Aluka ma Balo Piny—Gin Ango ma Baibul Waco?

I twok lobo lung, dano mapol gitye ka deno can pi peko me pii aluka ma balo piny. Nen kong ripot magi:

• “Pi nino mogo manok mukato angec, kot ocwer matek adada i citi madit me China, dok ma naka onongo peya ocwer kumeno pi mwaki 140. Cakke i Ceng Abicel me o i Ceng Adek, kot ocwer ma romo millimeter 744.8 nyo inchi 29.3”—AP News, Agucito 2, 2023.

• “Ceng Angwen obedo nino me aryo ma yamo kot magwar ma kilwongo ni Khanun okelo kot madwong ki yamo matek i kupiny me Japan. Macalo adwogine, dano ma romo aryo gurwenyo kwogi. . . . Byek tye ni kot ma romo mita 0.6 nyo futi 2 bicwer ka ma obedo godi godi i lobo Taiwan.”—Deutsche Welle, Agucito 3, 2023.

• “Aluka ma obalo piny i tum cabit [i Nova Scotia] obedo macalo adwogi me kot ma ocwer ma ayom dene i Atlantic Canada, dok ma naka onongo peya ocwer matek kumeno pi mwaki 50.”—BBC News, Julai 24, 2023.

Gin ango ma Baibul waco i kom pekki macalo magi?

Lanyut pi “kare me agikki”

Baibul nyuto ni watye ka kwo i kare ma kilwongo ni “kare me agikki.” (2 Temceo 3:1) Yecu otito wacon ni i karewa-ni, wabineno “gin ma miyo lworo mako dano.” (Luka 21:11) Alokaloka me piny omiyo pe dong kiromo byeko kit ma pinnye bibedo kwede, dok man tye ka kelo pekki madongo tere tere.

Tyen lok me bedo ki gen

Baibul wacciwa ni, jami mapol ma tye ka timme i kare-ni ma miyo lworo mako dano omyero owek wabed ki gen. Pingo? Yecu owacci: “Ka wuneno gin magi otimme, myero wunge ni Ker pa Lubanga dong onyiko cok.”—Luka 21:31; Matayo 24:3.

Jami ma waneno tye ka timme-ni nyuto ni cokcok-ki, Ker pa Lubanga bicobo pekki ma obino pi alokaloka me piny, kadi wa kit ma pii lwore kwede me cwer calo kot.—Yubu 36:27, 28; Jabuli 107:29.

Me nongo ngec matut i kom kit ma Ker pa Lubanga bicobo kwede pekki ma tye i kabedo murumowa, kwan pwony ma wiye tye ni Anga ma Bilaro Lobo?”