PWONY ME 45

Tyen Lokke Ngo me Bedo ma Pe Wacwako Tung ka Mo?

Kit ma Nen Kwede i Buk Kikome

Yecu opwonyo ni lulub kore myero pe gubed “jo me lobo.” (Jon 15:19) Meno kwako bedo ma pe wacwako tung ka mo ka odok i kom tim me wibye ki lweny. Ki lok ada, pe yot me bedo ma pe wacwako tung ka mo kare ducu. Meno twero weko dano cayowa. I yo ma nining ma watwero medde ki bedo ma pe wacwako tung ka mo kun bene wagwoko gennewa bot Lubanga Jehovah?

1. Lukricitayo me ada gineno gamente pa dano nining?

Lukricitayo giworo gamente. Walubo gin ma Yecu owaco ni, “wudwok jami pa Cecar bot Cecar”—ma meno tyen lokke ni, walubo cik me lobowa, calo cik madok i kom culo mucoro. (Marako 12:17) Baibul pwonyo ni gamente pa dano gitye ka loc keken pien Jehovah oye ni gulo loc. (Jo Roma 13:1) Pi meno, waniang ni gamente pa dano gitye ki ka ma twerogi gik iye. Waketo genwa i kom Lubangawa kacel ki Kerre me polo me cobo pekki pa dano.

2. Watwero nyutone nining ni pe wacwako tung ka mo?

Calo Yecu, wan pe warwako wiwa i tim me wibye. I kare ma dano guneno tango mo ma Yecu otimo dok gutemo make tektek pi kete me bedo kabakagi i lobo, en pe oye. (Jon 6:15) Pingo? Pien, kit ma en otito kwede lacen, “Kerra pe me lobo man.” (Jon 18:36) Macalo lulub kor Yecu, wanyuto ni pe wacwako tung ka mo i yo mapol. Me labolle, pe wacito i lweny. (Kwan Mika 4:3.) Wanyuto woro pi lanyut me lobo moni, calo bandera, ento pe wagoyo calut i nyim bandera pien meno rom ki woro cal. (1 Jon 5:21) Dok pe wacwako nyo wakwero pati nyo lacungo mo me wibye. I yo magi ki mukene, wanyuto ni wan lugen i yo ducu bot gamente nyo Ker pa Lubanga.

NONG NGEC MATUT

Nen kong jami mogo ma twero temo bedowa ma pe wacwako tung ka mo, dok inen kit ma itwero moko tam ma biyomo cwiny Jehovah.

Laco ma pe tye ka cwako tung ka mo. En pe tye ka keto cwinye me winyo lok pa lucung i wibye ma i pati aryo mapatpat ma gitye ka lok ki lwak.

3. Lukricitayo me ada pe gicwako tung ka mo

Yecu kacel ki lulub kore guwekiwa lanen me aluba. Kwan Jo Roma 13:1, 5-7 ki 1 Petero 2:13, 14. I ngeye, tuk VIDIO ci wunyam lapeny magi ma lubo.

VIDIO: Lukricitayo me Ada Pe Gicwako Tung ka Mo—Bute me 1 (4:28)

Pingo omyero wawor luloc?
I yo mapatpat ango ma wanyuto ni wawinyogi?

I kare me lweny, lobe mukene giwaco ni pe gicwako tung ka mo, ento nongo gitye ka miyo kony lapiny piny bot lobe ma gitye ka lweny. Dong tyen lokke ngo me bedo ma pe wacwako tung ka mo? Kwan Jon 17:16. I ngeye, tuk VIDIO ci wunyam lapeny ma lubo-ni.

VIDIO: Lukricitayo me Ada Pe Gicwako Tung ka Mo—Bute me 2 (3:11)

Tyen lokke ngo me bedo ma pe wacwako tung ka mo?

Ka luloc gimito ni watim gin mo ma turo cik pa Lubanga kono? Kwan Tic pa Lukwena 5:28, 29. I ngeye, tuk VIDIO ci wunyam lapeny ma lubo-ni.

