July

E ngɛ heii kaa níhi tsuo nɛ Yesu de, kɛ níhi nɛ e pee, nɛ́ nyakpɛ níhi hu piɛɛ he ɔ, haa nɛ wa naa e Tsɛ ɔ susumi kɛ bɔ nɛ e nuɔ he ha ngɛ níhi a he. (Yoh. 14:9) Mɛni wa ma nyɛ maa kase ngɛ Yesu nyakpɛ ní ɔmɛ a mi? Yesu kɛ e Tsɛ ɔ suɔ wɔ wawɛɛ. Benɛ Yesu ngɛ zugba a nɔ ɔ, e ngɔ he wami nɛ e ngɛ ɔ kɛ ye bua nihi nɛ a ngɛ nɔ́ nae ɔ kɛ tsɔɔ kaa e suɔ mɛ saminya. Ligbi ko ɔ, nyumu enyɔ komɛ nɛ a hɛngmɛ yu ɔ kpa Yesu pɛɛ kaa e ye bua mɛ. (Mat. 20:​30-34) Mo kadi kaa “a he pee Yesu mɔbɔ” nɛ e tsa mɛ. Hela peemimunyu nɛ a tsɔɔ sisi ke “a he pee Yesu mɔbɔ” ɔ ma nyɛ maa tsɔɔ bɔ nɛ e mi mi sã lɛ wawɛɛ ngɛ e mi ha. Jamɛ a mi mi sami ɔ tsɔɔ kaa e ngɛ suɔmi, nɛ lɔ ɔ nɛ ha nɛ e lɛ nihi nɛ hwɔ ngɛ mɛ yee, nɛ e tsa kpititsɛ ɔ nɛ. (Mat. 15:32; Maak. 1:41) Enɛ ɔ he ɔ, wa ma nyɛ ma ná nɔ mi mami kaa Yehowa nɛ ji Mawu nɛ e ‘mi mi sãa’ lɛ ɔ kɛ e Bi ɔ suɔ wɔ wawɛɛ, nɛ ke wa ngɛ nɔ́ nae ɔ, e dɔɔ mɛ. (Luka 1:78; 1 Pet. 5:7) A suɔ wawɛɛ kaa a ma je haomihi tsuo nɛ adesahi kɛ ngɛ kpee ɔ kɛ je. w23.04 3 ¶4-5

Wa ma nyɛ maa pee ní komɛ nɛ maa ye bua wɔ konɛ wa ko ná susumi nɛ dɛ nɛ nihi nɛ a ngɛ Satan je nɛ ɔ mi ɔ hɛɛ ɔ. Ke wa kaneɔ Baiblo ɔ, lɔ ɔ ma ha nɛ wa ma ná susumi nɛ da. Jehanɛ hu ɔ, ke wa yaa asafo mi kpe kɛ fiɛɛmi be fɛɛ be ɔ, e maa po wa susumi he piɛ. Yehowa wo si kaa e be hae nɛ a ka wɔ pe bɔ nɛ wa ma nyɛ. (1 Kor. 10:​12, 13) E he hia nɛ wa ti nɔ fɛɛ nɔ nɛ sɔle wawɛɛ konɛ waa ya nɔ nɛ waa kɛ anɔkuale yemi nɛ sɔmɔ Yehowa ngɛ nyagbe be nɛ mi wa nɛ ɔ mi. Yehowa suɔ nɛ waa ‘ngɔ wa tsui mi sanehi tsuo kɛ pue e hɛ mi’ ngɛ sɔlemi mi. (La 62:8) Mo je Yehowa yi nɛ o na lɛ si ngɛ níhi tsuo nɛ e peeɔ ɔ he. Mo bi lɛ nɛ e ye bua mo nɛ o kɛ kã nɛ tsu fiɛɛmi ní tsumi ɔ. Mo bi lɛ nɛ e ye bua mo kɛ da nyagbahi nɛ o kɛ ngɛ kpee loo kahi nɛ o kɛ ma nyɛ maa kpee ɔ a nya. Enɛ ɔ he ɔ, yaa nɔ nɛ o sɔle ha Yehowa be fɛɛ be, ko ha nɛ nɔ́ ko loo nɔ ko nɛ tsi o nya. w23.05 7 ¶17-18

