Kit me Nongo Adwogi Maber ki i Gurupwu me Cito i Tic me Pwony
1. Adwogi mabeco ango ma obedo i Cokke me Kwano Buk, ma pud watwero nongone i gurupwa me cito i tic me pwony?
1 Tika iparo jami mogo ma onongo tye i Cokke me Kwano Buk? Gurup magi onongo tye ki dano manok, ma weko wabedo agonya. Man omiyo wamoko lirem ma wat i kinwa cok dok okonyowa me jingo niyewa. (Car 18:24) Lanen wi cokkewa me kwano buk onongo ngeyo kwo ma wakato ki iye dok twero cuko cwiny ngat acel acel. (Car. 27:23; 1 Pet. 5:2, 3) Adwogi mabeco magi pud tye nonge i gurupwa me cito i tic me pwony.
2. Watwero cako lirem ki jo me gurupwa me cito i tic me pwony ma konyowa me dongo i yo me cwiny nining?
2 In Aye Icakki: Gurup me tic me pwony bedo ki wel dano marom ki gurup me kwano buk ma yam con-ni. Ka watiyo “kacel” ki jo mukene wamoko lirem ma adwogine weko wabedo ma kinwa cok. (Pil. 1:27) Dano adi ma i gurupwu ma dong itiyo kwedgi? Itwero ‘yabo cwinyi malac’ i yo man? (2 Kor. 6:13) Medo i kom meno, kare mukene watwero lwongo ngat mo ki i kin gurupwa wek onywak kwedwa i Otyeno me Woro pi Jo me Ot nyo walwonge ka cam kwedwa. I kacokke mukene gurup me cito i tic me pwony gileyo jolo lalok ma obino ka lim. I cabit ma nongo yub meno tye, gin ducu gigure, gicamo cam kacel dok giboko lok ma cuko cwiny kadi bed lalok tye kwedgi nyo pe.
3. Kare ma mene ma watye kwede pi konyo gurup me tic me pwony?
3 Kadi bed ni i kareni kacokke girwatte kiryo keken i cabit acel, man pe te lokke ni lutit kwena myero dong gunong kwac manok keken. Gurup acel acel tye ki lanen wi gurup ma cuko cwiny dano dok pwonyogi kit me tito kwena. Ka lanen wi gurupwu pud peya oketo yub me tic kwedi i tic me pwony, pingo pe ipenye wek iti kwede? Medo i kom meno lanen wi tic me pwony nywako i tic ki gurup mapat pat i tum pa cabit ducu dwe ki dwe. I kacokke ma tye ki gurup me cito ka pwony manok keken, lanen wi tic romo keto yub me limo gurup magi ki acel acel kiryo i mwaka acel. Tika iketo yub me cito ka pwony ka en tye ka tic ki gurupwu?
4. (a) Cokke me cito ka pwony myero obed nining? (b) Ngo mumiyo opore piwa me yabo ganggiwa pi yub me cokke me cito ka pwony?
4 Pol kare bedo ber ka gurup acel acel gurwatte mapatpat pi cokke me cito i tic me pwony i tum pa cabit. Bedo ki cokke i kabedo mapol mapatpat ma cakke i cawa marom, biweko wot i cokke ki i wang tic doko yot ki lutit kwena. Lutit kwena giromo yubbe maber me cito i wang tic labongo galle. Bedo bene yot ki lanen wi gurup me keto tamme i kom jo ma en tiyo kwedgi. Ento, bedo ber kare mukene ka gurup aryo nyo makato me ribbe kacel. Ka kacokke olu giribbe kacel i ceng abicel mukwongo me dwe moni, nyo i nge cokke me Kwano Wi Lubele, ci bedo ber ka gurup acel acel gubedo kacel ci lanen wi gurupgi omiyogi tira ma kwako gurupgi pi dakika mo manok, ka dong kidolo te cokke pi cito i tic me pwony ki lega—Nen bok ma wiye tye ni “Tika Itwero Yabo Gangi pi Cokke?”
5. Kadi bed yub me Kwano Buk dong ogik woko, gen ango ma myero wabed kwede?
5 Kadi bed Cokke me Kwano Buk dong ogik woko, Jehovah pud tye ka medde ki miyo jami ducu ma wamito me cobo mitine. (Ibru 13:20, 21) I te gwok pa Jehovah, gin mo pe ma birem botwa. (Jab 23:1) Mot tye mapol i yub me gurup me cito i tic me pwony. Ka in aye itelo yo i cwako yub meno kun ‘icoyo kodi madwong,’ ci ‘ibikayo bene mabup.’—2 Kor. 9:6.
[Bok i pot karatac 6]
Tika Itwero Yabo Gangi pi Cokke?
Kacokke mukene giribbe kacel pi cokke me cito ka pwony i tum pa cabit pien gitye ki paci manok keken ka ma gitwero rwatte iye. Cokke me cito ka pwony obedo but yub pa kacokke, pi meno yabo gangi obedo mot madit mada. Tika itwero yabo gangi pi cokke magi? Pe ilwor ni gwok nyo gangi pe opore. Luelda gibineno lok ma kwako ka ma gangi tye iye, ki jami mukene ma onongo yam gingiyo ka gitye kayero kabedo pi cokke me kwano buk. Kace imito yabo gangi pi cokke, mi ngec bot lanen wi gurupwu.