Jehovah Mito ni Jo Ducu Gungut i kom Balgi

1. Gin ango ma ngat ma ongut timo?

KA WATIMO gin mo marac, pire tek ni wangut i kom balwa. Baibul waco ni ka ngat moni ongut, en cako dago balle, juko timone, dok moko tamme pe me nwoyone.—Mat. 3:8; Tic 3:19; 2 Pet. 3:9.

2. Pingo mitte ni wan ducu wapwony lok i kom ningut? (Nekemia 8:​9-11)

² Dano ducu myero gupwony lok madok i kom ngut. Pingo? Pien wan ducu watimo bal nino ducu. Macalo likwayo pa Adam ki Kawa, wan ducu walako bal ki to. (Rom. 3:23; 5:12) Pe tye ngat mo keken ma obwot. Kadi wa jo ma gubedo ki niye matek calo lakwena Paulo, bene gunongo ni tek me lweny ki mitigi maraco. (Rom. 7:​21-24) Tika man tyen lokke ni dong omyero ki cwercwiny i cawa ducu pi balwa? Pe, Jehovah lakica, dok en mito ni wabed ki yomcwiny. Nen kong gin ma otimme i kom Lujudaya ma i kare pa Nekemia. (Kwan Nekemia 8:​9-11.) Jehovah onongo pe mito ni gubed ki cwercwiny mukato kare woko pi bal ma gutimo i kare mukato angec. En onongo mito ni guwore ki yomcwiny. Jehovah ngeyo ni ka wangut i kom balwa, wabibedo ki yomcwiny. Pi meno, en pwonyowa lok i kom ningut. Ka wangut i kom balwa, watwero bedo ki gen ni Wonwa ma lakica-ni bitimiwa kica.

3. Gin ango ma wabinyamo i pwony man?

³ I pwony man, wabinyamo lok i kom ningut. Wabinyamo jami adek. Me acel, wabinyamo gin ma Jehovah opwonyo ki rok me Icrael madok i kom ningut. I nge meno, wabinyamo kit ma Jehovah okonyo kwede dano me ngut. Me agikkine, wabinyamo gin ma Yecu opwonyo ki lulub kore i kom ningut.

GIN MA JEHOVAH OPWONYO KI LUICRAEL I KOM NINGUT

4. Gin ango ma Jehovah opwonyo ki rok me Icrael i kom ningut?

⁴ I kare ma Jehovah omiyo ki rok me Icrael Cikke, gin gukwonge ni gibilubone. Dok Jehovah otito ni ka gibilubo cikke, ci en bigwokogi dok bigoyo laane i komgi. En oloko kit man i kom cikke: “Cik ma acikowu kwede tin-ni pe tek twatwal ma cobone loyowu, dok pe tye ka mabor kwedwu.” (Nwo. 30:​11, 16) Ento ka gukwero lubo cikke onyo guyero me woro lubange mukene, ci Jehovah onongo dong pe bimedde ki gwokogi, dok gibideno can. Man onongo pe tyen lokke ni Jehovah dong owekogi niyak. Onongo pud gitwero ‘dwogo cen bot Jehovah Lubangagi dok gicako woro doge.’ (Nwo. 30:​1-3, 17-20) Onongo gitwero ngut i kom balgi. Ka gutimo meno, ci Jehovah onongo binyikke cok kwedgi dok goyo laane i komgi odoco.

5. I yo ma nining ma Jehovah onyuto ni pe eilo cinge woko i kom jone? (2 Luker 17:​13, 14)

⁵ Jo pa Jehovah gubedo ka jemo i Kome tere tere. Gubedo ka woro cal jogi dok gutimo jami mukene malik. Macalo adwogine, gudeno can malit. Ento Jehovah pe oilo cinge woko i kom jone ma ngutgi tek-ki. En obedo ka cwalo lunebi tere tere me cuko cwiny jone wek gunguti dok guti pire ki cwinygi ducu.—Kwan 2 Luker 17:​13, 14.

