August

Mo kadi otihi enyɔ nɛ a he hia nɛ ngɛ wa mwɔnɛ ɔ ngmami ɔ mi ɔ: (1) Nihi nɛ a peeɔ nɔ́ nɛ da a, haomihi baa a nɔ. (2) Yehowa jeɔ wɔ ngɛ kahi a mi. Mɛni blɔ nɔ nɛ Yehowa yeɔ bua wɔ ngɛ kahi a mi? Blɔ kake nɔ nɛ Yehowa guɔ kɛ peeɔ jã ji kaa e haa nɛ wa náa juɛmi nɛ da ngɛ je yaya nɛ ɔ mi. E ngɛ mi kaa Yehowa wo wɔ si kaa wa bua maa jɔ ke wa ngɛ lɛ sɔmɔe mohu lɛɛ, se lɔ ɔ hu tsɔɔ we kaa waa kɛ haomihi be kpee. (Yes. 66:14) E woɔ wɔ he wami kaa waa ngɔ wa juɛmi kɛ ma hwɔɔ se si himi kpakpa nɛ e ma ha wɔ kɛ maa ya neneene ɔ nɔ. (2 Kor. 4:​16-18) Se amlɔ nɛ ɔ po ɔ, e yeɔ buaa wɔ bɔ nɛ pee nɛ wa nyɛ nɛ wa sɔmɔ lɛ daa ligbi. (Kɔmɔ 3:​22-24) Mɛni wa ma nyɛ maa kase ngɛ Yehowa sɔmɔli anɔkualetsɛmɛ nɛ a hi si blema a, kɛ ni kpahi nɛ a ngɛ mwɔnɛ ɔ a nɔ hyɛmi ní ɔmɛ a mi. Waa kɛ nyagbahi ma nyɛ maa kpe be mi nɛ wa hyɛ we blɔ. Se ke wa ngɔ wa hɛ kɛ fɔ Yehowa nɔ ɔ, e be wɔ kuae kɔkɔɔkɔ, mohu ɔ, e maa ye bua wɔ.—La 55:22. w23.04 14-15 ¶3-4

Wa ma nyɛ maa kase Yosef kɛ Maria a nɔ hyɛmi nɔ́ ɔ. E ngɛ mi kaa mlaahi nɛ amlaalo ɔ wo ɔ he wa ha mɛ mohu lɛɛ, se a pee klaalo kaa a maa bu tue. (Luka 2:​1-6) Benɛ Maria hɛɛ hɔ maa pee nyɔhiɔ nɛɛ ɔ, nɔ yeli ɔmɛ wo mlaa ko nɛ e ma bi nɛ Yosef kɛ Maria nɛ a pee nɔ́ ko nɛ he wa wawɛɛ. Augusto nɛ lɛ nɛ e ngɛ Roma Kpokpa a nɔ yee ɔ tsɔɔ kaa nɔ fɛɛ nɔ nɛ ya e ma mi konɛ a kane lɛ. Enɛ ɔ he ɔ, e ma bi nɛ Yosef kɛ Maria nɛ a hia blɔ kɛ ya Betlehem. A maa hia blɔ maa pee si tomi 93 kɛ gu yokuhi a nɔ kɛ dɔgbahi a mi. A be blɔ hiami nɛ ɔ nae gbɔjɔɔ, titli ɔ, Maria. Eko ɔ, Yosef kɛ Maria maa hao ngɛ a bi nɛ a fɔ we lɛ lolo ɔ kɛ Maria nitsɛ he. Ke Maria nu kɔɔmi ɔ, kɛ a maa pee kɛɛ? Bi nɛ ngɛ Maria mi mi ɔ ji nɔ nɛ ma ba pee Mesia a nɛ. Anɛ lɔ ɔ maa tsi a nya konɛ a ko bu amlaalo ɔ tue lo? Yosef kɛ Maria de we ke a be mlaa nɛ amlaalo ɔ wo ɔ nɔ yee ngɛ nyagba nɛ ɔmɛ a he je. Ngɛ anɔkuale mi ɔ, Yehowa jɔɔ mɛ akɛnɛ a bu tue ɔ he je. Maria ya su Betlehem ngɛ tue mi jɔmi mi, nɛ e fɔ bi nɛ ngɛ nɔmlɔ tso mi he wami kpakpa, nɛ enɛ ɔ ha nɛ Baiblo gbami ba mi.—Mika 5:2. w23.10 8 ¶9; 9 ¶11-12

Mɛni o ma nyɛ maa pee ke o yeɔ gbeye kaa o ma ha sane heto? Ke o dla o he saminya a, e maa ye bua mo. (Abɛ 21:5) Ke o dla o he saminya a, e ma ha nɛ o be gbeye yee kaa o ma wo o nine nɔ nɛ o ha sane heto. Jehanɛ hu ɔ, ha nɛ o heto ɔ nɛ pee kpiti. (Abɛ 15:23; 17:27) Ke o heto ɔ ngɛ kpiti ɔ, o be gbeye yee tsɔ. Ke o ngɔ mo nitsɛ o munyu kɛ ha sane heto kpiti ɔ, lɔ ɔ tsɔɔ kaa o dla o he saminya nɛ o nu ní kasemi ɔ sisi. Se ke o bɔ mɔde nɛ o kɛ ga womi nɛ ɔmɛ tsu ní, se loloolo ɔ, o yeɔ gbeye kaa o ma ha sane heto pe si kake loo si enyɔ hu nɛɛ? Mo ná nɔ mi mami kaa Yehowa bua jɔ mɔde nɛ o ngɛ bɔe kaa o maa pee nɔ́ fɛɛ nɔ́ nɛ o ma nyɛ konɛ o ha sane heto ɔ he. (Luka 21:​1-4) Yehowa hyɛ we blɔ kaa waa pee nɔ́ nɛ wa be nyɛe maa pee. (Filip. 4:5) Moo le nɔ́ nɛ o ma nyɛ maa pee, nɛ o ngɔ oti nɛ maa ye bua mo kɛ pee jã a kɛ ma o hɛ mi, nɛ o sɔle konɛ o tsui nɛ ko po. Sisije ɔ, o kɛ ma nyɛ maa pee oti kaa o ma ha sane kake heto kpiti. w23.04 21 ¶6-8

Bɔfo Paulo ngɔ wɔ kɛ to ta buli nɛ a dla a he nɛ a pee klaalo kɛ ha ta a he. Nihi hyɛɔ blɔ kaa e sa nɛ ta bulɔ nɛ pee klaalo kɛ ha ta be fɛɛ be. Jã nɛ e ji ngɛ wɔ hu wa blɔ fa mi. Ke wa wo suɔmi kɛ hemi kɛ yemi he gugue nɔ dama a, nɛ wa bu yi wami hemi he hɛ kɛ nɔ fɔmi nɛ ji dade pɛɛ ɔ, lɔ ɔ tsɔɔ kaa wa pee klaalo kɛ ha Yehowa ligbi ɔ. Gugue nɔ dama poɔ ta bulɔ tsui he piɛ. Jã kɛ̃ nɛ hemi kɛ yemi kɛ suɔmi hu poɔ wa okadi peemi tsui ɔ he piɛ. Ní enyɔ nɛ ɔmɛ maa ye bua wɔ nɛ waa ya nɔ nɛ wa sɔmɔ Mawu nɛ waa nyɛɛ Yesu se. Hemi kɛ yemi haa nɛ wa náa nɔ mi mami kaa ke waa kɛ wa tsui tsuo hla Yehowa se blɔ ɔ, e maa jɔɔ wɔ. (Heb. 11:6) E maa ye bua wɔ nɛ wa maa ye Yesu nɛ ji wa Hɛ Mi Nyɛɛlɔ ɔ anɔkuale, ke lɔ ɔ ma ha nɛ waa kɛ kahi maa kpe po. Ke wa kase nyɛmimɛ nɛ a ngɛ mɛ yi mi wae, loo a kɛ sika he nyagba ngɛ kpee se a ngɛ Yehowa anɔkuale yee ɔ a he ní ɔ, wa hemi kɛ yemi ɔ mi maa wa, nɛ wa ma nyɛ maa da nyagbahi nɛ waa kɛ ngɛ kpee ɔ nya. Jehanɛ se hu ke wa kase nihi nɛ a pee a si himi kpokploo nɛ a ngɔ Matsɛ Yemi ɔ kɛ ye kekle blɔ he ngɛ a si himi mi ɔ, e maa ye bua wɔ konɛ wa ko di he lo nya níhi fuu a se. w23.06 10 ¶8-9

