Kit me Tic ki Brocuwa me Kwena Maber Mua ki Bot Lubanga!
Brocuwa Manyen ma Kiyubo me Konyowa me Dok Cen ka Lim ki Cako Kwano Baibul ki Dano
1. I Gure me Distrik me ‘Gwok Cwinyi!’ wanongo brocuwa manyen mene me konyowa ki dok cen ka lim kacel ki cako kwano Baibul ki dano?
1 I Gure me Distrik ma wi lokke obedo ni ‘Gwok Cwinyi!’, wabedo ki yomcwiny me nongo brocuwa manyen ma konyowa me dok cen ka lim ki me cako kwano Baibul ki dano. Kwena Maber Mua ki Bot Lubanga! oleyo kaka brocuwa me Ngo ma Lubanga Mito, dok girom aroma pienni pwonygi ducu cego. Brocuwa man bikonyowa me cako kwano Baibul ki dano ki i nyim doggolagi. Kadi bed brocuwa me Ngo ma Lubanga Mito onongo nyamo jami ma mitte pi Lukricitayo, pwonye mukene twero bedo tek adada pi jo manyen, ento brocuwa manyen man loko tutwalle i kom kwena maber ma tye i Baibul.—2 Kor. 11:7.
2. Pingo kicoyo brocuwa me Kwena Maber?
2 Pingo kicoyo brocuwa man? Omegiwa ma i twok lobo ducu gubedo ka penyo pi gin tic mo mayot, ma twero ywayo dano kelogi i ada dok ma watwero tic kwede me cako kwano buk me Baibul Pwonyo, ma en aye bukwa ma pire tek pi kwano Baibul. Jo ma gilworo kwano buk pol kare dok ginongo tic ki brocuwa pi kwano Baibul yot. Medo i kom meno, gonyo brocuwa i leb mapatpat bene yot.
3. Brocuwa man dok pat ki bukkewa mukene-ni nining?
3 Kit ma Kiyubo Kwede: Pol pa bukkewa kicoyogi i yo ma dano twero kwanone ci niang lok me ada cut, kadi labongo kony pa ngat mo. Ento brocuwa man dok pat. Kicoyo me konyo dano me kwano Baibul kacel ki lapwony. Pi meno, ka itye ka miyone bot ngat mo, bedo ber ka kong wunyamo paragraf acel nyo aryo. Paragraf ma iye cego, pi meno itwero nyamone ki dano kadi ki i nyim doggolane nyo i ka timo biacara. Kadi bed pwony me 1 ber me cako kwanwa, ento waromo cako kwan ki ka mo keken i brocuwa man.
4. I yo ango ma brocuwa man konyowa me pwonyo dano atir ki i Baibul?
4 I pol pa bukkewa, lagam me lapeny ma kicoyogi, tye nonge i paragraf. Ento i brocuwa man, pol pa lagam nonge i Baibul. Dano mapol gimito ni gipwony lok ki i Baibul ento pe ki i bukkewa. Pi man, ibinongo ni pol pa ginacoya ma kiketogi i brocuwa man pe kiloko i komgi. Myero iyab Baibul ci ikwangi ki iye. Man konyo lutino kwan me ngeyo ni gin ma gikwano-ni a ki bot Lubanga.—Ic. 54:13.
5. Pingo pire tek ni lapwony myero oyubbe maber pi kwangi ducu ki latin kwan?
5 Brocuwa man pe tito tyen lok me ginacoya ducu. Pingo? Pien kiyubo me cuko cwiny latin kwan me penyo lapeny kun weko lapwony tiyo ki dirone me pwony. Pi meno, pire tek me yubbe maber pi kwanwu ducu. Lok ma pire tek bot lapwony aye ni: Myero ogwokke ki duru lok mapol. Wan ducu wamaro tito tyen Ginacoya mada. Ento bedo ber loyo ka wamiyo kare ki latin kwan me tito kit ma en oniang kwede ginacoya moni. Ka watiyo ki dirowa me penyo lapeny, watwero konye me niang maber tyen lok me ginacoya acel acel.—Tic 17:2.
6. Watwero tic ki brocuwa man nining: (a) ka ma dano tye ki akalakala i kom Lubanga ki Baibul? (b) ka wacito i ot ki ot? (c) me cako kwano Baibul ki dano kun wapenyogi atir ka gimito kwan? (d) ka wadok cen ka lim?
6 Calo bukke mukene ma watiyo kwede pi kwan ki dano, brocuwa man bene waromo terone bot dano i dwe mo keken, kadi tye i kin bukke ma wabiterogi i dwe meno nyo pe. Jo mapol gibinongo ni yot me cako kwan ki dano ki i nyim doggolagi kun ipenyogi atir ka gimito kwan. Medo i kom meno, kit ma kitito kwede i gure me distrik, tic ki brocuwa man ka idok bot jo ma gunyutu miti “weko tic me dok ka lim bedo mit mada!”—Nen bok ma tye i pot karatac 4 5-7.
