Ceng Angwen, Oktoba 30
Gin ma mitte keken aye ni myero wamedde me cung matek i yo ma dong wao iye.—Pil. 3:16.
Jehovah pe bitamo ni konyi pe ka pe icobo yub ma onongo pe twerre boti. (2 Kor. 8:12) Nong pwony ki i angola ngola man. Wi pe owil i kom jami ma dong icobo. Baibul waco ni “Lubanga gire pe ye gin ma pe tye kakare, wiye pe biwil i kom tic ma yam wutiyo.” (Ibru 6:10) Pi meno, in bene myero wi pe owil i kom jami ma dong icobo. Tam i kom yub mogo ma dong icobo. Me labolle, dongo watti ki Jehovah, tito ki jo mukene lok i kome, nyo nongo batija. Kit macalo idongo i yo me cwiny dok icobo yubbi i kare mukato, pud itwero medde ki tic matek me cobo yubbi i kare-ni. Ki kony pa Jehovah, itwero cobo yubbi. Ka iwoto ki tute me cobo yubbi, pe myero wi owil ki nongo mit pa neno kit ma Jehovah konyi kwede dok goyo laane i komi. (2 Kor. 4:7) Ka pe iilo cingi woko, ci ibinongo mot madwong makato.—Gal. 6:9. w23.05 31 ¶16-18
Ceng Abic, Oktoba 31
Won kikome marowu, pien wun wumara, dok wuye ni an aa bot Won. —Jon 16:27.
Jehovah yenyo yo me nyuto ki jone ni emarogi dok cwinye yom i komgi. Ginacoya tittiwa tyen aryo mapatpat ma Jehovah olwongo Yecu ni Wode me amara, ma cwinye yom i kome. (Mat. 3:17; 17:5) Tika imito ni Jehovah otitti ni cwinye yom i komi? I kare-ni, Jehovah pe loko kwedwa ki i polo, ento loko kwedwa kun wok ki i Lokke, Baibul. Ka wakwano lok me mar ma Yecu oloko bot lupwonnyene, bedo calo watye ka “winyo” dwan Jehovah ka en waco lok meno botwa. Yecu olubo kit pa Wonne kore ki kore. Pi meno, ka wakwano ni Yecu onongo cwinye yom i kom lulub kore kadi bed onongo gitye ki roc, ci watwero goyo i wiwa ni Jehovah tye ka waco lok meno botwa. (Jon 15:9, 15) Ka watye ka kato ki i peko, meno pe te lokke ni warwenyo cwak pa Lubanga woko. Me ka meno, pekki miniwa kare me nyuto ki Jehovah ni watye ki mar matut pire dok wagene.—Yak. 1:12. w24.03 28 ¶10-11
Ceng Abicel, Novemba 1
Wer ma litino lukere ki litino ma pud dot giwero me paki ber atika. —Mat. 21:16.
Ka in lanyodo, kony lutinoni me yubo lagam ma rwatte ki mwakagi. I kare mukene, kinyamo lok madongo, calo peko ma tye i nyom nyo tim carocaro, ento pud itwero nongo paragraf acel nyo aryo ma latin twero lok iye. Medo i kom meno, kony lutinoni me niang pingo pe kitwero cimogi kare ducu ka guilo cinggi. Tito jami magi twero konyogi pe me bedo ma cwinygi otur ka kiyero jo mukene i cawa ma nongo gin guilo cinggi. (1 Tem. 6:18) Wan ducu watwero yubo lagam ma kelo deyo bot Jehovah dok cuko cwiny Lukricitayo luwotwa. (Car. 25:11) Kadi bed kicel kicel watwero tito gin mo mutimme i kwowa, myero wagwokke ki lok tutwal i komwa kekenwa. (Car. 27:2; 2 Kor. 10:18) Me ka meno, watute me keto tamwa i kom Jehovah, Lokke, ki jone.—Yabo 4:11. w23.04 24-25 ¶17-18