He nɔ yemi ji nyɛmi nɛ nɔ ko kɛ kudɔɔ e he numi kɛ e ní peepee. Wa hia he nɔ yemi bɔ nɛ pee nɛ wa nyɛ nɛ waa su otihi nɛ waa kɛ ma wa hɛ mi ɔ he, titli ke e he wa loo wa bua jɔɛ he kaa wa maa pee jã. Mo kai hu kaa he nɔ yemi piɛɛ mumi ɔ yiblii ɔ he. Enɛ ɔ he ɔ, moo sɔle nɛ Yehowa nɛ ye bua mo kɛ e mumi klɔuklɔu ɔ konɛ o ná su nɛ he hia nɛ ɔ. (Luka 11:13; Gal. 5:​22, 23) Koo mlɛ kɛ ya si benɛ níhi a mi maa hi. Eko ɔ, wa be si himi kpakpa nɛ wa ngɛ blɔ hyɛe ɔ náe ngɛ je nɛ ɔ mi. Enɛ ɔ he ɔ, ke wa ngɛ mlɛe kɛ yaa si benɛ níhi a mi maa hi ha wɔ loko wa ma tsu otihi nɛ waa kɛ ma wa hɛ mi ɔ he ní ɔ, eko ɔ, wa be he sue gblee. Eko ɔ, wa ma susu kaa oti ko nɛ waa kɛ ma wa hɛ mi ɔ he wa, lɔ ɔ he ɔ, wa be nyɛe maa su he. Ke jã nɛ e ji ngɛ o blɔ fa mi ɔ, lɛɛ moo bɔ mɔde kaa o maa pee ní nyafinyafi komɛ kɛ je sisi. Ke oti nɛ o kɛ ma o hɛ mi ji kaa o ma ná su kpakpa ko ɔ, lɛɛ mo sɛ hlami nɛ o bɔni jamɛ a su ɔ kpo jemi bɔɔbɔɔbɔɔ. Ke o kɛ pee oti kaa o maa kane Baiblo ɔ tsuo ɔ, o ma nyɛ maa to blɔ nya konɛ o kɛ be bɔɔ nɛ kane daa ligbi. w23.05 29 ¶11-13

Ngɛ nyagbe ligbi nɛ ɔmɛ a mi ɔ, Yehowa guɔ e we asafo ɔ nɔ nɛ e kɛ blɔ tsɔɔmi haa wɔ kɛ jeɔ Baiblo ɔ mi be fɛɛ be. E ngɛ jã pee konɛ e ye bua wɔ nɛ waa nyɛɛ “Blɔ klɔuklɔu” ɔ nɔ. (Yes. 35:8; 48:17; 60:17) Wa ma nyɛ ma de kaa be fɛɛ be nɛ nɔ ko maa kplɛɛ kaa a kɛ lɛ nɛ kase Baiblo ɔ, lɔ ɔ tsɔɔ kaa e ná he blɔ nɛ e kɛ maa nyɛɛ “Blɔ klɔuklɔu” ɔ nɔ. Ni komɛ nyɛɛɔ blɔ ngua nɛ ɔ nɔ be bɔɔ pɛ kɛkɛ a je nɔ. Ni kpahi hu fia a pɛɛ si kaa a maa nyɛɛ blɔ nɛ ɔ nɔ kɛ ya si benɛ a maa su he nɛ a yaa a. Jije ji he nɛ wa yaa a? Nihi nɛ a ngɛ hɛ nɔ kami kaa a maa ya hiɔwe ɔ, “Blɔ klɔuklɔu” ɔ nɛ a ngɛ nɔ nyɛɛe ɔ kɛ mɛ ma ya su “Mawu paradeiso ɔ mi” ngɛ hiɔwe. (Kpoj. 2:7) Nɛ nihi nɛ a ngɛ hɛ nɔ kami kaa a maa hi zugba a nɔ hu ɔ, blɔ ngua a nɛ a ngɛ nɔ nyɛɛe ɔ ma ha nɛ a maa ye mluku ngɛ jeha 1,000 ɔ nyagbe. Ke o ngɛ blɔ ngua nɛ ɔ nɔ nyɛɛe mwɔnɛ ɔ, koo hyɛ o se, nɛ koo kpale hulɔ kɛ ya si benɛ o maa gbe o blɔ hiami ɔ nya ngɛ je ehe ɔ mi. w23.05 17 ¶15; 19 ¶16-18

Ke o pue o yi mi tɛ ngɛ níhi tsuo nɛ Yehowa pee ha mo ɔ he ɔ, lɔ ɔ ma ha nɛ o je hɛsa kpo, nɛ o maa suɔ kaa o maa jɔɔ o he nɔ kɛ ha lɛ. (La 116:​12-14) Ngɛ anɔkuale mi ɔ, Baiblo ɔ tsɔɔ kaa “nike ní kpakpa fɛɛ nike ní kpakpa, kɛ nike ní nɛ hi kɛ pi si fɛɛ nike ní nɛ hi kɛ pi si” ɔ je Yehowa ngɔ. (Yak. 1:17) Nike ní nɛ pe kulaa nɛ Yehowa kɛ ha wɔ ɔ ji e Bi Yesu. Mo susu he nɛ o hyɛ! Kpɔmi nɔ́ ɔ ha nɛ huɛ bɔmi nɛ mi wa ba ngɛ o kɛ Yehowa nyɛ kpɛti. Jehanɛ hu ɔ, Yehowa wo si kaa o ma nyɛ maa hi si kɛ ya neneene. (1 Yoh. 4:​9, 10) Blɔ nɛ hi pe kulaa nɛ o ma nyɛ maa gu nɔ kɛ tsɔɔ kaa o bua jɔ suɔmi nɛ se be nɛ Yehowa je kpo kɛ tsɔɔ mo, kɛ jɔɔmihi nɛ o nine su nɔ ɔ he ji kaa o maa jɔɔ o he nɔ kɛ ha Yehowa.—5 Mose 16:17; 2 Kor. 5:15. w24.03 5 ¶8

Mwɔnɛ ɔ, ke wa na bɔ nɛ nihi ngɔɔ a he kɛ woɔ je mi bami yaya mi ha a, e haa nɛ wa nuɔ he kaa bɔ nɛ Lot nɛ ji dalɔ ɔ nu he ɔ. ‘Nihi nɛ a yi mlaa nɔ ɔ, a nɔ buimi ngmlikiti ɔ ha nɛ e ye tsui wawɛɛ,’ ejakaa e le kaa wa hiɔwe Tsɛ ɔ sume je mi bami yaya. (2 Pet. 2:​7, 8) Akɛnɛ Lot yeɔ Mawu gbeye nɛ e suɔ lɛ wawɛɛ he je ɔ, e kɛ e he wui je mi bami yayahi nɛ nihi nɛ a bɔle lɛ ɔ kɛ a he woɔ mi ɔ mi. Mwɔnɛ ɔ, nihi nɛ a bɔle wɔ ɔ hu kɛ Yehowa mlaa amɛ tsu we ní kulaa. Se kɛ̃ ɔ, wa ma nyɛ ma ha nɛ wa je mi bami he nɛ tsɔ be fɛɛ be ke wa ha nɛ suɔmi nɛ wa ngɛ kɛ ha Mawu ɔ mi wa wawɛɛ, nɛ wa ye lɛ gbeye ngɛ blɔ nɛ da nɔ. Yehowa yeɔ bua wɔ konɛ wa nyɛ nɛ waa pee jã. E jeɔ suɔmi mi nɛ e woɔ wɔ he wami kɛ guɔ Abɛ womi ɔ nɔ. Nyumuhi kɛ yihi, jokuɛwi kɛ nikɔtɔmahi tsuo ma nyɛ ma ná ga womi nɛ ngɛ ngmami nɛ ɔ mi ɔ he se ke a susu he. Ke wa yeɔ Yehowa gbeye ɔ, lɔ ɔ maa ye bua wɔ konɛ waa kɛ nihi nɛ a peeɔ ní yayahi nɛ ko bɔ. w23.06 20 ¶1-2; 21 ¶5