7. Iromo kwano Baibul ki dano nining kun itiyo ki brocuwa man?
7 Kit me Kwan ki Dano: Waromo cako lokwa ki kwano lapeny ma kiketo namba i acakkine dok kicoyo ki coc ma kikwoto. I nge meno, kwan paragraf kacel ki ginacoya ma kicoyo ki coc ma obuto abuta-ni. Peny lapeny ki diro wek ikony rwod ot me niang tyen lok me ginacoya. Dong ma peya wucito i lapeny mukene, peny rwod ot me gamo lapeny ma kicoyo ki coc ma kikwoto, wek inge ka en oniang maber. Pi limmi tyen me aryo nyo adek mukwongo, romo bedo ber ka wunyamo lapeny acel keken. I nge kare mo dong waromo medo bute ma wanyamo kun watyeko pwony acel olu.
8. Waromo waco lok ango ka wamito kwano ginacoya moni, dok pingo?
8 Ginacoya ma kicoyo i nyime ni “kwan” en aye miyo lagam i kom lapeny ma kicoyo ki coc ma kikwoto. Ka watye ka kwano ginacoya moni, bedo ber ka pe wawacci, “Lakwena Paulo owacci” nyo “Nen lok ma lanebi Jeremia otito.” Rwod ot twero tamo ni watye ka kwano lok pa dano adana. Bibedo ber me wacci, “Lok pa Lubanga wacci” nyo, “Nen kong gin ma Baibul otito.”
9. Myero mono wakwan ginacoya ducu i kare me kwanwa?
9 Myero mono wakwan ginacoya ducu nyo ginacoya ma kiketo ni “kwan” keken? Meno kwako kit ma kwanwu tye ka wot kwede. Ginacoya ma kiketogi ducu gitye ki tyen lok. Ginacoya acel acel tye ki ngec ma pire tek me anyama. Ento i kare mukene, ka latin kwan pe ki cawa, mitine nok, nyo pe ngeyo kwan maber, ci watwero kwano ginacoya ma kiketo ni “kwan” keken.
10. Awene ma watwero lokke kwede i buk me Baibul Pwonyo?
10 Kare Mupore me Lokke i Buk me Baibul Pwonyo: I nge kwan pi kare mo olo ma nongo kwanwa me Baibul bedo kare ki kare, waromo lokke i buk me Baibul Pwonyo nyo medde ki brocuwa me Kwena Maber. Lutit kwena myero gupim ki diro awene ma gitwero lokke kwede. Ka dong walokke i buk me Baibul Pwonyo, myero mono dok wacak kwan ki i acakkine? Pe tye cik mo ma kwako lok man. Latin kwan acel acel pat. Ento gire, pol pa lutino kwan ginongo adwogi maber ki i nwoyo pwony ma wunyamo-ni i yo matut i buk me Baibul Pwonyo.
11. Pingo myero wati maber ki brocuwa manyen man?
11 I lobo ma dong kwena mo maber nok iye, watye ki mot me tito kwena ma pud dong ber loyo—ni Ker pa Lubanga dong tye ka loc dok cokcok-ki bikelo lobo manyen ka ma kit matir bibedo iye! (Mat. 24:14; 2 Pet. 3:13) Watye ki gen ni pol pa dano ma giwinyo kwena-ni gibiye gin ma kicoyo man: “Neno tyene ber mada i wi godi, ngat ma kelo lok maber, ma tito pi kuc, ma kelo lok maber me gin maber, ngat ma tito lok me larre, ma waco bot Cion ni, ‘Lubangani tye ka loc.’” (Ic. 52:7) Dong, watiyu ki brocuwa man me tero kwena maber mua ki bot Lubanga bot jo ma orwo nekogi i wang ticwa!
[Bok i pot karatac 5]
Ka ma Dano Tye ki Akalakala i kom Lubanga ki Baibul:
● I kabedo mogo, lutit kwena ginongo ni tic ki lok calo “Lubanga” nyo “Baibul” miyo kingolo lokwa woko. Ka tye kit meno, i limmi tyen mukwongo, romo bedo ber ka wunyamo jami ma gudo kwo pa dano me kabedowa, calo ka dano mito gamente maber, ka ma wutwero nongo iye kony pi jo me ot, ki gin ma bibino i anyim. Gwok nyo waromo nyutigi brocuwa me Kwena Maber i nge nyamo lok kwedgi tyen mapol wek guniang kit ma wangeyo ni Lubanga tye ada ki pingo watwero geno Baibul.
