Itwero Bedo ki Yomcwiny Kadi Bed Dong Itii Woko

1-2. Jehovah neno jo muti ma gitye lugen bote nining? (Jabuli 92:​12-14; nen bene cal ma tye i .)

I KABEDO mogo, dano gineno tiyo calo obedo deyo adada. Ento i kabedo mukene doki, dano gitute ki kerogi ducu me gengo lanyut mo keken me tiyo. Me labolle, ka guneno nyig lwar mo acel otwi i wigi, giputo woko cutcut. Ento kadi bed gitute nining me gengone, pe gitwero juko tiyo.

² Kadi bed kit meno, Wonwa me polo tye ki neno mapat i kom luticce ma gitye ka teggi. (Car. 16:31) En owaco ni gileng calo yadi ma gitye ka dongo maber. (Kwan Jabuli 92:​12-14.) Pingo lapor man rwatte? Pien yadi ma guti pol kare gibedo mwonya adada pien nongo potgi ki aturegi bedo dwong. Tye yat mo ma turu maleng adada ma nonge i lobo Japan ki but lobe mukene bene. Yadi magi mukene dong orii pi mwaki makato alip acel dok gin aye dong gileng loyo. I yo acel-lu, lutic pa Jehovah ma dong gutii, gileng adada bote. Jehovah neno kit mabeco ma jo muteggi gitye kwede. Gin gutiyo pire pi mwaki mapol dok gumedde ki bedo lugen bote i kare maber ki i kare ma kwo tek.

3. Mi labol ma nyuto kit ma Jehovah otiyo kwede ki jo mutii me cobo yubbe.

³ Jehovah pud medde ki nenowa calo jo ma pigi tek kadi bed dong wati ma komwa oloc woko.a Ki lok ada, Jehovah pol kare tiyo ki jo mutii me cobo tic mogo madongo. Me labolle, Cara onongo otii adada i kare ma Jehovah wacce ni binywalo latin laco. Owacce bene ni latin meno bidoko kwaro rok madit kacel ki kwaro Meciya. (Acak. 17:​15-19) Moses bene onongo dong otii woko i kare ma Jehovah oore me cito ka gonyo Luicrael ki i Ejipt. (Nia 7:​6, 7) Dok lakwena Jon onongo otii adada i kare ma Jehovah otiyo kwede me coyo bukke abic me Baibul.

4. Ma lubbe ki Carolok 15:​15, gin ango ma twero konyo jo mutii me kanyo pekki ma gikato ki iye? (Nen bene cal.)

⁴ Ka wawoto ki teggi, pol kare wacako bedo ki peko me yotkom dok meno weko kwo bedo tek adada. Meno aye oweko jo mapol giwaco ni, “Bedo ngat mutii pe mit.” Ento Jehovah twero konyi me bedo ki yomcwinyb wek inong mit pa kwo kadi bed peko tye. (Kwan Carolok 15:15.) I pwony man, wabinyamo jami mogo ma jo mutii gitwero timone me medde ki bedo ki yomcwiny. Wabinyamo bene gin ma jo mukene gitwero timone me konyo omege ki lumege ma gutii ma i kacokkegi. Ento mukwongo, kong wanyamu pingo twero bedo tek me bedo ki yomcwiny ka wawoto ki teggi.

PINGO TWERO BEDO TEK ME BEDO KI YOMCWINY KA DONG WATII?

5. Gin ango ma twero weko jo mogo mutii gibedo ki turcwiny?

⁵ Gin ango ma twero weko ibedo ki turcwiny? Twero bedo ni cwinyi cwer pien dong ipe ki kero me timo jami kit ma onongo itimo kwede con. Itwero cako paro kare ma onongo pud itidi dok komi yot. (Latit. 7:10) Me labolle, laminwa mo ma nyinge Ruby owaco ni: “Pol kare anongo tek adada me ruko bongo pien pe dong atye ki kero kit macon dok kare ducu awinyo koma rem. Kadi wa timo gin mayot calo ruko cokci i tyena dong pe atwero. Awinyo cinga ducu rem ma pe atwero timo gin mo keken.” Dok Omego Harold, ma otiyo i Betel owaco ni: “I cawa mukene cwinya cwer pien pe dong atwero timo jami ducu ma yam anongo mit pa timogi. Onongo koma tek adada i kare ma pud atye bulu. Dok onongo amaro tuko odilo. Jo mukene onongo giwaco ni, ‘Kob odilo bot Harold pien en twero konyowa me loyo tuko.’ Ento i kare-ni, pe dong atwero kadi wa bayo odilo.”