Eko ɔ, o wekuli te si kɛ wo mo, aloo eko ɔ, o ngɔ he lo nya ní komɛ kɛ sã afɔle konɛ o nyɛ nɛ o ngɔ Mawu Matsɛ Yemi ɔ kɛ ye kekleekle blɔ he. (Mat. 6:33) Ke jã a, lɛɛ o ma nyɛ ma ná nɔ mi mami kaa Yehowa na níhi tsuo nɛ o pee kɛ ha lɛ ɔ. (Heb. 6:10) Eko ɔ, Yesu munyu nɛ nyɛɛ se nɛ ɔ ba mi ngɛ o blɔ fa mi. E de ke: “Nɔ ko be nɛ e si we aloo nyɛmimɛ nyumuhi aloo nyɛmimɛ yihi aloo nyɛ aloo tsɛ aloo bimɛ aloo ngmɔhi ngɛ imi kɛ sane kpakpa a he, nɛ́ e nine be nɔ sue kɛ bɔ he si 100 amlɔ nɛ ɔ ngɛ be nɛ ɔ mi—wehi, nyɛmimɛ nyumuhi, nyɛmimɛ yihi, nyɛmɛ, bimɛ, kɛ ngmɔhi, nɛ́ yi mi wami hu piɛɛ he—kɛ neneene wami ngɛ níhi a blɔ nya tomi nɛ ma a mi.” (Maak. 10:​29, 30) Ngɛ anɔkuale mi ɔ, jɔɔmihi nɛ o nine su nɔ ɔ hiɛ babauu pe nɔ́ fɛɛ nɔ́ ko nɛ o kɛ sã afɔle ɔ.—La 37:4. w24.03 9 ¶5

Be ko ɔ, hwɔ ko nɛ nya wa ba Yudea nɛ e sa Kristofohi nɛ a ngɛ lejɛ ɔ a he. Nyɛmimɛ nɛ a ngɛ Antiokia a “mwɔ a yi mi kpɔ kaa a ti nɔ fɛɛ nɔ ma ha nɔ́ ko bɔ nɛ e ma nyɛ, konɛ a kɛ mane nyɛmimɛ ɔmɛ nɛ a ngɛ Yudea a nɛ́ a kɛ pɛne mɛ.” (Níts. 11:​27-30) E ngɛ mi kaa he nɛ hwɔ ɔ ba ngɛ ɔ kɛ mohu lɛɛ, se Kristofohi nɛ a ngɛ Antiokia fia a pɛɛ si kaa a maa ye bua a nyɛmimɛ ɔmɛ. (1 Yoh. 3:​17, 18) Mwɔnɛ ɔ, ke oslaa ko ba nɛ e sa wa nyɛmimɛ ɔmɛ a he ɔ, wɔ hu wa ma nyɛ ma je mi mi sami kpo kɛ tsɔɔ mɛ. Waa kɛ oya yemi yeɔ bua mɛ. Eko ɔ, wa ma nyɛ ma bi asafo mi nikɔtɔma amɛ kaa nɔ́ ko ngɛ nɛ wa ma nyɛ maa pee kɛ ye bua lo. Jehanɛ hu ɔ, wa ma nyɛ ma ha yemi kɛ buami kɛ fĩ je kɛ wɛ ní tsumi ɔ se, loo waa sɔle kɛ ha wa nyɛmimɛ nɛ oslaa ná mɛ ɔ. Wa nyɛmimɛ ɔmɛ maa hia wa yemi kɛ buami konɛ a nine nɛ su a hiami níhi a nɔ. Ke Yesu Kristo nɛ ji wa Matsɛ ɔ ba konɛ e ba kojo nihi ɔ, nyɛ ha nɛ e ba na wɔ kaa nihi nɛ a mi mi sãa mɛ ngɛ nihi a he konɛ e de wɔ ke “nyɛ ba ngɔ Matsɛ Yemi ɔ.”—Mat. 25:​34-40. w23.07 4 ¶9-10; 6 ¶12

Yesu kase Yehowa, nɛ e nuɔ nɔ́ sisi nɛ e pee we kpɛii. Yehowa tsɔ lɛ kɛ ba zugba a nɔ konɛ e ba fiɛɛ kɛ ha “Israel we jijɔ ɔmɛ nɛ a laa” a. Se benɛ Yesu ngɛ fiɛɛmi ní tsumi ɔ tsue ɔ, e ngɔ e ní peepee kɛ tsɔɔ kaa e nuɔ nɔ́ sisi. Ligbi ko ɔ, yo ko nɛ tsa pi Israelno ji lɛ ɔ kpa Yesu pɛɛ kaa e tsa e biyo nɛ ‘daimonio ngɛ lɛ haoe wawɛɛ’ ɔ ha lɛ. Yesu mi mi sã lɛ ngɛ yo ɔ he nɛ e tsa e biyo ɔ. (Mat. 15:​21-28) Mo susu nɔ hyɛmi nɔ́ kpa ko hu he nɛ o hyɛ. Benɛ Yesu je e fiɛɛmi ní tsumi ɔ sisi pɛ ɔ, e de ke: ‘Nɔ fɛɛ nɔ nɛ e ma kua mi ɔ, imi hu ma kua lɛ.’ (Mat. 10:33) Se benɛ Petro kua Yesu si etɛ sɔuu ɔ, anɛ Yesu kua lɛ lo? Dɛbi. Yesu na kaa Petro pia e he ngɛ nɔ́ nɛ e pee ɔ he, nɛ Petro ji nɔ ko nɛ yeɔ anɔkuale. Benɛ a tle Yesu si se ɔ, e je e he kpo kɛ tsɔɔ Petro, nɛ e ma nyɛ maa ba kaa Yesu ma nɔ mi kɛ ha lɛ kaa e ngɔ e tɔmi ɔ kɛ ke lɛ, nɛ loloolo ɔ, e suɔ lɛ. (Luka 24:​33, 34) Yehowa Mawu kɛ Yesu Kristo tsuo nuɔ nɔ́ sisi nɛ a pee we kpɛii. Nɛ wɔ hu nɛɛ? Yehowa hyɛɛ blɔ kaa waa pee wa he nihi nɛ a nuɔ nɔ́ sisi. w23.07 21 ¶6-7

Mɛni yi mi tomi komɛ a he je nɛ wa ma nyɛ ma ná nɔ mi mami kaa zugba a maa pee Paradeiso ɔ? Mɛni wa ma nyɛ ma de ni kpahi konɛ a ná nɔ mi mami nɛ mi wa kaa si womi nɛ ɔ maa ba mi kokooko? Kekleekle ɔ, Yehowa nitsɛ lɛ wo si ɔ nɛ. Kpo Jemi womi ɔ de ke: “Nɔ nɛ e hii si ngɛ matsɛ sɛ ɔ nɔ ɔ de ke: ‘Hyɛ! I ngɛ níhi tsuo pee ehe.’” Yehowa ngɛ nile kɛ he wami, nɛ e suɔ nɛ e ha nɛ e si womihi tsuo nɛ ba mi. Nɔ́ enyɔne nɛ wa ma nyɛ ma de ni kpahi ji kaa Yehowa le kaa nɔ́ nɛ e de ɔ maa ba mi kokooko. Enɛ ɔ he ɔ, e de ke: “Munyu nɛ ɔmɛ ngɛ mi niinɛ nɛ a ji anɔkuale. . . . A ba mi!” Nɔ́ etɛne ji kaa, ke Yehowa je nɔ́ ko sisi ɔ, nɔ́ ko nɔ́ ko be nyɛe maa tsi lɛ blɔ nɛ e ko gbe nya. Enɛ ɔ he je nɛ e de ke: “Imi ji Alfa a kɛ Omega a” nɛ. (Kpoj. 21:6) Yehowa ma ha nɛ Satan maa pee lakpatsɛ nɛ e be manye yee kɔkɔɔkɔ. Enɛ ɔ he ɔ, ke nɔ ko de ke, “Si womi nɛ ɔ ngɛ bua jɔmi wawɛɛ, se i he we yi kaa e maa ba mi” ɔ, o kɛ lɛ ma nyɛ maa kane Kpo Jemi 21:​5, 6 nɛ o tsɔɔ lɛ nya. Moo tsɔɔ nɔ ɔ odasehi nɛ ngɛ heii nɛ tsɔɔ kaa Yehowa si womi ɔmɛ tsuo maa ba mi ɔ.—Yes. 65:16. w23.11 7 ¶18-19

