I Mwaka 2023, Dano Gubedo ki Par Mapol—Gin Ango ma Baibul Waco?

I mwaka 2023, jami mapol otimme i lobo ma nyuto atir ka maleng ni watye ka kwo i kare ma Baibul lwongo ni “kare me agikki.” (2 Temceo 3:1) Nen kit ma jami ma tye ka timme i lobo rwatte kwede ki gin ma Baibul otito ni bitimme i karewa-ni.

Jami mutimme i lobo ocobo lok me Baibul

“Mony, ki lok ma yweko pi mony.”—Matayo 24:6.

• “Lweny tye ka medde matek i twok lobo mapat pat.”a

“Oyengyeng biyengo lobo i kabedo mapol.”—Marako 13:8.

• Cakke i acakki me mwaka 2023, oyengyeng ma tekone kato 7 dong otimme tyen 13 kulu i wi lobo. Man tye i kin wel ma malo loyo nicakke ma kicako gwoko rekod.”b

“Gin ma miyo lworo mako dano.”—Luka 21:11.

• “Lobo dong pe tye ka lyetti alyeta ento tye ka wang awanga.”—António Guterres, UN secretary-general.c

“Kec bene bipoto i lobo.”—Matayo 24:7.

• “Mwaka 2023 dok obedo mwaka marac adada pi jo ma gitye ka yelle me pito jo ganggi.”d

“Piny bibedo marac.”—2 Temceo 3:1.

• “Ngat acel i kom dano aboro i wi lobo-ni tye ki two wic.”e

Ngo ma bitimme i mwaka 2024?

Pe tye ngat mo keken ma ngeyo kore ki kore jami ma bitimme i mwaka 2024. Ento jami ma tye ka timme i lobo nyuto ni cokcok-ki Ker pa Lubanga, nyo gamente me polo, bileyo kaka gamente pa dano dok bigiko deno can ki par ducu.—Daniel 2:44; Niyabo 21:4.

Ento ka wawoto ki kuro kare meno, watwero yenyo kony ki bot Lubanga. Baibul waco ni:

“Ka lworo omaka, ai Lubanga, ageno mere in.”—Jabuli 56:3.

Watwero nyutone nining ni wageno Lubanga? Wacuko cwinyi me pwonyo jami mapol madok i kom cikke ma tye i Baibul pi anyim ma deno can bibedo pe. Tem yubwa me kwano Baibul labongo cul mo me neno kit ma in ki jo gangwu wutwero nongo kwede adwogi maber ki i cikke me Baibul.