[Bok i pot karatac 6]
Ka Itye ka Wot i Ot ki Ot:
● “Abino ka nyutti kit ma yot kwede me ngeyo gin ma Lubanga oyubo pi dano i anyim. Tika dong ipenye kekeni ka Lubanga bikwanyo pekkiwa ducu woko i nino mo? [Mine kare wek ogam.] Brocuwa man nyuto ka kwene i Baibul ma itwero nongo iye lagam i kom lapeny meno. [Mi bote brocuwa man, ci wukwan paragraf mukwongo i pwony me 1, kacel ki Jeremia 29:11.] Ki kany, tika nen calo Lubanga mito ni kwo me anyim obed maber makato? [Mine kare wek ogam.] Ka imito, itwero dong ki kopi man. I nino mukene atwero dwogo, ci waromo nyamo paragraf me aryo wek wanen lagam ma Baibul miyo i kom lapeny man, ‘Ngo ma Lubanga bitimo me kwanyo pekki ma dano tye ka limone?’” Ka ineno rwod ot pud tye ki cawa me nyamo lok i limmi mukwongo, wuromo kwano ki nyamo paragraf me aryo kacel ki ginacoya adek ma kiketo iye-ni. Ci iket yub me dok cen ka nyamo lapeny me aryone ma i pwony man.
● “Pol pa dano gimaro lega, tutwalle ka gitye ki peko. In mono kare mukene ilego? [Mine kare wek ogam.] Itamo ni Lubanga tika winyo lega ducu, nyo gwok lega mukene pe yomo cwinye? [Mine kare wek ogam.] Atye ki brocuwa mo kany ma nyuto kit me nongo lagam me lapeny magi ki i Baibul. [Mi bote kopi acel, ci wunyam paragraf mukwongo me pwony me 12 ki ginacoya acel ma kiketo ni “kwan.”] Ber mada ni Lubanga winyo legawa, pe kumeno? Ento me nongo adwogi maber loyo ki i lega, myero kong wange nga ma Lubanga obedo. [Yab pwony me 2 ci inyut bote wi lok matino ducu.] Ka imito, atwero weko brocuwa man boti, ci i nino mukene watwero kwano lagam ma Baibul miyo i kom lapeny magi.”
● “Abino ka limmi tin pien pol pa dano gitye ki par pi jami maraco ma tye ka timme i lobo-ni. Mono itamo ni kwo i lobo-ni nino mo biyubbe? [Mine kare wek ogam.] Dano mapol gibedo ki ur ka guniang ni Baibul tye ki kwena maber ma miniwa gen. Magi aye lapeny mogo ma Baibul gamo.” Mi bote brocuwa man, ci iwek en oyer lapeny ma rwatte ki mitine ki i pok nge brocuwa man. Ci wuyab pwony meno kun inyute kit ma wakwano kwede. Wuyub awene ma ibidok iye ka gamo lapeny ma lubo i pwony meno.
Bok i pot karatac 7]
Tem Penyogi Atir ka Gimito Kwan:
● “Abino ka limmi tin wek atiti yo manyen ma itwero kwano kwede Baibul. Brocuwa man tye ki pwony 15 ma nyuto ka ma itwero nongo iye lagam me lapeny ma pigi tego, ki i Baibul-li. [Nyut bote pot karatac ma anyim ki pok ngeye.] Tika dong itemo niang lok ma tye i Baibul? [Mine kare wek ogam.] Wek kong anyutti kit ma pwony ma iye kwanone yot kwede. [Wunyam paragraf mukwongo i te lapeny me 3 i pwony me 3, dok wukwan Niyabo 21:4, 5. Ka twere, wunyam paragraf ma lubo meno kacel ki ginacoya ma kicoyo ni “kwan” ma tye iye.] Ka imito, atwero weko brocuwa man boti. Itwero temo yo manyen man me kwano Baibul olo kicel mo. Ka inongo ni ber, ci itwero medde ki kwan. I nino ma lacen, watwero kwano pwony mukwongo. Ka ineno, inongo ni kinyamo i pot karatac acel keken.”
[Bok i pot karatac 7]
Nyut Brocuwa Man ka Idok Cen ka Lim:
● Ka watye ka dok cen bot ngat ma onyuto miti, waromo wacci: “Cwinya yom mada me nongi doki. Akeli brocuwa man ma miyo lagam i kom lapeny mapol, ki i Baibul. [Mi bote brocuwa man, ci ilege me neno pok ngeye.] Lapeny mene ma itye ki miti me nongo lagamme? [Mine kare wek ogam. Ci iyab pwony ma en oyero-ni.] Wek anyuti kit ma itwero tic kwede ki brocuwa man me nongo lagam ki i Baibul.” Nyute kit ma wakwano kwede Baibul kun wunyamo paragraf acel nyo aryo kacel ki ginacoya ma kicoyo ni “Kwan.” Man aye kit ma cako kwano Baibul ki dano yot kwede! Wek brocuwa odong bot rwod ot, ci wuyub awene ma ibidok iye. Ka wutyeko pwony meno, wuromo nyamo pwony mukene ma rwod ot oyero nyo wucako kwan ki i acakki me brocuwa.