Yehowa wo Abraham si benɛ e bwɔ nɛ e ye jeha 75 ɔ, jamɛ a be ɔ, e be bi. Anɛ jamɛ a si womi ɔ ba mi ngɛ Abraham yi nɔ lo? Pi lɛ tsuo nɛ ba mi. Benɛ e po Yufrate Pa a, e mlɛ jeha 25 sɔuu loko Yehowa gu nyakpɛ blɔ nɔ nɛ e ha nɛ e fɔ e binyumu Isak, nɛ ngɛ jeha 60 se ɔ, a fɔ Abraham bibimɛ nɛ ji Esau kɛ Yakob. (Heb. 6:15) Se Abraham gbenɔ se loko e nina ba pee je ma ngua, nɛ a nine su Si Womi Zugba a nɔ. Se kɛ̃ ɔ, Abraham ha nɛ huɛ bɔmi kpakpa hi e kɛ e Bɔlɔ ɔ a kpɛti. (Yak. 2:23) Ke a tle Abraham si ɔ, hyɛ bɔ nɛ e bua maa jɔ wawɛɛ ha kaa akɛnɛ e je hemi kɛ yemi kpo nɛ e to e tsui si he je ɔ, a gu e nɔ kɛ jɔɔ je mahi tsuo! (1 Mose 22:18) Mɛni wa ma nyɛ maa kase ngɛ Abraham nɔ hyɛmi nɔ́ ɔ mi? Eko ɔ, amlɔ nɛ ɔ, wa be nae kaa Yehowa si womi ɔmɛ tsuo ngɛ mi bae. Se ke wa to wa tsui si kaa bɔ nɛ Abraham pee ɔ, wa ma nyɛ ma ná nɔ mi mami kaa Yehowa maa jɔɔ wɔ amlɔ nɛ ɔ, nɛ e ma ha nɛ wa ma ná jɔɔmi babauu ngɛ je ehe nɛ e wo si ɔ mi hulɔ.—Maak. 10:​29, 30. w23.08 24 ¶14

Benɛ Matsɛ Uzia ji niheyo ɔ, e ba e he si. E kase bɔ nɛ e ma plɛ kɛ ‘ye anɔkuale Mawu ɔ gbeye ha.’ E ye jeha 68 nɛ e gbo. Yehowa jɔɔ lɛ wawɛɛ ngɛ e si himi mi. (2 Kron. 26:​1-4) Uzia ye mahi fuu nɛ a te si kɛ wo Yerusalem ma a nɔ kunimi, nɛ e po ma a he piɛ. (2 Kron. 26:​6-15) E ngɛ heii kaa Uzia bua jɔ wawɛɛ kaa Mawu ye bua lɛ kɛ tsu níhi tsuo nɛ e nyɛ tsu ɔ. (Fiɛɛ. 3:​12, 13) Matsɛ Uzia pɔɔ nihi demi ke a kɛ e blɔ tsɔɔmi nɛ tsu ní. Eko ɔ, enɛ ɔ ha nɛ e susu kaa e ma nyɛ maa pee nɔ́ fɛɛ nɔ́ nɛ e suɔ. Ligbi ko ɔ, Uzia ya sɛ Yehowa sɔlemi we ɔ konɛ e ya sã tsopa kɛ e he via ngɛ afɔle sami la tɛ ɔ nɔ. Enɛ ɔ nɛ e pee ɔ tsɔɔ kaa e woɔ e he nɔ, ejakaa a ngmɛ́ matsɛmɛ blɔ kaa a pee jã. (2 Kron. 26:​16-18) Osɔfo Nɔkɔtɔma Azaria bɔ mɔde kaa e ma dla Uzia juɛmi, se Uzia mi mi fu wawɛɛ. Aywilɛho sane ji kaa Uzia nyɛ we nɛ e ya nɔ nɛ e ye anɔkuale. Enɛ ɔ ha nɛ Yehowa gbla e tue, e ha nɛ kpiti pue lɛ. (2 Kron. 26:​19-21) Kaa Uzia ba e he si ɔ, jinɛ níhi ko yɛ nɔ jã ngɛ e si himi mi! w23.09 10 ¶9-10

Benɛ bɔfo Petro ba pee Kristofono nɛ a pɔ lɛ nu po se ɔ, loloolo ɔ, e sa nɛ e ya nɔ nɛ e hwu kɛ si e gbɔjɔmi ɔmɛ. Ngɛ jeha 36 mi ɔ, Mawu tsɔ Petro kɛ ho Kornelio nɛ e ji Ma Je No ɔ ngɔ ya. Ngɛ lejɛ ɔ, Mawu pɔ Kornelio nu kɛ mumi klɔuklɔu ɔ. Enɛ ɔ ji odase nɛ tsɔɔ heii kaa “Mawu hlɛ nɔ mi,” lɔ ɔ he ɔ, Ma Jeli po ma nyɛ ma ba pee Kristofohi. (Níts. 10:​34, 44, 45) Enɛ ɔ se ɔ, Petro kɛ Ma Je Li ɔmɛ bɔni ní yemi faa. Enɛ ɔ ji nɔ́ ko nɛ be ko nɛ be ɔ, Petro ko pee we gblee. Se Yudabi komɛ nɛ a ji Kristofohi ɔ nu he kaa e sɛ nɛ Yudabi ɔmɛ kɛ Ma Jeli ɔmɛ nɛ a bla kɛ ye ní. Lɔ ɔ he ɔ, benɛ ni komɛ nɛ a hɛɛ susumi nɛ ɔ ba Antiokia a, Petro kɛ nyɛmimɛ ɔmɛ nɛ a ji Ma JeLi ɔmɛ kpa ní yemi. E ngɛ heii kaa Petro pee jã ejakaa e ye gbeye kaa e ma tɔ̃ Yudabi nɛ a ji Kristofohi ɔ a nɔ. Bɔfo Paulo na osato nɛ Petro ngɛ pee ɔ, nɛ e kã e hɛ mi ngɛ nihi a hɛ mi. (Gal. 2:​13, 14) Ngɛ Petro gbɔjɔmi nɛ ɔ tsuo se ɔ, e ya nɔ nɛ e ye anɔkuale. w23.09 22 ¶8

Ke o kɛ anɔkuale yemi kpa o mi nɛ o na kaa e he hia nɛ o pee tsakemi ɔ, o kɔni mi nɛ ko jɔ̃. Mo kai kaa wa “Nyɔmtsɛ ɔ mi mi jɔ,” lɔ ɔ he ɔ, e maa ye bua mo konɛ o ya o hɛ mi. (1 Pet. 2:3) Bɔfo Petro de ke: ‘Mawu nitsɛ maa gbe nyɛ tsɔsemi ɔ nya. E maa waje nyɛ, e ma ha nɛ nyɛ he maa wa, e ma ha nɛ nyɛ maa pi si wawɛɛ.’ Petro nitsɛ nu he hyɛ kaa e sɛ kaa e hiɔ Mawu Bi ɔ kasa nya. (Luka 5:8) Se akɛnɛ Yehowa kɛ Yesu je suɔmi mi kɛ ye bua Petro he je ɔ, e nyɛ nɛ e ye Kristo anɔkuale kɛ pi si. Si kake ekohu ɔ, a ha Petro he blɔ konɛ e “sɛ wa Nyɔmtsɛ kɛ Yi Wami Helɔ Yesu Kristo neneene Matsɛ Yemi ɔ mi.” (2 Pet. 1:11) Enɛ ɔ ji jɔɔmi nɛ se be! Ke o ya nɔ nɛ o ye anɔkuale kaa bɔ nɛ Petro pee ɔ, nɛ o ha nɛ Yehowa tsɔse mo ɔ, mo hu o ma ná neneene wami. O maa ‘su o hemi kɛ yemi ɔ he oti ɔ nɛ ji o yi wami hemi ɔ he.’—1 Pet. 1:9. w23.09 31 ¶16-17

