Tika Baibul Twero Konya ka Atye ki Two ma Pe Cang?

Lagam ma Baibul miyo

Twero konyi. Lubanga tamo pi luticce ma komgi lit. Baibul loko i kom lutic pa Lubanga ma gitye lugen ni: “Rwot gwoke ka two ma tye i wi kitanda.” (Jabuli 41:3) Jami adek magi twero konyi me lweny ki two ma pe cang:

1. Leg pi teko me kanyone. Itwero nongo “kuc pa Lubanga ma kato ngec pa jo ducu,” man weko pe ibedo ki par mapol dok konyi me kanyo pekoni.​—Jo Pilipi 4:6, 7.

2. Bed ki neno mupore. Baibul waco ni: “Yomcwiny kelo yotkom, cwercwiny miyo dano mok woko.” (Carolok 17:22) Tute me bedo ma cwinyi yom, pien man twero kweyo cwinyi dok keli alokaloka mo olo.

3. Jing genni pi anyim. Gen pi anyim twero konyi me bedo ki yomcwiny kadi itye ka lweny ki two ma pe cang. (Jo Roma 12:12) Baibul waco ni i anyim, ‘pe tye dano mo ma biwaco ni, “An koma lit.”’ (Icaya 33:24) Lubanga bicango two ducu ma cangone oloyo ludaktari i kare-ni. Me labolle, Baibul waco ni: Jo mutii ‘komgi biroc dok tekogi bidwogo cen calo i kare me bulugi.’​—Yubu 33:25.

Bed ki ngec ni: Kadi bed Lucaden pa Jehovah giye ni Baibul twero konyogi, gin bene giyenyo kony ki bot ludaktari ka gitye ki two ma pe cang. (Marako 2:17) Ento pe wamoko tam pi dano pi yo me cango two ma myero guti kwede; ngat acel acel myero omok tamme pire kene.