6. Jehovah otiyo ki lunebine nining me pwonyo jone tyen lok mumiyo pire tek me ngut i kom bal? (Nen bene cal.)

⁶ Jehovah pol kare onongo cwalo lunebine me bedo ka ciko jone i kom gin ma bitimme ka pe gulokke. Me labolle, Jehovah otiyo ki lanebi Jeremia me tito ki Luicrael ni: “Dwog cen, in Icrael ma pe genne-ni . . . Pe abineni ki kiniga, pien an lakica mada. Kiniga pe bimaka nakanaka. . . . Ye balli keken, ni ityeko jemo woko i kom Rwot Lubangani.” (Jer. 3:​12, 13) Jehovah owaco ki Joel me tito ni: “Wudwog bota ki cwinywu ducu.” (Joel 2:​12, 13) En oweko Icaya otito ni: “Wubed maleng, wubol timwu maraco woko cen ka mabor wek pe dok obed ka nen i nyima; wuwek dong timo gin marac.” (Ic. 1:​16-19) Dok Jehovah otiro Ejekiel me penyo ni: “Itamo ni cwinya bedo yom me neno ka latim marac to? . . . Amito en onguti owek timo bal ci olokke odwog bota wek obed kwo. Pe amito ni dano mo oto. . . . Wulokke wuwek timo bal wek wubed kwo.” (Ejek. 18:​23, 32) Jehovah cwinye bedo yom me neno ka dano ngut i kom balgi pien en mito ni gubed kwo pi naka! Pi meno, Jehovah pe kuro ni kong dano gungut woko ka dong ecak miyogi kony. Kong dong wanenu labol mukene ma moko lok man.

7. Gin ango ma Jehovah opwonyo ki jone kun tiyo ki lanebi Kocea kacel ki dakone?

⁷ Nen kong gin ma Jehovah opwonyo ki jone kun tiyo ki lanebi Kocea kacel ki dakone Gomer. I nge timo abor, Gomer oweko Kocea woko ci ocito bot laco mukene. Tika onongo dong pe twerre ki dako man me ngut? Jehovah, ma obedo ngat ma ngeyo jami ducu ma tye i cwiny dano, owaco ki Kocea ni: ‘Dok icimar dako ma laco mukene maro, ma latim abor; macalo Jehovah maro jo Icrael, kadi bed gulokke gudok bot jogi.’ (Koc 3:1; Car. 16:2) Lok man nyuto ni dako pa Kocea onongo pud tye ka medde ki timo bal madit. Ento kadi bed kit meno, Jehovah pud owaco ki Kocea ni otimme kica dok ojole macalo dakone.a I yo acel-lu, Jehovah onongo pe oilo cinge woko i kom jone ma ngutgi nwang-ngi. Kadi bed onongo pud gitye ka medde ki timo bal madongo, en onongo pud marogi. En obedo ka cwalo lunebine wek gungut dok gulok kwogi. Labol man pwonyowa ni Jehovah ‘ngiyo cwiny dano,’ dok en bitute me konyo ngat ma pud tye ka timo bal madongo me o i ningut. (Car. 17:3) Kong dong wanenu kit ma Jehovah otimo kwede man.

KIT MA JEHOVAH KONYO KWEDE LUBALO ME NGUT

8. Gin ango ma Jehovah otimo me konyo Kain me o i ningut? (Acakki 4:​3-7) (Nen bene cal.)

⁸ Kain aye obedo latin kayo pa Adam ki Kawa. En olako ki bot lunyodone miti me timo gin marac. Ento Kain pe ojuko mitine maraco magi. Baibul waco ni: “Gin ma en otiyo ducu obedo rac.” (1 Jon 3:12) Romo bedo ni meno aye tyen lok mumiyo Jehovah “pe ojolo Kain ki motte” i kare ma Kain omiyo gityer ma mege. Me ka loko kite, “Kain okeco, [dok] wange oballe.” Gin ango ma Jehovah otimo? En oloko ki Kain. (Kwan Acakki 4:​3-7.) Watwero neno ni Jehovah oloko ki Kain i yo me kica dok owacce ni ebigoyo laane i kome ka otimo gin maber. Jehovah bene ociko Kain ni akemo twero weko Kain timo bal. Ki cwercwiny, Kain pe owinyo lok. En pe oye ni Jehovah okonye me ngut i kom balle. Kit macalo Kain okwero bedo kwede lawiny, tika Jehovah dong omoko tamme pe me konyo jo mukene me ngut i kom balgi? Pe tye kit meno!