Ngɛ blema a, yale kake pɛ lɛ ngɛ kpe he bo tsu ɔ mi. Yale ɔ ji he ko nɛ e kle nɛ a po piɛ kɛ bɔle lɛ, nɛ osɔfo ɔmɛ tsuɔ a ní tsumi ɔmɛ ngɛ lejɛ ɔ. Akɔblee la tɛ ngua a nɛ a sãa sami afɔle ngɛ nɔ, kɛ akɔblee kã nɛ nyu ngɛ mi nɛ osɔfo ɔmɛ kɛ fɔɔ a dɛ kɛ a nane he loko a tsuɔ ní tsumi nɛ ngɛ klɔuklɔu ɔ ngɛ yale ɔ mi. (2 Mose 30:​17-20; 40:​6-8) Mwɔnɛ ɔ, nihi nɛ a pɔ mɛ nu nɛ a piɛ ngɛ zugba a nɔ ɔ kɛ anɔkuale yemi ngɛ Yehowa sɔmɔe ngɛ yale nɛ ngɛ mumi mi sɔlemi we ɔ mi ɔ. Kã ngua a nɛ nyu ngɛ mi ngɛ kpe he bo tsu ɔ he ɔ kaiɔ osɔfo ɔmɛ kaa e sa nɛ a he nɛ tsɔ, nɛ jã nɔuu nɛ e sa nɛ Kristofohi tsuo hu a he nɛ tsɔ ngɛ he lo mi kɛ mumi mi tsuo. Ke jã a, lɛɛ jije nɛ “asafo kuu ngua” a sɔmɔɔ Yehowa ngɛ? Bɔfo Yohane na mɛ nɛ a “daa si ngɛ matsɛ sɛ ɔ” hɛ mi, nɛ ji sɔlemi we ɔ yale nɛ ngɛ kpo ɔ nɔ ɔ mi, “nɛ a ngɛ [Mawu] sɔmɔe ngɛ blɔ nɛ ngɛ klɔuu nɔ nyɔ kɛ pia ngɛ e sɔlemi we ɔ.” (Kpoj. 7:​9, 13-15) Wa bua jɔ wawɛɛ kaa Yehowa ha wɔ he blɔ ngua nɛ ɔ kaa wa sɔmɔ lɛ ngɛ anɔkuale mi ngɛ e mumi mi sɔlemi we ngua a mi! w23.10 28 ¶15-16

Yehowa guɔ asafo mi nikɔtɔma amɛ hu a nɔ kɛ woɔ wɔ he wami. A ji nike ní nɛ Yehowa kɛ ha wɔ, nɛ e guɔ a nɔ kɛ yeɔ bua wɔ nɛ wa nɔ gbagba teɔ. (Yes. 32:​1, 2) Lɔ ɔ he ɔ, ke o pee gbedee ɔ, mo de asafo mi nikɔtɔma amɛ o nyagba a, nɛ ke a ha mo yemi kɛ buami ɔ, moo je o tsui mi nɛ o kplɛɛ nɔ. Yehowa maa gu a nɔ kɛ wo mo he wami konɛ o he nɛ wa ngɛ mumi mi. Ni komɛ ngɛ hɛ nɔ kami kaa a maa hi si ngɛ paradeiso ɔ mi ngɛ zugba a nɔ kɛ ya neneene, nɛ ni komɛ hu ngɛ hɛ nɔ kami kaa a maa ya hiɔwe. Hɛ kɛ nɔ fɔmi nɛ wa ngɛ ɔ hu woɔ wɔ he wami wawɛɛ. (Rom. 4:​3, 18, 19) E haa nɛ wa fĩɔ si ngɛ kahi a mi, wa fiɛɛɔ sane kpakpa a, nɛ wa tsuɔ ní tsumi slɔɔtohi ngɛ asafo ɔ mi. (1 Tɛs. 1:3) Jamɛ a hɛ kɛ nɔ fɔmi ɔ nɔuu lɛ wo bɔfo Paulo he wami ɔ nɛ. Ngɛ Paulo si himi mi tsuo ɔ, ‘e he fiɔ lɛ, e juɛmi gbɛɔ, a waa lɛ yi mi, nɛ a fiaa lɛ si.’ Be komɛ po ɔ, e wami ya jeɔ oslaa mi. (2 Kor. 4:​8-10) Paulo nyɛ nɛ e fĩ si ejakaa e ngɔ e juɛmi kɛ ma hɛ kɛ fɔ nɛ e ngɛ ɔ nɔ. (2 Kor. 4: 16-18) Paulo ngɔ e juɛmi kɛ ma hɛ kɛ nɔ fɔmi nɛ e ngɛ kaa e ma ná neneene wami ngɛ hiɔwe ɔ nɔ, nɛ e pue e yi mi tɛ ngɛ jamɛ a hɛ kɛ nɔ fɔmi ɔ he. Enɛ ɔ he ɔ, e nu he kaa ‘e pee ehe daa ligbi.’ w23.10 15-16 ¶14-17

Ke o ngɛ sɔlee ɔ, mo bi o he ke, anɛ be nɛ Yehowa to kaa e ma tsu ye ní bimi ɔmɛ a he ní ɔ ji nɛ ɔ lo? Ke wa sɔle ɔ, wa ma nyɛ maa nu he kaa e sa nɛ a ha wa sɔlemi ɔmɛ a heto oya nɔuu. Se ngɛ anɔkuale mi ɔ, Yehowa le be nɛ e sa kaa e ye bua wɔ. (Heb. 4:16) Ke wa nine sui nɔ́ nɛ wa sɔle ngɛ he ɔ nɔ amlɔ nɔuu ɔ, eko ɔ, wa ma susu kaa Yehowa sume nɛ e ha wɔ heto. Se e ma nyɛ maa ba kaa Yehowa be wɔ heto hae amlɔ nɔuu. Kaa hyɛmi nɔ́ ɔ, nyɛminyumu wayoo ko be he wami nɛ e sɔle kaa Yehowa nɛ ha nɛ e ná he wami. Se e hiɔ ɔ jɔɛ. Kaa Yehowa gu nyakpɛ blɔ nɔ kɛ tsa lɛ ɔ, jinɛ Satan ma nyɛ ma de ke akɛnɛ Yehowa tsa nyɛminyumu ɔ he je nɛ e ngɛ lɛ sɔmɔe ngɛ anɔkuale mi ɔ nɛ. (Hiob 1:​9-11; 2:4) Jehanɛ hu ɔ, Yehowa to be nɛ e kɛ ma je hiɔ kɛ je kulaa. (Yes. 33:24; Kpoj. 21:​3, 4) Kɛ ya si benɛ jamɛ a be ɔ maa su ɔ, wa be nyɛe maa hyɛ blɔ kaa Yehowa maa gu nyakpɛ blɔ nɔ kɛ tsa wɔ. Enɛ ɔ he ɔ, nyɛminyumu ɔ ko nyɛ ko bi Yehowa kaa e ha lɛ he wami kɛ tue mi jɔmi konɛ e nyɛ nɛ e ya nɔ nɛ e fĩ si nɛ e sɔmɔ Yehowa ngɛ anɔkuale mi. w23.11 24 ¶13

