Ti ki jw.org i Ticci me Pwony

Kabedowa me Intanet obedo gin tic ma konyowa mada i tito pi kwena maber-ri “wa i agikki lobo ducu.” (Tic 1:8) Pol pa dano pe ginongo kabedowa me jw.org kikomgi. Ma ka meno, gin giniang lok i kom kabedowa me Intanet ka latit kwena mo onyuto botgi.

Laneno ma woto awota mo okwanyo vidio ma wi lokke tye ni Why Study the Bible? ki i kabedowa me Intanet ci oketo i cim-me dok bedo ka nyutone ka kare ononge. Me labolle, ka en tye ka tic i ot ki kot, en kong cako lok ki wacci: “I limwa watye ka konyo dano me nongo lagam i kom lapeny adek ma pigi tego magi: Pingo lobo opong ki pekki mapol? Lubanga bicobo pekki magi nining? Dok watwero lweny ki pekki magi nining? Vidio macek man gamo lapeny magi.” En cako vidio man cut me neno miti pa rwod ot. Vidio man neno mit ma ka ngat mo ocako neno oromo bedo tek mada me woto wiye nio ka otyeko. Ci laneno man wacci: “Iwinyo kiwacci iromo penyo pi kwano Baibul kun itiyo ki kabedowa me Intanet. Kit macalo an dong atye kany kombeddi-ni, atwero nyuto boti kit ma wakwano kwede Baibul ki dano.” Ka rwod ot nyuto miti, en cako kwan kwede kun tiyo ki brocuwa me Kwena Maber. Ka rwod ot pe tye ki kare, en yubo nino mukene ma bidok iye ka lim. Ka en ocito ka ma kimato iye cai, i nge cako lok ki dano ma obedo cok kwede, en medde calo tye ka pwony i ot ki ot. In tika itye ka tic ki jw.org i ticci me pwony?