9. Jehovah okonyo Daudi nining me ngut i kom balle?

⁹ Jehovah onongo maro Kabaka Daudi matek. En olwongo Daudi ni “laco ma yomo cwinya.” (Tic 13:22) Ento Daudi otimo bal madongo, calo abor ki nek. Ma lubbe ki Cik pa Moses, bal pa Daudi onongo romme to. (Levi 20:10; Wel 35:31) Ento Jehovah onongo mito konyo Daudi me ngut i kom balle.b En ocwalo lanebine Natan me limo Daudi kadi bed Daudi onongo peya ongut i kom balle. Natan otiyo ki lapor me konyo Daudi wek oniang ni etimo bal madongo. Daudi oniang ni ecwero cwiny Jehovah matek, dok ongut i kom balle. (2 Cam. 12:​1-14) En ocoyo wer ma nyuto kit ma cwinye ocwer kwede pi balle. (Jab. 51, lok ma i tere piny.) Wer ma i jabuli meno dong okweyo cwiny lubalo mapol dok otugo cwinygi me ngut i kom balgi. Watye ki pwoc madit adada ni Jehovah okonyo Daudi me ngut.

10. Diyo cwiny kacel ki timo kica pa Jehovah weko iwinyo nining?

¹⁰ Jehovah dag kit bal mo keken. (Jab. 5:​4, 5) Kadi bed kit meno, en ngeyo ni wan ducu lubalo, dok pi marre piwa, ka wabalo nongo en mito konyowa. Jehovah kare ducu tute matek me konyo kadi wa lutim bal madongo me ngut wek gunyikke cok kwede. Cuko cwinywa adada me ngeyo ni en tye atera me timiwa kica! Ka watamo i kom diyo cwiny pa Jehovah kacel ki timo kicane, man tugo cwinywa me medde ki bedo lugen bote ki me ngut oyotoyot ka watimo bal. Kong dong wanyamu gin ma Yecu opwonyo ki lulub kore madok i kom ningut.

GIN MA YECU OPWONYO KI LULUB KORE I KOM NINGUT

11-12. Lapor mene ma Yecu otiyo kwede me pwonyowa ni Jehovah tye atera me timiwa kica? (Nen cal ma tye i )

¹¹ Ma kare dong oromo pi Meciya me bino i lobo, Jehovah oweko Jon Labatija ocako tito kwena bot Jone kun cuko cwinygi me ngut i kom balgi. I kare ma Yecu ocako ticce me pwony, en bene opwonyo dano kit ma pire tek kwede me ngut.—Mat. 3:​1, 2; 4:17.

¹² I kare ma Yecu onongo tye i lobo, en opwonyo dano ni Wonne tye atera me timiwa kica ka wabalo. Yo acel ma Yecu otimo kwede meno aye ki bolo carolok mo madok i kom latin awobi murwenyo. Awobi meno oyero me a woko ki gang ci otimo bal mogo madongo. Ento i nge kare mo, en “oniang pire kene” ci odok cen gang. Gin ango ma wonne otimo? Yecu owaco ni i kare ma awobi-ni “onongo pud tye cen ka mabor, wonne onene. Kica omake i kome, oringo okwako ngute, onoto leme.” Awobi-ni onongo mito penyo wonne ka etwero bedo latic i ganggi. Ento wonne onongo tye atera me timme kica, olwonge ni “latinna-ni” dok ojole paco. Wonne owaco ni: “Yam orwenyo, dong ginonge.” (Luka 15:​11-32) I kare ma Yecu onongo kwo i polo, en oneno tyen mapol kit ma Wonne lakica dok pe galle ki timo kica bot jo ma gungut. Carolok pa Yecu man pud dong kweyo cwinywa ya dok nyuto kit ma Wonwa Jehovah lakica adada kwede!