VIDIO: Lukricitayo me Ada Pe Gicwako Tung ka Mo—Bute me 3 (1:18)

Ka cik pa gamente pe rwatte ki cik pa Lubanga, cik mene ma omyero walubi?
Tika iromo tamo i kom kare mogo ma twero mitte ni Lukricitayo pe guwiny luloc pa gamente?

4. Bed ma pe icwako tung ka mo i tammi ki ticci

Kwan 1 Jon 5:21. I ngeye, tuk VIDIO ci wunyam lapeny ma lubo-ni.

VIDIO: Gin Mumiyo Lukricitayo me Ada Gimito Tekcwiny—Me Bedo ma Pe Gicwako Tung Ka Mo (2:49)

I vidio man, pingo Ayenge omoko tamme me kwero donyo i pati me wibye nyo nywako i kwer mogo ma miyo deyo ki lobogi, calo goyo calut i nyim bandera?
Tika itamo ni en omoko tam me ryeko?

Jami mukene ango ma twero temo bedowa ma pe wacwako tung ka mo? Tuk VIDIO, ci wunyam lapeny ma lubo-ni.

VIDIO: Pwony ma Wanongo ki i Wi Lubele—Cung Matek ma Pe Icwako Tung ka Mo i Lobo Man ma Opokke-ni (5:16)

Watwero bedo ma pe wacwako tung ka mo nining ka watye ka neno tuko ma kwako lobe mapol?
Watwero bedo ma pe wacwako tung ka mo nining kadi bed tam ma lucungo i wibye gumoko ogudowa i yo maber nyo marac?
Twero gudowa nining ka wamaro lubo lok angeya madok i kom tim me wibye nyo luremwa gimaro lok i kom tim me wibye?

Cal ma kiribogi kacel: 1. Lwak dano mager ma gumako lanyut dok gitye ka jemo. 2. Laco ma tye ka dange dok otingo bandera me lobogi i kare me tuko mo. 3. Latin kwan ma tye ka wero lubaro. 4. Lamony ma omako muduku. 5. Lucung i wibye aryo gitye ka laro lok. 6. Dako ma tye ka keto kad me kwir i canduk. — I kabedo mene ma mitte iye ni Lakricitayo obed ma pe cwako tung ka mo i tamme ki ticce?

NGAT MO ROMO PENYI NI: “Pingo pe wugoyo calut i nyim bandera nyo wuwero lubaro?”

In iromo gamone ningo?

WOT WIYE WIYE

Lukricitayo gitute matek pe me cwako tim me wibye i tamgi, i lokgi, ki ticgi.

Ngo ma ipwonyo?

Ngo ma omyero wami bot gamente pa dano?
Pingo omyero wabed ma pe wacwako tung ka mo ka odok i lok me wibye?
Jami ango ma twero temo bedowa ma pe wacwako tung ka mo?

Atyeko pwony man i nino dwe

Gin me atima

Tam i kom gin mo ma twero temo bedoni ma pe icwako tung ka mo, dok imok tammi kombeddi i kom gin ma ibiwaco dok ibitimo.

Gin mukene me atima:

Your other goal

TIM KWED

Jami ango ma twero mitte ni wajalgi wek wamedde ki bedo ma pe wacwako tung ka mo?

Jehovah Kare Ducu Gwoko Cikkene (3:14)

Gin ango ma jo me odi gitwero timone me yubbe woko con pi atematema ma gudo bedo ma pe wacwako tung ka mo keken?

Pe Icwak Tung ka Mo Keken ka Itye i Yub ma Oguro Lwak (4:25)

Pingo lweny pi lobone pe obedo deyo madit loyo ma ngat moni twero nongone?

“Gin Ducu Twerre ki Bot Lubanga” (5:19)

Ka itye ka moko tam madok i kom dog tic, nen kit ma itwero gwokke wek pe ibed dano me lobo-ni.

“Dano Acel Acel Tye ki Yecce ma Myero Oting” (Wi Lubele, Marci 15, 2006)