omego Rutherford ki omege mukene ki i buc? (12) Neno vidio man ojingo niyeni nining i kom dul pa Jehovah? (13) Vidio man ojingo cwinyi nining me medde ki tito kwena maber-ri kadi bed ariya tye? (14) Watwero tic ki vidio man nining me konyo wadiwa, lutino kwanwa me Baibul, ki jo mukene?
Lutino Kwan me Baibul me kare macon pud dong guweko piwa jami aleya me cwiny ya! I lobo ma tye i col piny i yo me cwiny-nyi, gin gutiyo ki tekcwiny dok ki mit kom kun gubedo calo tara ma menyo piny. Bedo ber ka walubo lanengi kun wamedde ki wot calo “jo me ceng.”—Ep. 5:8.