13-14. Pwony ango ma lakwena Petero onongo i kom ningut, dok gin ango ma en opwonyo ki jo mukene? (Nen bene cal.)

¹³ Lakwena Petero onongo pwony ma pire tek ki bot Yecu i kom kit ma Jehovah timo kwede kica bot jo ma gungut. Petero otimo lwak roc mapol dok Yecu onongo tye atera me timme kica. Me labolle, en okwero Yecu tyen adek kulu, dok cwinye ocwer adada pi gin ma otimo-ni. (Mat. 26:​34, 35, 69-75) Ento i ngeye ma kicero Yecu, en onen bot Petero i kare ma Petero tye kene, me lok kwede. (Luka 24:​33, 34; 1 Kor. 15:​3-5) Yecu onongo ngeyo ni Petero ongut i kom balle dok onongo mito nyutte ni etyeko timme kica woko.—Nen Marako 16:7 ki jami me akwana me nwtsty-E pi “ki bot Petero.”

¹⁴ Petero onongo niang kit ma ngat moni winyo kwede ka ongut i kom balle ci kitimme kica. Pi meno, en obedo ki kare me pwonyo jo mukene i kom lok magi. I nge kwer me Pentekote i mwaka 33 K.M., Petero otito bot Lujudaya ma gugure ni gin aye guneko Meciya. Kadi bed kit meno, en ocuko cwinygi ni: “Wungut, wudwog cen, wek balwu gijwa woko, wek nino me yweyo ma a ki bot Rwot [Jehovah] obin botwu.” (Tic 3:​14, 15, 17, 19) Petero opwonyo ni labalo moni ngut ka en olokke. Man tyen lokke ni en loko tamme marac-ci, juko timo gin marac, dok cako timo gin ma yomo cwiny Lubanga. Petero bene onyuto ni Jehovah bijwayo balgi woko, ma bedo calo pe gutimo bal magi. Dok mwaki mapol lacen, Petero ocuko cwiny Lukricitayo ni: “[Jehovah] . . . pud tye ka diyo cwinye i komwu, pien en pe mito ni ngat mo orweny woko matwal, ento mito ni jo ducu guo i ningut.” (2 Pet. 3:9) Ka wangut i kom balwa, kadi wa bal madongo, kweyo cwinywa me ngeyo ni Jehovah timiwa kica i yo ducu!

15-16. (a) Lakwena Paulo opwonyo lok i kom timo kica nining? (1 Temceo 1:​12-15) (b) Gin ango ma wabinyamo i pwony ma lubo man?

¹⁵ Caulo me Taruco otimo jami maraco mapol. En obedo ka keto aunauna magwar i kom lulub kor Kricito. Pol pa Lukricitayo nen calo gutamo ni Caulo pe twero lokke kulu. Ento, Yecu onongo ngeyo ni Caulo twero lokke kacel ki ngut i kom balle. Yecu kacel ki Wonne guneno kit mabeco ma Caulo tye kwede. Yecu owaco ni: “En aye gin ticca ma dong ayero.” (Tic 9:15) Yecu otimo tango me konyo Caulo me ngut i kom balle. (Tic 7:58–8:3; 9:​1-9, 17-20) Caulo ongut i kom balle ci odoko lakwena ma kilwongo ni Paulo. Paulo onongo pol kare tito pwoc ma etye kwede pi kit ma Jehovah ki Yecu gunyutte kica. (Kwan 1 Temceo 1:​12-15.) Lakwena man opwonyo ni: “Lubanga lakica, pien teli wek ingut i kom balli.”—Rom. 2:4.

¹⁶ I kare mo, Paulo owinyo ni kacokke ma i Korint guye ni laco mo ma tye ka timo tim tarwang omedde ki bedo i kacokke. Gin ango ma Paulo owaccigi ni gutim? Ki i lok ma en ocoyo botgi, watwero pwonyo kit ma Jehovah nyuto kwede mar ka en tye ka miyo pwod bot luticce dok nyuto kica ka gungut. Dok wabineno kit ma watwero lubo kwede lanenne. I pwony ma lubo man, wabinyamo gin meno ma otimme i kacokke me Korint.