“Wubed ki Kuc ki Dano Ducu”
1. Waromo tic ki pwony me Baibul mene ka wakemme ki rwod ot ma okeco?
1 Jo pa Jehovah gimaro kuc, dok ticwa me pwony-nyi obedo tic me kuc. (Ic. 52:7) Ento, i kine mukene wakemme ki dano ma gukeco ni pien wadwongo doggolagi. Ngo ma bikonyowa me gwoko kuc i kare ma kit meno?—Rom. 12:18.
2. Pingo pire tek ni wabed ki niang matut?
2 Bed ki Niang Matut: Kadi bed jo mogo ger i komwa pien gidag lok me ada, jo mukene giger pi tyen lok mapat ma pe kwako kwenawa. Romo bedo ni wawoto botgi i cawa marac. Gwok nyo rwod ot okeco pi gin mo ma tye ka timme i kwone. Kadi bed ni lok me kwena maber-ri aye omiyo kiniga omake, wiwa myero opo ni oromo bedo ni en terowa kit meno pi lok goba ma owinyo i komwa. (2 Kor. 4:4) Bedo ki niang matut bikonyowa me lok kwede maber dok pe wabitamo ni kiniga omake i kom wan aye.—Car. 19:11.
3. Watwero nyuto woro pi rwod ot nining?
3 Nyut Woro: Jo mapol i wang ticwa gitye ki niye ma omoko matek calo cel gogo i kom pwony mogo. (2 Kor. 10:4) Gitye ki twero me yero ka gibiwinyo lokki nyo pe. Pe wamito cayo niye pa rwod ot nyo miyo en winyo ni ngecce nok pien wan wangeyo lok me Baibul makato en. Ka owacciwa ni waa woko, omyero walub mitine ki woro.
4. Loko lok mamit te lokke ngo?
4 Lok Lok Mamit: Kadi bed ni i kine mukene kiyetowa, omyero wadok i lokgi ki lok mamit kun waloko ki mwolo. (Kol. 4:6; 1 Pet. 2:23) Me kaka cako pyem ki rwod ot, tem nongo lok mo ma wun ducu wuye iye. Gwok nyo waromo penyo rwod ot gin mumiyo en dag nywako lok kwedwa. Wek pe wamedde ki wango iye, bedo ber loyo ka wagiko lokwa kakenyu.—Car. 9:7; 17:14.
5. Adwogi maber ango ma bino pi bedo ki kuc i tic me pwony?
5 Ka wabedo jo ma gigwoko kuc, rwod ot wiye bipo i kom kit maber ma wanyuto, ci biye winyo lok i nino mukene ka latit kwena mo otemo miyo caden bote. (Rom. 12:20, 21) Kadi bed en nen calo ngat ma omoko liking i adegadegane, i nino mo en twero lokke doko omegowa. (Gal. 1:13, 14) Kadi en onyuto miti i kom ada nyo pe, wabiworo Jehovah dok wabiketo deyo i kom ticwa me pwony, ka wamedde ki diyo cwinywa dok wabedo jo ma gigwoko kuc.—2 Kor. 6:3.