Dongo Dirowa i Tic me Pwony—Cibo Guti me Dok Cen

Gin Mumiyo Pire Tek: Ka wanongo ngat mo ma onyuto miti, wamito ni wadwog cen i kare ma nongo en tye gang wek waony pii i kodi me lok ada ma wapito. (1 Kor. 3:6) Man pol kare mito ni ma peya waa, omyero wacib guti me dok cen ki penyo awene ma watwero dwogo kwede cen. Medo i kom meno, bedo ber me weko lapeny ma wabigamone ka wadwogo. Man weko rwod ot bedo ma kuro dwogowa, dok ka lapeny meno kigamo i buk ma waweko bote, ci en bibedo ki miti me kwanone. Cibo guti me nyamo lok bene miyo dok cen bedo yot pien nongo lok me anyama dong kiyero con, dok rwod ot ngeyo ngo ma obitimme. Ka warwatte kwede doki, watwero titte ni wadwogo ka gamo lapeny ma wapenyo i lim mukwongo ci wamedde.

Kit me Timone:

Ka itye ka yubbe me cito i pwony i ot ki ot, yub bene lapeny mukene ma ibigamo ka idok cen i nino mukene. Romo bedo lok ma kinyamo i buk ma watye ka tero i nino meno, nyo romo bedo lapeny ma kigamo i bukkewa ma kiyubo pi kwan, ma ibikelo ka idwogo.
Ka itye ka dolo nyamo lokwu ki ngat ma onyuto miti, wek en onge ni itye ki miti me lok bote doki, ka dong ipeny lapeny ma iyubo con. I wang tic mogo dano gitye ki tic madwong ma miyo cwinygi bedo nok me moko nino ma myero idwog iye ka limogi. Ka tye kumeno, ci iromo wacci: “Cawa ma kuman aye obedo kare maber me nongi gang? [Mi kare wek ogam.] Cabit ma bino, amito ni abigam lapeny man pi cawa manok . . . Ka abino anongo ni ticci pol, ci itwero wacca.”
Ka iwaco bot rwod ot ni ibidwogo i cawa moni, lub lokki. (Mat. 5:37) I cawa me giko limmi, cib guti me dwogo cen i nino mukene.

Tem Timo Kit Man i Dwe-ni:

Ka itye ka yubo pwonyi, yub bene lapeny ma ibidwogo ka gamone i nino mukene. Nywak lok man ki lutit kwena mukene ma itye ka tic kwedgi.