6. (a) Tyen lok mukene ango mumiyo jo mutii cwinygi tur? (b) Gin ango ma twero konyo jo mutii me niang ka mitte ni gujuk dwoyo mutoka woko? (Nen pwony ma i magajin man ma wiye tye ni “Tika Omyero Ajuk Dwoyo Mutoka Woko?”)

⁶ Cwinyi twero tur pien dong imito kony pa jo mukene me timo jami ma yam itimo piri keni. Twero mitte ni kinongi ngat mo me gwoki nyo ikob i gang pa latinni mo wek ogwoki. Nyo gwok cwinyi otur pien yotkomi oballe nyo wangi dong oballe woko ma oweko pe itwero dwoyo mutoka nyo ringo ki pikipiki nyo lela. Meno twero weko cwinyi cwer adada! Twero bedo ni pe dong iromo timo jami mapol ma onongo yam itimo. Ento wii opo ni piri pud tek adada bot Jehovah ki bot jo mukene bene. Dok itwero bedo ki gen ni Jehovah niang kit ma iwinyo kwede. Jehovah ngeyo kit ma wamare kwede matek ki kit ma wamaro omegiwa ki lumegiwa bene. Dong meno weko piwa bedo tek adada bote.—1 Cam. 16:7.

7. Gin ango ma twero konyo jo mutii ma cwinygi cwer pien gitamo ni giromo to woko ma peya agikki piny obino?

⁷ Twero bedo ni cwinyi cwer pien itamo ni iromo to woko ma peya agikki piny obino. Ka iwinyo kit meno, ci gin ango ma twero konyi? Wii opo ni Jehovah tye ki tyen lok maber mumiyo en pud peya ojwero lobo man marac-ci woko. (Ic. 30:18) Dong pingo Jehovah pud tye ka diyo cwinye? En tye ka miyo kare bot dano milion mapol ata me pwonyo lok i kome ki me tic pire. (2 Pet. 3:9) Dong ka cwinyi otur, wii opo ni dano mapol pud gitwero pwonyo lok i kom Jehovah dok kitwero larogi ma peya agikki piny obino. Jo mogo i kingi bene twero bedo jo me pacowu.

8. Ka jo mutii gitye ki arem nyo komgi lit, gin ango ma i kare mukene gitimo?

⁸ Ka komwa lit nyo watye ki arem, bedo yot adada botwa me waco nyo timo gin mo ma pe opore. (Latit. 7:7; Yak. 3:2) Me labolle, i kare ma Yubu onongo tye ki arem matek, en obedo ka loko “lok atata.” (Yubu 6: 1-3) Pi meno, watwero niang pingo jo mutii i kare mogo giwaco nyo gitimo gin ma pe opore ka komgi lit nyo gitye ka mwonyo yat mo. (Latit. 7:7; Yak. 3:2) Ento kadi bed dong watii woko nyo komwa lit, pe opore me tero jo mukene marac nyo keto gingi ni myero kitimiwa jami kare ducu. Dok ka ce wawaco lok ma pe nyuto kica bot ngat mo, ci omyero pe wagalle ki kwayo kica.—Mat. 5:​23, 24.

KIT ME MEDDE KI BEDO MA CWINYI YOM

9. Pingo omyero ijol kony ki bot jo mukene? (Nen bene cal.)

⁹ Jol kony ki bot jo mukene. (Gal. 6:2) I acakkine, itwero nongo ni tek me ye kony pa jo mukene. Laminwa mo ma nyinge Goretic owaco ni: “I kare mogo, anongo ni tek adada me penyo pi kony ki bot jo mukene pien awinyo calo abidoko yec mapek botgi. Otera kare malac me loko tamma ki me ye ni amito kony.” Wii opo ni ka ce ijolo kony ki bot jo mukene, ibiweko gibedo ki yomcwiny. (Tic 20:35) Dok ibibedo ki yomcwiny me neno ni jo mukene gimari dok gimito gwoki.

