Dongo Dirowa i Tic me Pwony—Kit me Dok i Lok pa Rwod Ot ma Okeco

Gin Mumiyo Pire Tek: Pol pa dano ma warwatte kwedgi i tic me pwony gimwol. Ento Yecu otito con ni dano bidagowa. (Jon 17:14) Pi meno, pe omyero wabed ki ur ka warwatte ki rwod ot ma okeco. Ka otimme kit meno, ci wamito dok iye i yo ma yomo cwiny Jehovah, ngat ma oorowa. (Rom. 12:17-21; 1 Pet. 3:15) Timo meno biweko wacobo lok meno i yo maber. Bimiyo bene caden bot rwod ot ki jo mukene ma gitye kenyo, kun weko gijolo lok pa Lucaden pa Jehovah ka walimogi i nino mukene.—2 Kor. 6:3.

Kit me Timone:

Medde ki nyuto cwiny me lirem dok ibed ma komi opye mot. Man bikonyo me kweyo cwiny rwod ot. Pe itam ni iye owang i kom in. (Latit. 7:9) Romo bedo ni okeco pi peko ma en tye kwede nyo pien iwoto i pacone i cawa marac. Kadi bed cwinye tye ka wang pi kwenawa, pol kare nongo obedo pi lok goba ma kiwacce i komwa.—2 Kor. 4:4.
Gam lokke ki mwolo kacel ki kica. (Car. 15:1) Tika icoye ki i wang nino nyo ingolo ticce mo? Kadi bed pe wakwayo kica pi ticwa, ento itwero kwayo kica pi cito pacone i cawa marac. Mono okeco pi lok goba mo ma owinyo i komwa? Ka kumeno, ci itwero wacci: “Atwero niang gin mumiyo ikeco. Ento, nen calo lok ma iwinyo i komwa-ni pe lok ada. Tika atwero lok iye?” Mono en kwero pwonywa mogo, calo ryemo lutim bal woko ki i kacokke nyo lok i kom medo remo? Itwero wacci: “Aniang. Jo mukene bene gitye ki par acel-lu. Atwero nyutti ki i Baibul gin mumiyo waye pwony meno?”
Ka ngat meno iye tye ka wang tutwal, ci bedo ber ka ia woko labongo gamo lokke. Ka owacci Lucaden pa Jehovah pe myero gudwog cen ka lime, itwero cuko cwinye ni wabiworo mitine.

Tem Tic ki Diro Man i Dwe-ni:

Wuti ki diro man kun wuporo gin ma timme i tic me pwony i kare me worowu pi jo me ot.
I nge a ki gang pa rwod ot ma okeco, wunyam kacel ki latit kwena lawoti yo maber loyo me dok i lok ma kit meno.