Yecu Obedo Lawiny Kare Ducu

Bedo lawiny bot lunyodoni kare ducu mono obedo gin mayot?— I kine mukene gire tek. Ingeyo ni Yecu obedo lawiny bot Jehovah ki lunyodone?— Lanene twero konyi me bedo lawiny bot lunyodoni kadi wa i gin ma timone tek. Kong waniang lok meno maber.

Yecu kong obedo gin ki Wonne, Jehovah i polo ma peya obino i lobo. Ento Yecu bene onongo tye ki lunyodo i lobo kany. Nyinggi onongo Yucepu ki Maliam. Ingeyo kit ma gudoko kwede lunyodone?—

Jehovah okobo kwo pa Yecu ki i polo ci oketo i i Maliam wek kinywal Yecu me kwo i lobo kany. Man obedo tango! Kit macalo lutino gidongo i i megigi-ni, Yecu bene odongo i i Maliam. I nge dwe abongwen kinywalo Yecu. Meno aye kit ma Maliam gin ki cware, Yucepu, gudoko kwede lunyodo pa Yecu i lobo kany.

I kare ma Yecu onongo pud tye ki mwaka 12 keken, en otimo gin mo ma onyuto kit ma en maro kwede Wonne, Jehovah. Man otimme i kare ma Yecu kacel ki lupacogi gucito ka mabor wa i Jerucalem pi kwero nino madit me Kato. I kare ma gitye ka dok cen gang, Yucepu ki Maliam guyenyo Yecu ka ducu ento pe gunonge. Ingeyo ka ma onongo en tye iye?—

Yucepu ki Maliam gudok cen Jerucalem oyotoyot ci guyenyo Yecu i kabedo ducu. Onongo gitye ki par mapol mada pien pe gitwero nonge. Ento i nge nino adek, gunongo Yecu tye i ot pa Lubanga! Ingeyo gin mumiyo Yecu onongo tye i ot pa Lubanga?— Pien ki kunu en twero nongo pwony i kom Wonne, Jehovah. En onongo maro Jehovah mada dok mito ni epwony kit me yomo cwinye. Kadiwa i kare ma en odoko laco, Yecu omedde ki bedo lawiny bot Jehovah. Yecu obedo lawiny kadiwa i gin ma timone tek, dok ma kelo can i kome. Yecu tika obedo lawiny bot Yucepu ki Maliam?— Ee, Baibul wacci en obedo lawiny.

Ngo ma itwero pwonyone ki i lanen pa Yecu?— Myero ibed lawiny bot lunyodoni kadiwa i gin ma timone tek. In mono ibitimo kit meno?—