Mɛni he je nɛ wa yaa asafo mi kpehi? Nɔ́ titli he je nɛ wa yaa asafo mi kpehi ji kaa wa suɔ nɛ wa je Yehowa yi. (La 26:12; 111:1) Jehanɛ hu ɔ, wa yaa asafo mi kpehi bɔ nɛ pee nɛ waa wo wa nyɛmimɛ ɔmɛ he wami ngɛ haomi be nɛ ɔmɛ a mi. (1 Tɛs. 5:11) Ke wa wo wa nine nɔ nɛ wa ha sane heto ɔ, lɔ ɔ tsɔɔ kaa wa ngɛ ní enyɔ nɛ ɔmɛ pee. Se ní komɛ ngɛ nɛ ma ha nɛ e he nɛ wa ha wɔ kaa wa ma ha sane heto. Eko ɔ, wa maa ye gbeye kaa wa ma ha sane heto, loo wa suɔ nɛ wa ha sane heto si abɔ, se be komɛ ɔ, ke wa wo wa nine nɔ ɔ, a tsɛ we wɔ. Mɛni maa ye bua wɔ konɛ wa nyɛ nɛ waa da nyagba nɛ ɔmɛ a nya? Bɔfo Paulo tsɔɔ kaa e sa nɛ waa ngɔ wa juɛmi kɛ ma ‘wa sibi he wami nɛ wa maa wo ɔ nɔ.’ Ke wa yɔse kaa heto kpiti nɛ wa ma ha a ma nyɛ maa wo ni kpahi he wami ɔ, lɔ ɔ ma ha nɛ e be yee ha wɔ kaa wa ma ha sane heto. Ke wa woɔ wa nine nɔ, se pi be fɛɛ be nɛ a tsɛɔ wɔ po ɔ, e sa nɛ wa bua nɛ jɔ kaa ni kpahi nɛ a ngɛ asafo ɔ mi ɔ hu ma ná he blɔ kɛ ha sane heto.—1 Pet. 3:8. w23.04 20 ¶1-3

Matsɛ ɔ fia adafi ko! Yudabi nɛ a ye nyɔguɛ maa pee jeha 70 ngɛ Babilon ɔ ye a he, nɛ a ma nyɛ maa kpale kɛ ho Israel ya. (Ezra 1:​2-4) E ngɛ heii kaa Yehowa lɛ ha nɛ a ye a he. Ngɛ anɔkuale mi ɔ, Babilonbi pɔɛ nihi nɛ a nuu mɛ nyɔguɛ ɔ a he ngmɛɛmi. (Yes. 14:​4, 17) Se a ye Babilon nɔ kunimi, nɛ nɔ yelɔ ehe ɔ de Yuda bi ɔmɛ ke a ma nyɛ maa je. E ma bi nɛ Yudabi ɔmɛ tsuo titli ɔ, weku yihi nɛ a mwɔ yi mi kpɔ ko. E sa nɛ a mwɔ a yi mi kpɔ kaa a maa je Babilon aloo a be jee. Eko ɔ, e he ma nyɛ maa wa ha mɛ kaa a maa mwɔ yi mi kpɔ nɛ ɔ. Eko ɔ, a kpɛti nihi fuu wa ngɛ jeha mi, nɛ e he ma nyɛ maa wa ha mɛ kaa a maa hia blɔ gagaa nɛ ɔ. Jehanɛ hu ɔ, akɛnɛ a fɔ a kpɛti nihi fuu ngɛ Babilon he je ɔ, e peeɔ mɛ kaa Babilon ji a ma. A naa Israel zugba a kaa a nɛmɛ a nɔ́. Eko ɔ, Yuda bi ɔmɛ a ti nihi fuu ba pee niatsɛmɛ ngɛ Babilon. Enɛ ɔ he ɔ, e he ma nyɛ maa wa ha mɛ kaa a maa je si himi nɛ ngɛ gbɔjɔɔ nɛ ɔ mi, loo ní tsumihi nɛ a ngɛ tsue ɔ he kɛ ho Israel ya. w23.05 14 ¶1-2

Mawu Munyu ɔ woɔ wɔ he wami kaa wa fĩ si, nɛ wa mi mi nɛ sã wɔ ngɛ nihi a he, nɛ wa je suɔmi kpo be fɛɛ be. Luka 21:19 ɔ de ke: “Ke nyɛ fĩ si ɔ, nyɛ maa baa nyɛ wami yi.” Kolose Bi 3:12 ɔ de ke: “Nyɛɛ wo mi mi sami.” Nɛ 1 Tɛsalonika Bi 4:​9, 10 hu de ke: “Mawu tsɔɔ nyɛ kaa nyɛɛ suɔ nyɛ sibi. . . . Se nyɛmimɛ, wa ngɛ nyɛ he wami woe kaa nyɛɛ ya nɔ nɛ nyɛɛ pee babauu pe jã.” Benɛ a ngma munyu nɛ ɔ kɛ ya ha kaseli ɔmɛ ɔ, jamɛ a be ɔ mi ɔ, a ngɛ si fĩe momo ngɛ haomihi a mi, nɛ a ngɛ mi mi sami kɛ suɔmi kpo jee hulɔ. Se kɛ̃ ɔ, e ma bi nɛ a ya nɔ nɛ a je su nɛ ɔmɛ kpo. E sa nɛ wɔ hu waa pee jã nɔuu. Enɛ ɔ he ɔ, mo susu bɔ nɛ Kristofohi nɛ a hi si ngɛ kaseli ɔmɛ a be ɔ mi ɔ je su nɛ ɔmɛ kpo ha a he, nɛ o hyɛ bɔ nɛ o ma plɛ kɛ kase nɔ hyɛmi nɔ́ nɛ kaseli ɔmɛ pee ɔ, kɛ bɔ nɛ lɔ ɔ maa ye bua mo ha konɛ o dla o he kɛ ha amanehlu ngua a. Kɛkɛ ke amanehlu ngua a je sisi ɔ, o ma nyɛ ma fĩ si, ejakaa o kase bɔ nɛ a fĩɔ si ngɛ kahi a mi ha momo. w23.07 3 ¶4, 8