E ngɛ mi kaa Samson tɔ̃ tɔmi nɛ hɛdɔ ngɛ he mohu lɛɛ, se e kɔni mi jɔ̃ we. Samson le kaa Yehowa suɔ nɛ e kpata Filistibi ɔmɛ a hɛ mi, lɔ ɔ he ɔ, e hla blɔhi a nɔ nɛ e maa gu kɛ pee jã. (Many. 16:​28-30) Samson kpa Yehowa pɛɛ nɛ e de lɛ ke: ‘Ha nɛ ma ye ye he lue ngɛ Filistibi ɔmɛ a nɔ.’ Yehowa nɛ e ji anɔkuale Mawu ɔ ha Samson sɔlemi ɔ heto nɛ e ha lɛ e he wami ɔ ekohu. Enɛ ɔ he ɔ, Samson gbe Filistibi nɛ a he hyɛ wawɛɛ nitsɛ pe nihi nɛ e gbe kɛ be ɔ po. E ngɛ mi kaa Samson na nɔ́ nɛ e pee ɔ mi nɔ́ mohu lɛɛ, se e bɔ mɔde kaa e maa ya nɔ maa pee Yehowa suɔmi nya ní. Ke wa tɔ̃ tɔmi ko nɛ a kã wa hɛ mi loo he blɔ ko nɛ wa ngɛ ɔ je wa dɛ ɔ, e sɛ nɛ wa kɔni mi nɛ jɔ̃. E sa nɛ wa kai kaa Yehowa pee klaalo kaa e kɛ wa tɔmi ɔ maa ke wɔ. (La 103:​8, 9) E ngɛ mi kaa wa tɔ̃ɔ mohu lɛɛ, se Yehowa ma nyɛ maa wo wɔ he wami konɛ waa pee e suɔmi nya ní kaa bɔ nɛ e pee ha Samson ɔ. w23.09 6 ¶15-16

Ke o fĩ si ɔ, e haa nɛ Yehowa bua jɔɔ o he. Se enɛ ɔ tsɔɔ we kaa Yehowa suɔ nɛ wa hi nɔ́ nae. Mohu ɔ, e bua jɔɔ o he akɛnɛ o kɛ anɔkuale yemi ngɛ si fĩe ɔ he je. Ngɛ anɔkuale mi ɔ, ke wa fĩ si ɔ, e haa nɛ Yehowa bua jɔɔ! (La 5:12) Mo kai kaa benɛ Abraham fĩ si ngɛ kahi nɛ e kɛ kpe ɔmɛ a mi ɔ, Yehowa bua jɔ e he wawɛɛ. Enɛ ɔ ha nɛ Yehowa bu lɛ dalɔ, nɛ e ba pee e huɛ. (1 Mose 15:6; Rom. 4:​13, 22) E ma nyɛ maa ba jã ngɛ wɔ hu wa blɔ fa mi. Pi sɔmɔmi he blɔ nɛ wa ngɛ loo ní tsumi abɔ nɛ wa tsuɔ ngɛ Mawu jami mi ɔ nɛ e haa nɛ Yehowa kplɛɛɔ wa nɔ. Mohu ɔ, e kplɛɛɔ wa nɔ akɛnɛ waa kɛ anɔkuale yemi fĩɔ si ngɛ kahi a mi ɔ he je. Enɛ ɔ he ɔ, wa wa jio, wa wɛ jio, bɔ fɛɛ bɔ nɛ wa si fɔfɔɛ ma ji ɔ, wɔ hu wa ma nyɛ ma fĩ si. Anɛ o ngɛ si fĩe ngɛ ka ko mi amlɔ nɛ ɔ lo? Ke jã a, mo kai kaa o ha nɛ Yehowa bua jɔɔ. Ke wa le kaa Yehowa kplɛɛ wa nɔ ɔ, e ma ha nɛ hɛ kɛ nɔ fɔmi nɛ wa ngɛ ɔ mi maa wa wawɛɛ. w23.12 11 ¶13-14

E sa nɛ nyumu nɛ e ji Kristofono ɔ nɛ e le bɔ nɛ a kɛ nihi sɛɛɔ ní ha saminya. Enɛ ɔ tsɔɔ kaa ke e kɛ nihi ngɛ ní sɛɛe ɔ, e sa nɛ e bu mɛ tue nɛ e le bɔ nɛ a ngɛ he nue ha. (Abɛ 20:5) Ke e kɛ nɔ ko ngɛ munyu tue ɔ, e ma nyɛ maa bɔ mɔde nɛ e yɔse nɔ ɔ gbi tso kɛ bɔ nɛ nɔ ɔ pee e hɛ mi ha kɛ e ní peepee. Ja o náa be nɛ o kɛ nihi sɛɛɔ ní loko o ma nyɛ maa pee ní nɛ ɔmɛ. Ke o pɔɔ nihi sɛ gbi manemi ngɛ fon nɔ ɔ, lɔ ɔ be hae nɛ o le bɔ nɛ a kɛ nihi sɛɛɔ ní ha hɛ mi kɛ hɛ mi. Enɛ ɔ he ɔ, moo bɔ mɔde kaa o kɛ nihi maa sɛɛ ní hɛ mi kɛ hɛ mi. (2 Yoh. 12) Jehanɛ hu ɔ, e sa nɛ nyumu nɛ e ji Kristofono nɛ e nane pi si ɔ nɛ e tsu ní konɛ e nyɛ nɛ e hyɛ lɛ nitsɛ e he kɛ weku ɔ. (1 Tim. 5:8) E hi kaa o maa kase nine nya ní tsumi nɛ maa ye bua mo hwɔɔ se konɛ o ná ní tsumi nɛ o tsu. (Níts. 18:​2, 3; 20:34; Efe. 4:28) Ke o ngɛ nɔ́ ko he ní tsue ɔ, moo bɔ mɔde wawɛɛ kaa o maa gbe nya. Ke o pee jã a, ni kpahi ma yɔse, nɛ a bua maa jɔ o ní tsumi he wawɛɛ, nɛ e he be wae kaa o ma ná ní tsumi hulɔ. w23.12 27 ¶12-13

Ke Baiblo ɔ tu “Yehowa ligbi ɔ” he munyu ɔ, e tsɔɔ be nɛ Yehowa maa kojo e he nyɛli ɔmɛ, nɛ e ma he e we bi a yi wami. Ngɛ blema a, Yehowa gbla ma komɛ a tue. (Yes. 13:​1, 6; Eze. 13:5; Zef. 1:8) Ngɛ wa be nɛ ɔ mi ɔ, “Yehowa ligbi ɔ” maa je sisi ke a tua Babilon Ngua a, nɛ e maa ba nyagbe ngɛ Harmagedon ta a mi. Loko wa yi ma ná wami ngɛ jamɛ a “ligbi ɔ” nɔ ɔ, e sa nɛ wa dla wa he kɛ to amlɔ nɛ ɔ. Yesu tsɔɔ kaa e sa nɛ waa pee klaalo kɛ ha “amanehlu ngua” a. (Mat. 24:21; Luka 12:40) Ngɛ kekleekle sɛ womi nɛ bɔfo Paulo ngma kɛ ya ha Tɛsalonika bi ɔmɛ ɔ mi ɔ, e ngɔ nɔ́ he tomi níhi fuu kɛ tsu ní konɛ e kɛ ye bua Kristofo ɔmɛ nɛ a pee klaalo kɛ ha Yehowa kojomi ligbi ngua a. Paulo le kaa Yehowa ligbi ɔ be bae nɔuu ngɛ jamɛ a be ɔ mi. (2 Tɛs. 2:​1-3) Se loloolo ɔ, e wo nyɛmimɛ ɔmɛ he wami kaa a dla a he kɛ ha jamɛ a ligbi ɔ kaa nɔ́ nɛ e nɔ jena pɛ nɛ e maa ba. Wɔ hu wa ma nyɛ maa ngɔ ga womi nɛ ɔ kɛ tsu ní. w23.06 8 ¶1-2

