Kibipoko Kwena me Ker Nam. 38 i Decemba!
1. Lapeny ango ma dano gipenye kwede i kom jo muto, dok lapeny magi kibigamo nining i dwe me Decemba?
1 To aye pud dong lakwor pa dano ducu, dok pe paro dini ma gitye iye. (1 Kor. 15:26) Jo mapol giuro ka dok gibineno danogi ma oto dok pe gingeyo ka ma jo muto gitye iye. Pi man, kacokke mapat pat i lobo ducu binywako i rwec me poko Kwena me Ker Nam. 38 pi dwe acel kulu, wi lokke tye ni, Jo Muto Mono Gitwero Kwo Doki? Rwec man ma kite dok pat-ti bicakke i Decemba 1. Ka dong kare me poko Kwena me Ker Nam. 38 otum, ci wabimedde ki tic kwede calo trak mukene-ni.
2. I yo ma nining ma kiyubo kwede Kwena me Ker Nam. 38?
2 Kit ma Kiyubo Kwede: Kwena me Ker Nam. 38 kiyubo ma itwero banone maber wek nyime onyut wi lokke ma tugo miti kacel ki lapeny ni “Iromo wacci . . . eyo? pe? gwok nyo?” Ka lakwanone oyabo Kwena me Ker man, en bineno lagam me Baibul i kom lapeny me wi lokke, ki ber pa lok man pire. En bene bineno tyen lok ma weko watwero geno gin ma Baibul waco. Nge Kwena me Ker man tye ki lapeny ma tugo mitine me tam matut, ki me medde ki nongo ngec.
3. Trak me Kwena me Ker Nam. 38 kibipokone nining?
3 Kit ma Kibipokone Kwede: Rwec man bibedo kit ma wapoko kwede karatac me lwongo pi Nipo ki gure me distrik. Luelda gibinyuto wang tic ka ma wabitic iye ma lubbe ki waraga ma gunongo i April 1, 2013. Kacokke ma tye ki wang tic matidi gitwero miyo kony bot kacokke ma tye ki wang tic malac. Ka itye ka gamo Kwena me Ker Nam. 38, myero ikwany ma iromo pokone pi cabit acel keken. I kare me rwec man kiromo poko trak man ka ma guro wi lwak mapol i nge tyeko tiyo odi ducu me wang ticwa. Ka kityeko poko trak man ma dwe peya otum, ci waromo medde ki poko bukke ma wabitero i dwe meno. I Ceng Abicel mukwongo me dwe meno, wabinywako i rwec man ma ka cako kwano Baibul ki dano. I tum pa cabit ducu, ka opore watwero bene miyo magajin. Tika dong icako yubbe pi nywako i rwec man ma pire tek-ki?