10. Pingo myero wii opo me pwoyo jo ma gikonyi? (Nen bene cal.)

¹⁰ Pwo jo ma gikonyi. (Kol. 3:15; 1 Tec. 5:18) Ka jo mukene gutimo jami mabeco piwa, wabedo ki pwoc. Ento i cawa mukene, wiwa wil woko me waccigi ni apwoyo. Ento ka wabwunyo dok wawaco ni apwoyo, ci luremwa gibingeyo ni watye ki pwoc pi gin ma gitimo piwa. Laminwa Leah, ma gwoko Lubetel ma gutii, owaco ni: “Lamego acel ma agwoko kare ducu pwoya. En coyo lok mogo macego cego i karatac. En pe coyo lok mapol, ento coyo lok ma nyuto kica adada. Amaro kwano lok ma en coyo bota-ni. Yomo cwinya me niang ni en tye ki pwoc pi kony ma amine.”

11. Itwero konyo jo mukene nining? (Nen bene cal.)

¹¹ Tute me konyo jo mukene. Ka itamo pi jo mukene dok itute me konyogi, ci pe ibibedo ka keto cwinyi i kom pekkini keken. Carolok mo me Afrika poro jo mutii ki laibrari ma tye ki bukke ma opong ki ryeko madwong adada. Ento ka dano pe gukwano bukke magi, ci pe gitwero nongo ryeko ma tye i bukke magi. I yo acel-lu, jo matino pe giromo pwonyo jami ma pigi tego ki boti ka pe iloko kwedgi dok ititgi jami ma ingeyo. Tute me ngeyo jo matino kun ipenyogi lapeny dok iter iti ka winyo lagamgi. Itwero tittigi kit ma Jehovah okonyi kwede i kwoni ki dong kit ma bedo lawiny bot Jehovah bikeligi kwede yomcwiny. Ka icuko cwiny luremi ma gitino, ci in bene ibibedo ki yomcwiny.—Jab. 71:18.

12. Ma lubbe ki Icaya 46:​4, gin ango ma Jehovah ocikke ni ebitimo pi jo mutii? (Nen bene cal.)

¹² Leg Jehovah pi teko. I kare mogo, itwero winyo ni iol nyo igoro dok meno twero turo cwinyi adada. Ento wii opo ni, Jehovah tye ki teko ma lapore pe. Baibul waco ni En “pe ol, pe bene doko goro.” (Ic. 40:28) Pi meno, en twero mini teko ducu ma imito. (Ic. 40:​29-31) Ki lok ada, Jehovah ocikke me konyi. (Kwan Icaya 46:4.) Dok Jehovah kare ducu gwoko cikkene. (Yoc. 23:14; Ic. 55:​10, 11) Dong ka ilego, Jehovah bimini kony ma imito. Meno biweko iwinyo ni en mari dok ibibedo ki yomcwiny.

13. Ma lubbe ki 2 Jo Korint 4:​16-18, gin ango ma myero wiwa opo iye? (Nen bene cal.)

¹³ Wii opo ni tiyo tye pi tutunu. Bedo yot me kanyo peko moni ka wangeyo ni bigik woko. Dok Baibul cuko cwinywa ni i kare ma anyim, tiyo kacel ki two dong bibedo pe matwal. (Yubu 33:25; Ic. 33:24) Dong itwero bedo ki yomcwiny pien ingeyo ni i kare me anyim ibibedo ma komi yot, ma komi tek, dok ma ileng loyo kare mo keken. (Kwan 2 Jo Korint 4:​16-18.) Ento gin ango ma jo mukene giromo timone me konyi i kare-ni?

KIT MA JO MUKENE ROMO KONYO KWEDE JO MUTII

14. Pingo pire tek me limo kacel ki goyo cim bot jo mutii?

¹⁴ Lim omege ki lumege ma gutii dok igo cim botgi. (Ibru 13:16) Jo mutii gitwero bedo ki cwercwiny pien pol kare gibedo kengi. Omego mo mutii ma nyinge Samuel ma dong pe twero a ki gang owaco ni: “Atiko bedo i ot cakke odiko wa otyeno. Bedo man olo koma adada. Cawa mukene miyo awinyo calo labwor mutii ma kiloro wiye i cel. Abedo ki par kacel ki kiniga.” Ka walimo jo mutii, waweko giwinyo ni pigi tek botwa dok wamarogi. Twero bedo ni i kare mogo waketo yub me limo nyo goyo cim bot ngat mo mutii, ento pe wacobo yub meno. Wan ducu watye ki jami mapol me atima. Dong, gin ango ma twero konyowa me ‘keto pi jami ma pigi tego mukwongo,’ calo limo jo mutii? (Pil. 1:10) Itwero coyo nying jo mutii ma gitye i kacokkewu, kacel ki nino ma ibicwalo botgi mecej nyo ibigoyo botgi cim. Iromo bene keto yub me limogi. Yer nino ma wii pe twero wil iye.

