KWOWA MACALO LUKRICITAYO
Wi Pe Owil me Lega pi Lukricitayo ma Kiunogi
Baibul otito con ni Catan biunowa wek ebal ticwa me pwony woko. (Jon 15:20; Yabo 12:17) I yo ango ma watwero konyo kwede Lukricitayo luwotwa ma kitye ka unogi i lobe mukene? Watwero lega pigi. “Lega pa dano ma kite atir tek, tye ki twero madwong.”—Yak 5:16.
Ngo ma waromo lego pire? Watwero kwayo Jehovah ni omi tekcwiny bot omegiwa ki lumegiwa dok okonygi pe me bedo ki lworo. (Ic 41:10-13) Waromo bene lega pi luloc ni gubed ki cwiny maber i kom ticwa me tito kwena wek, “wabed mot labongo ayela, ma waworo Lubanga.”—1Tem 2:1, 2.
I kare ma kiuno Paulo ki Petero, Lukricitayo me cencwari me acel gulego pigi kun gilwongo nyinggi. (Tic 12:5; Rom 15:30, 31) Kadi bed pe wangeyo nying jo ducu ma kitye ka unogi i kareni, pud watwero tito nying kacokkegi, lobogi, nyo kabedogi.