Lucaden pa Jehovah​—Gitye Atera me Nywako Lok me Kwena Maber-ri

Pi mwaki makato 100 kulu, Lucaden pa Jehovah dong gitye atera me nywako lok me kwena maber-ri. Man oweko tic me tito kwena-ni pire oywek orumo lobo ducu, dong kitye ka lokone i leb mia ki mia mapat pat i lobe makato 230. (Mat. 24:14) Pingo tic man pire tek? Kitye ka cobo tic man i lobe ducu nining? Vidio ma wi lokke tye ni, Jehovah’s Witnesses—Organized to Share the Good News miyo lagam i kom lapeny magi dok bimiyo wangiyo ki diro kit ma kitye ka timo kwede tic man i wi lobo kulu. I nge neno vidio man, tam kong kit ma ibidok kwede i lapeny magi.

I yo ma nining ma vidio man odongo kwede pwocwa pi (1) tute pa dul pa Jehovah i tito kwena maber-ri? (2 Tem. 4:2) (2) Betel mapat pat i but lobo ducu? (3) pwonnye ma kimiyo bot luneno ki lumiconari? (2 Tem. 2:2) (4) ber pa cako nino acel acel ki kwano tyeng mo me Baibul kacel ki yubbe pi cokke ducu me cabit acel acel? (Tic 17:11) (5) ber pa bedo tye i cokke pa Lukricitayo? (Ibru 10:24, 25) (6) mot ma wabinongo ka lobo odoko Paradic odoco? (Ic. 11:9) (7) mot ma itye kwede me nywako i tic me kac-ci?—Jon 4:35.

Vidio man obedo gin tic ma pire tek me pwonyo jo ma gitye ki miti kit ma Lucaden pa Jehovah gitiyo kwede tic ma kwako lobo ducu-ni. (8) Kare mene ma opore me nyutu vidio man bot lutino kwanwa me Baibul, wadi, ki jo mukene? (9) Adwogi maber ango ma neno vidio man okelo botgi?

Ka watye ka lwodo pi tic ma Jehovah tye ka cobo, miyo wan ducu waribo dwanwa ki laco Jabuli ma owaco ni, “Ai Rwot [Jehovah] Lubangana, itiyo tic madito me aura mapol, dok iyubo lwak tam mapol pi konyowa; pe tye ngat mo macalo in!” (Jab. 40:5) Dong watiyu maber ki vidio man i yo ma twero konyo jo mukene me dongo pwocgi pi Jehovah ki dulle!