Kwena Maber pi Dano Ducu

Cer pa Yecu omiyo lupwonnyene gubedo ki tekcwiny kacel ki mit kom. Lakwena Paulo owoto i kabedo ma dong kombeddi kilwongo ni Turkey ki bene Mediterranean, kun cako kacokke mapol dok jingo cwiny Lukricitayo me cung matek me medde ki kwo matir kun pe gidonyo i tim gero. Kadi bed ni gurwatte ki ariya ma kit magi, jo mapol gudoko Lukricitayo.

Lacen, Paulo bene kibolo i ot okol. Ento, kadi wa ki kunnu en ocoyo waraga mapol me cuko cwiny ki dok tiro kacokke mapat pat. En bene ociko ni jo mungak gubiketo lyeto magwar adada i kom Lukricitayo. Ki kony pa cwiny maleng, Paulo otito ni “orudi mager” ma gibiloko “lok ma ngako dano” gibidonyo i kacokke “ci gibwolo lupwonnye miyo gilubo korgi.”​—Tic pa Lukwena 20:29, 30.

I agikki me cencwari me acel, jo mungak onongo dong gucako donyo i kacokke. I kare meno, Yecu ma onongo dong ocer-ri omiyo Jon oneno ginanyuta ma lubbe ki kare me anyim. Kit ma Jon ocoyo kwede, jo ma gitye ki cwiny me adage nyo lupwonye goba pe gibigengo Lubanga ki cobo cikkene ma onongo en tye kwede pi dano cakke wa i acakki cweyo lobo. “Rok ducu ki kaka ki leb-gu ki jo mapatpat ducu” gibiwinyo kwena maber me Ker pa Lubanga. (Niyabo 14:6) Lobo kibiloko doko Paradic, dok ngat mo keken ma mito timo miti pa Lubanga twero bedo iye!

Meno mono tye “kwena maber” boti? Ka tye kumeno, med ngec-ci i kom kwena ma tye i Baibul ki dok kit ma twero konyi kwede i kareni ki dong i anyim.

Iromo kwano Baibul ki i kabedowa me Intanet i www.jw.org. I kabedo meno me Intanet-ti bene, itwero kwano brocuwa me The Bible​—What Is Its Message? kacel ki Kwena Maber Mua ki Bot Lubanga! Iromo bene kwano buk me Baibul Mono Ada Pwonyo Gin Ango? ki dok bukke mukene ma ginyamo gin mumiyo omyero wagen Baibul ki kit ma waromo keto tirane i tic i odiwa ki dong kwowa. Onyo peny ngat mo keken ma tye Lacaden pa Jehovah pi ngec mukene.

​​—Jenge i Tic pa Lukwena, Jo Epeco, Jo Pilipi, Jo Kolocai, Pilemon, 1 Jon, Niyabo.