Ngɛ jeha 1978 ɔ mi ɔ, a ma tsu gagaaga ko ngɛ Tokyo ngɛ Japan. Nihi babauu bi a he ke ji zugba mimiɛmi nɛ pɔɔ bami ngɛ jamɛ a ma a mi ɔ be tsu nɛ ɔ hulee kɛ pue si lo. Mɛni nɛ tsu mali ɔmɛ pee konɛ ke zugba mimiɛɛ ɔ, tsu ɔ nɛ ko hule? Bɔ nɛ tsu mali ɔmɛ ma tsu nɛ ɔ ha he je ɔ, e ngɛ he wami wawɛɛ. Se pi lɔ ɔ pɛ, a ma tsu ɔ ngɛ blɔ ko nɔ konɛ ke zugba mimiɛɛ po ɔ, e ko hule. Kristofohi tsuo ngɛ kaa jamɛ a tsu gagaaga a. Ngɛ mɛni blɔ nɔ? E ngɛ mi kaa e he hia nɛ Kristofohi nɛ a da si kpɛii nɛ a fĩ si mohu lɛɛ, se kɛ̃ ɔ, e sa nɛ a ná juɛmi nɛ da, nɛ a ko pee kpɛii. E sa nɛ a he nɛ wa ngɛ mumi mi, nɛ a fia a pɛɛ si kaa a maa bu Yehowa mlaa amɛ kɛ e blɔ tsɔɔmihi tue be fɛɛ be. E sa nɛ Kristofo no nɛ e “pee klaalo kaa e maa bu tue” mohu pe nɛ e maa kplɛɛ níhi nɛ a kɛ Yehowa suɔmi nya ní kɔ we ɔ a nɔ. Se be komɛ hu ɔ, ke si fɔfɔɛ ko ba nɛ e he hia nɛ e pee e he nɔ nɛ “nuɔ nɔ́ sisi” ɔ, e sa nɛ e pee jã. (Yak. 3:17) Ke Kristofo no ko bɔ mɔde nɛ e ná juɛmi nɛ da a, e maa ye bua lɛ konɛ e ko pee e he nɔ ko nɛ e sane he wa loo nɔ nɛ kplɛɛɔ nɔ́ fɛɛ nɔ́ nɔ kɛkɛ. w23.07 14 ¶1-2

Satan Abosiami ka Yesu nɛ e de lɛ tɛɛ po kaa e kpa Mawu anɔkuale yemi, se Yesu pee we jã. (Mat. 4:​1-11) Satan pee nɔ́ fɛɛ nɔ́ nɛ e ma nyɛ kaa e ma ha nɛ Yesu nɛ pee yayami konɛ e ko nyɛ nɛ e wo kpɔmi nɔ́ ɔ. Benɛ Yesu ngɛ e sɔmɔmi ní tsumi ɔ tsue ngɛ zugba a nɔ ɔ, e da ka kpahi hu a nya. Nihi wa lɛ yi mi nɛ a bɔ mɔde kaa a maa gbe lɛ po. (Luka 4:​28, 29; 13:31) E biɔ nɛ e to e tsui si kɛ ha e se nyɛɛli nɛ a yi mluku ɔ be fɛɛ be. (Maak. 9:​33, 34) Benɛ a ngɛ e sane yee loko a maa gbe lɛ ɔ, a kongo lɛ nɛ a ye e he fɛu. Lɔ ɔ se ɔ, a gbe lɛ kaa bɔ nɛ a gbeɔ julɔ ɔ, nɛ e na nɔ́ wawɛɛ. (Heb. 12:​1-3) E he ba hia nɛ e da nyagbe ka nɛ e kɛ kpe ngɛ zugba a nɔ ɔ nya ngɛ e dɛ he. Yehowa pui e he piɛ ngɛ jamɛ a ka a mi. (Mat. 27:46) E ngɛ heii kaa Yesu na nɔ́ wawɛɛ loko e wo kpɔmi nɔ́ ɔ. Ke wa pue wa yi mi tɛ ngɛ bɔ nɛ Yesu je suɔmi mi nɛ e ngɔ e wami kɛ sã afɔle ngɛ wa he ha a he ɔ, anɛ lɔ ɔ ha we nɛ wa ná suɔmi nɛ mi wa kɛ ha lɛ lo? w24.01 10-11 ¶7-9

Wa hia tsui si tomi bɔ nɛ pee nɛ wa nyɛ nɛ waa kɛ ni kpahi nɛ hi si saminya. E yeɔ buaa wɔ nɛ wa buɔ tue saminya ke ni kpahi ngɛ munyu tue. (Yak. 1:19) Jehanɛ hu ɔ, tsui si tomi haa nɛ waa kɛ nihi hiɔ si ngɛ tue mi jɔmi mi. E yeɔ buaa wɔ nɛ ke wa hao po ɔ, wa pee we nɔ́ ko loo wa de we nɔ́ ko nɛ ma ha nɛ wa pia wa he pee se. Ke nɔ ko pee wɔ nɔ́ dɔ nɔ́ ko po ɔ, tsui si tomi maa ye bua wɔ nɛ wa mi mi nɛ ko fu mla. E be hae nɛ waa pee nɔ́ ko kɛ to nane mi, mohu ɔ, e maa ye bua wɔ nɛ ‘wa maa ya nɔ ma ná wa sibi a he tsui nɛ wa maa ngɔ kɛ pa wa sibi faa.’ (Kol. 3:​12, 13) Jehanɛ hu ɔ, ke wa toɔ wa tsui si ɔ, e maa ye bua wɔ nɛ waa mwɔ yi mi kpɔhi nɛ da. Nɔ nɛ toɔ e tsui si ɔ kɛ oya yemi tsu we níhi a he ní, mohu ɔ, e susuɔ níhi a he saminya nɛ e ngɔɔ be kɛ hlaa níhi a mi konɛ e mwɔ yi mi kpɔhi nɛ da. Kaa nɔ hyɛmi nɔ́ ɔ, eko ɔ, ke wa ngɛ ní tsumi hlae ɔ, wa maa suɔ nɛ waa kplɛɛ eko fɛɛ eko nɛ wa nine maa su nɔ kekle ɔ nɔ. Se ke wa toɔ wa tsui si ɔ, wa maa ngɔ be kɛ susu bɔ nɛ jamɛ a ní tsumi ɔ ma nyɛ maa sa wa weku ɔ kɛ huɛ bɔmi nɛ ngɛ waa kɛ Yehowa wa kpɛti ha a he. Ke wa toɔ wa tsui si ɔ, e ma nyɛ maa ye bua wɔ nɛ waa mwɔ yi mi kpɔ nɛ da. w23.08 22 ¶8-9

Ke o kɔni mi jɔ̃ akɛnɛ e he wa kaa o maa hwu kɛ si akɔnɔ yayahi ɔ, mo susu si nɛ o wo Yehowa benɛ o jɔɔ o he nɔ kɛ ha lɛ ɔ he. Enɛ ɔ maa wo mo he wami konɛ o ya nɔ nɛ o da kahi nɛ o kɛ maa kpe ɔ nya. Ngɛ mɛni blɔ nɔ? Ke o jɔɔ o he nɔ kɛ ha Yehowa a, lɔ ɔ tsɔɔ kaa o kua o he. Enɛ ɔ tsɔɔ kaa o hla kaa o ma kua níhi nɛ mo nitsɛ o suɔ kɛ otihi nɛ o bua jɔ a he ɔ konɛ o sa Yehowa hɛ mi. (Mat. 16:24) Enɛ ɔ he ɔ, ke o kɛ ka ko kpe ɔ, e he hia we nɛ o puɛ be kɛ susu nɔ́ nɛ o maa pee ɔ he, ejakaa o mwɔ o yi mi kpɔ ngɛ nɔ́ nɛ o maa pee ɔ he momo, nɛ lɔ ɔ ji kaa o maa ya nɔ maa ye Yehowa anɔkuale. E sa nɛ o ya nɔ nɛ o fia o pɛɛ si kaa o maa sa Yehowa hɛ mi. E sa nɛ o pee o ní kaa Hiob. E ngɛ mi kaa e kɛ haomihi nɛ mi wa wawɛɛ kpe mohu lɛɛ, se e de ke: “I be ye we anɔkuale yemi ɔ he ngmɛɛe!”—Hiob 27:5. w24.03 9 ¶6-7

