1 .Gin ango ma lupwonye pa Yecu gupwonyo ki neno gin ma en timo?

¹ Yecu owacci: “Wuting yatta, ci wupwony kita.” (Mat. 11:29) Onen ka maleng ni en opwonyo dano ki bedo lanen maber botgi, pe i gin ma en oloko keken. Tam kong ngo ma lukwena gupwonyo ki bot Yecu. En obedo dano ma mwol, lakica, dok lamar. (Mat. 8:1-3; Mar. 6:30-34) Mwolo ma onongo en tye kwede obedo mwolo me ada. (Jon 13:​2-5) I kare ma lukwena gubedo ka wot kacel ki Yecu i tic me pwony, gin guneno ni en onongo tiyo ma pe ywe dok kwena me ada ma en pwonyo gudu cwiny dano. (Luka 8:1; 21:​37, 38) Wan mono wagudo cwiny jo ma ginenowa i tic me pwony-nyi nining?

2. Rukkewa ki kitwa maber i tic me pwony mono twero gudu cwiny jo me odi nining?

² Jo me Odi: Rukkewa maber, ber kitwa, ki nyutu miti i kom dano twero gudu cwiny jo me odi. (2 Kor. 6:3; Pil. 1:27) Dano gineno ni watiyo ki Baibul pol kare. Jo mukene cwinygi bedo yom ka gineno watero itwa i winyo lok ma giloko. Bedo lanen maber i yo magi weko dano gibedo ki miti me winyo kwena me Ker ma watito dok man pe myero wanen ni obedo gin ma pire pe tek.

3. Waromo kelo adwogi maber ango bot utmegiwa?

³ Utmegiwa: Tam kong bene, adwogi maber ma kitwa romo kelone i kom utmegiwa. Mit kom ma watye kwede pi tito kwena weko dano bene gidongo kodi miti meno. Macalo nyonyo pako lawote, ka wayubbe maber i tic me pwony wamiyo jo mukene bene dongo ryekogi me tito kwena. (Car. 27:17) Yellewa me gwoko rekod pa jo ma gunyutu miti ki dong dok cen botgi labongo galle twero cuko cwiny jo mukene me lubo lanenwa. Wabibedo lanen maber bot lutic luwotwa ka wacobo tic me pwonywa kakare.​—2 Tem. 4:5.

4. Pingo kare ki kare myero wabedu ka ngiyo kit ma lanenwa gudu kwede dano?

⁴ Pingo kong pe ibed ka temme kare ki kare me neno ngo ma itimo ki ngo ma iloko ki kit ma lanen-ni romo gudu kwede jo mukene? Lanenwa maber biyomo cwiny Jehovah dok bikonyowa me lok calo lakwena Paulo ni: “Wulub kita, macalo an bene alubo kit pa Kricito.”​—1 Kor. 11:1.