15. Jami macalo mene ma jo matino kacel ki jo mutii gitwero timone kacel?

¹⁵ Ka ibedo ngat matidi, itwero bedo ka pennye kekeni pien pe ingeyo gin ma iromo lok iye nyo timone ka itye kacel ki ngat mutii. Ento pe mitte ni ipar tutwal. Bed mere larem maber. (Car. 17:17) Lok ki jo muteggi i cawa ma nongo cokke peya ocakke ki dok i ngeye. Gwok nyo itwero penyogi wang Baibul mene ma gimaro loyo nyo gin mo ma onongo gimaro timone i kare ma pud gitino. Iromo lwongogi me bino i paconi ka neno yub me JW Broadcasting^®. Iromo bene konyo jo muteggi ki timmigi jami ma pe gitwero timone. Me labolle, itwero konyogi me neno ni cimgi nyo tabuletgi tye ka tic maber dok tye ki bukkewa ma pud okatti nyen. Laminwa mo ma nyinge Carol owaco ni: “Jalle me timo gin mo ma imaro kacel ki jo muteggi. Kadi bed dong ateggi woko, pud amito ni anong mit pa kwo. Amaro cito ka wil, cito ka cam i otel ki dong limo kabedo mogo mabeco.” Dok laminwa mo ma nyinge Maira owaco ni: “Larema mo acel tye ki mwaka 90. En dit loya ki mwaka 57 kulu. Ento pol kare wiya wil woko ni an atidi adada pien kare ducu wabedo ka nyero dok waneno filim kacel. Dok ka ngat acel i kinwa tye ki peko mo, en penyo pi kony ki bot lawote.”

16. Pingo twero bedo me kony ka wawoto kacel ki jo mutii i ot yat?

¹⁶ Wot kacel kwedgi ka gitye ka cito i ot yat. Ka itero ngat mo mutii i ot yat, itwero bene bedo kacel kwede kunnu me neno ni dokto nyo nac otere maber dok omine kony ma mitte. (Ic. 1:17) Itwero bene konyo ngat mutii meno ki coyo piny jami ducu ma daktar owaco. Laminwa mo mutii ma nyinge Ruth owaco ni: “Pol kare ka acito kena i ot yat, daktar pe ye gin ma atye ka wacce. I kare mukene, ludaktari giwacca ni, ‘In komi pe lit. Itye mere ka poro two apora.’ Ento ka ngat mo owoto kacel kweda i ot yat, ludaktari gitera maber adada. Atye ki pwoc madit adada pi omege ki lumege ma gikwanyo karegi me wot kacel kweda i ot yat.”

17. I yo mapatpat ango ma itwero nywako kwede i tic me pwony ki jo mutii?

¹⁷ Ti kacel ki jo muteggi i tic me pwony. Jo mogo ma dong gutii woko pe gitye ki kero me wot i ot ki ot ka tito kwena. Ento itwero gamogi me tito kwena kacel kwedi kun wutiyo ki lalor bukke. Itwero bene keligi kom wek gubed i nget lalor bukke. Nyo bene iromo wot kacel ki ngat mo mutii ka ibicito ka kwan ki latin kwanni me Baibul. Itwero bene keto yub me kwan ki latin kwanni ki i gang pa omego nyo lamego mutii meno. Jo mogo mutii ginongo ni yot me cito ka tito kwena ka kiyubo cokke me cito ka tito kwena i gange. Ka tye kit meno, ci luelda giromo keto yub meno. Yomo cwiny Jehovah adada ka neno watimo gin mo keken ma watwero me nyuto mar ki woro bot jo mutii.—Car. 3:27; Rom. 12:10.

18. Gin ango ma wabinyamo i pwony ma lubo man?

¹⁸ I pwony man, kipoyo wiwa ni Jehovah maro jo mutii adada. Dok omege ki lumege ma i kacokke bene gimaro jo mutii! Bedo ngat mutii pe yot, ento ki kony pa Jehovah pud itwero medde ki bedo ki yomcwiny. (Jab. 37:25) Dok itwero keto cwinyi i kom kare me anyim ma cwinyi bibedo yom loyo kare mo keken! Ento omege ki lumege mukene dok gitye ki peko mapat ki tiyo. Gitye ka gwoko watgi mo mutii, latingi nyo laremgi mo ma kome lit. Gin gitwero medde ki bedo ma cwinygi yom nining? Pwony ma lubo man bigamo lapeny meno.