Yehowa nɛ ji ‘Mawu nɛ ngɛ suɔmi ɔ’ piɛɛ wa he! (2 Kor. 13:11) E susuɔ wa kpɛti nɔ fɛɛ nɔ he. Wa ngɛ nɔ mi mami kaa Yehowa ‘suɔmi nɛ se pui ɔ bɔle wɔ kɛ kpe.’ (La 32:10) Ke wa ya nɔ nɛ wa pue wa yi mi tɛ ngɛ bɔ nɛ Yehowa je suɔmi kpo kɛ tsɔɔ wɔ ha a he ɔ, wa maa na kaa e susuɔ wa he wawɛɛ, nɛ wa maa hɛ kɛ su e he wawɛɛ. Wa ma nyɛ maa sɔle ha lɛ faa nɛ wa de lɛ kaa wa hia e suɔmi ɔ wawɛɛ. Wa ma nyɛ ma de lɛ wa nyagba amɛ tsuo, nɛ́ wa ná nɔ mi mami kaa e le bɔ nɛ wa ngɛ he nue ha nɛ e pee klaalo kaa e maa ye bua wɔ. (La 145:19) Kaa bɔ nɛ ke fĩɛ ngɛ wɔ yee nɛ wa ya hlueɔ la konɛ wa he nɛ dɔ la a, jã nɔuu kɛ̃ nɛ wa hɛɔ kɛ suɔ Yehowa suɔmi ɔ he ke waa kɛ haomihi ngɛ kpee. Ngɛ anɔkuale mi ɔ, Yehowa susuɔ wa he wawɛɛ, nɛ e suɔmi ɔ se be. Enɛ ɔ he ɔ, o bua nɛ jɔ kaa Yehowa suɔ mo. Nyɛ ha nɛ wɔ tsuo wa kplɛɛ Yehowa suɔmi ɔ nɔ nɛ waa kɛ bua jɔmi nɛ de ke: “I suɔ Yehowa”!—La 116:1. w24.01 31 ¶19-20

Pi nɛ Yesu tsɔɔ nihi kaa Mawu biɛ ji Yehowa kɛkɛ. E ngɛ mi kaa Yuda bi nɛ Yesu tsɔɔ mɛ ní ɔ le Mawu biɛ ɔ momo mohu lɛɛ, se Yesu nyɛɛ hɛ mi kɛ “tsɔɔ bɔ nɛ Mawu ngɛ ha.” (Yoh. 1:​17, 18) Kaa nɔ hyɛmi nɔ́ ɔ, Hebri Ngmami ɔmɛ ha nɛ wa na kaa Yehowa ji mɔbɔ nalɔ nɛ e mi mi sãã lɛ ngɛ nihi a he. (2 Mose 34:​5-7) Yesu ha nɛ munyu nɛ ɔ pee heii benɛ e ngɔ nɔ́ he tomi nɔ́ nɛ kɔɔ bi ko bɔlɔ ɔ kɛ e tsɛ ɔ he ɔ kɛ tsu ní ɔ. Benɛ tsɛ ɔ na e bi nɛ e tsake e tsui ɔ “ngɛ blɔ nɔ tsitsaa kɛ ma a,” e ma fo nɛ e kɛ lɛ ya kpe nɛ e fua lɛ, nɛ e je e tsui mi nɛ e ngɔ e yayami ɔ kɛ ke lɛ. Nɔ́ he tomi nɔ́ nɛ ɔ tsɔɔ heii kaa Yehowa ji Tsɛ nɛ e naa nɔ mɔbɔ nɛ e mi mi sãã lɛ ngɛ adesahi a he. (Luka 15:​19, 20) Yesu ye bua ni kpahi nɛ a na bɔ nɛ e Tsɛ ɔ ngɛ ha tutuutu. w24.02 10 ¶8-9

Yehowa haa nɛ nihi nɛ a haoɔ ɔ a tsui nɔɔ a mi, nɛ e woɔ a bua. Mɛni blɔ nɔ nɛ wa ma nyɛ maa gu kɛ kase Yehowa, nɛ wa mi mi nɛ sã wɔ ngɛ nihi a he nɛ waa wo a bua? Blɔ kake nɛ wa ma nyɛ maa gu nɔ kɛ pee jã ji kaa wa ma je suhi nɛ maa ye bua wɔ konɛ wa mi mi nɛ sã wɔ ngɛ nihi a he nɛ waa wo a bua. Mɛni ji su nɛ ɔmɛ ekomɛ? Mɛni maa ye bua wɔ konɛ waa ya nɔ nɛ waa suɔ wa nyɛmimɛ ɔmɛ nɛ ‘waa ya nɔ nɛ waa hi wa sibi a bua woe’ daa ligbi? (1 Tɛs. 4:18) E he hia nɛ waa nu he kɛ ha wa nyɛmimɛ ɔmɛ, waa suɔ mɛ, nɛ wa mi mi nɛ jɔ kɛ ha mɛ. (Kol. 3:12; 1 Pet. 3:8) Ngɛ mɛni blɔ nɔ nɛ su nɛ ɔmɛ maa ye bua wɔ? Ke wa mi mi sãa wɔ ngɛ wa nyɛmimɛ ɔmɛ a he, nɛ wa jeɔ wa tsui mi kɛ susuɔ a he ɔ, lɔ ɔ maa ye bua wɔ nɛ waa wo a bua ke a ngɛ nɔ́ nae. Yesu de ke: “Nɔ́ nɛ hyi tsui ɔ tɔ ɔ, lɔ ɔ nɛ nya deɔ. Nɔmlɔ kpakpa jeɔ ní kpakpahi ngɛ juetli kpakpahi nɛ e bua nya a mi kɛ haa.” (Mat. 12:​34, 35) Nɔ́ kake nɛ he hia nɛ wa ma nyɛ maa pee kɛ tsɔɔ kaa wa suɔ wa nyɛmimɛ nɛ a hia yemi kɛ buami ɔ ji kaa wa maa wo a bua. w23.11 10 ¶10-11

Loko wa ma nyɛ maa nu Baiblo gbamihi a sisi ɔ, ja wa bi yemi kɛ buami. Mo susu nɔ́ he tomi nɔ́ nɛ ɔ he nɛ o hyɛ. Ngɔɔ lɛ kaa o yaa he ko nɛ o li lejɛ ɔ, se o huɛ ko nɛ e kɛ mo ngɛ blɔ ɔ hiae ɔ le he nɛ nyɛ yaa a saminya. E le he tutuutu nɛ nyɛ su, nɛ e le he nɛ blɔ ɔmɛ eko fɛɛ eko kɛ nyɛ maa ya. E ngɛ heii kaa o bua maa jɔ wawɛɛ kaa o huɛ ɔ kplɛɛ nɔ nɛ e kɛ mo hia blɔ nɛ ɔ! Ngɛ anɔkuale mi ɔ, Yehowa ngɛ kaa jamɛ a huɛ ɔ. Yehowa le he nɛ wa su ngɛ je nɛ ɔ mi, kɛ nɔ́ nɛ maa ba hwɔɔ se ɔ saminya. Enɛ ɔ he ɔ, loko wa ma nyɛ maa nu Baiblo gbami ko sisi ɔ, e sa nɛ waa je he si bami mi nɛ wa bi Yehowa nɛ e ye bua wɔ. (Dan. 2:28; 2 Pet. 1:​19, 20) Fɔlɔ fɛɛ fɔlɔ nɛ e suɔ e bimɛ ɔ suɔ nɛ e hi ha mɛ hwɔɔ se. Jã kɛ̃ nɛ Yehowa hu suɔ nɛ e bimɛ nɛ a ná si himi kpakpa hwɔɔ se. (Yer. 29:11) Se Yehowa be kaa adesahi, ejakaa e ma nyɛ maa tsɔɔ wɔ nɔ́ nɛ maa ba hwɔɔ se, nɛ e maa ba mi jã pɛpɛɛpɛ. E ha nɛ a ngma gbamihi kɛ wo e Munyu ɔ mi bɔ nɛ pee nɛ waa le ní komɛ nɛ a he hia nɛ maa ba hwɔɔ se loko a ba.—Yes. 46:10. w23.08 8 ¶3-4