Wa piɛɛ nihi nɛ a pɔ mɛ nu ɔ a he jio, wa piɛɛ ‘jijɔ kpa amɛ’ a he jio, e sa nɛ wɔ tsuo waa ya nɔ nɛ waa nyɛɛ “Blɔ klɔuklɔu” ɔ nɔ. Ke wa pee jã a, e maa ye bua wɔ nɛ wa sɔmɔ Yehowa amlɔ nɛ ɔ, kɛ hwɔɔ se be mi nɛ Mawu Matsɛ Yemi ɔ maa ngɔ jɔɔmi babauu kɛ ba a. (Yoh. 10:16) Kɛ je jeha 1919 ɔ, nyumuhi, yihi kɛ jokuɛwi ayɔhi abɔ je lakpa jamihi tsuo nɛ ji Babilon Ngua a mi nɛ a ba ngɛ okadi peemi blɔ ɔ nɔ nyɛɛe. Yehowa jé blɔ tsimi níhi tsuo nɛ ngɛ blɔ ɔ nɔ ɔ kɛ ha Yuda bi nɛ a je Babilon ɔ. (Yes. 57:14) Nɛ blɔ “Blɔ klɔuklɔu” ɔ nɛ wa ngɛ nɔ nyɛɛe mwɔnɛ ɔ hu nɛɛ? Jeha lafahi abɔ nɛ be loko e maa su jeha 1919 ɔ, Yehowa gu nyumu komɛ nɛ a ngɛ bumi kɛ ha lɛ ɔ a nɔ kɛ dla blɔ nɛ ɔ nɔ konɛ nihi nɛ a nyɛ nɛ a je Babilon Ngua a mi. (Kɛ to Yesaya 40:3 ɔ he.) A tsu ní tsumihi nɛ he hia wawɛɛ konɛ pee se ɔ, nihi nɛ a ngɛ tsui kpakpa a nɛ a nyɛ nɛ a je lakpa jamihi a mi, nɛ a ba piɛɛ Yehowa we bi a he kɛ sɔmɔ lɛ ngɛ mumi mi paradeiso ɔ mi. w23.05 15-16 ¶8-9

Yehowa suɔ nɛ waa je wa tsui mi nɛ waa kɛ bua jɔmi nɛ sɔmɔ lɛ. (2 Kor. 9:7) Lɔ ɔ ke wa nu he kaa wa be nyɛe maa su oti ko nɛ waa kɛ ma wa hɛ mi ɔ he ɔ, anɛ e he hia nɛ wa tsu he ní kɛ̃ lo? Mo susu bɔfo Paulo nɔ hyɛmi nɔ́ ɔ he nɛ o hyɛ. E de ke: “I gblaa ye nɔmlɔ tso ɔ tue nɛ i hɛɛɔ lɛ kaa nyɔguɛ.” (1 Kor. 9:​25-27, sisi ningma.) Ke Paulo ná we suɔmi ɔ kaa e maa pee nɔ́ nɛ da po ɔ, e bɔɔ mɔde wawɛɛ kaa e maa pee nɔ́ nɛ Yehowa suɔ. Anɛ Yehowa jɔɔ Paulo ngɛ nɔ́ nɛ e pee ɔ he lo? Ngɛ anɔkuale mi ɔ, Yehowa jɔɔ lɛ ngɛ e mɔde bɔmi ɔ he. (2 Tim. 4:​7, 8) Jã kɛ̃ nɛ Yehowa bua jɔɔ ke e na kaa wa ngɛ mɔde bɔe kaa wa maa su oti nɛ waa kɛ ma wa hɛ mi ɔ he, ke e he wa ha wɔ kaa wa maa pee jã po. Yehowa bua jɔɔ ejakaa ke wa bua jɔɛ nɔ́ nɛ wa ngɛ pee ɔ he be fɛɛ be po ɔ, wa peeɔ akɛnɛ wa suɔ lɛ ɔ he je. Kaa bɔ nɛ Yehowa jɔɔ bɔfo Paulo ɔ, wɔ hu e maa jɔɔ wɔ ngɛ wa mɔde bɔmi ɔmɛ a he. (La 126:5) Nɛ ke wa na kaa Yehowa ngɛ wɔ jɔɔe ɔ, lɔ ɔ ma nyɛ maa wo wɔ he wami. w23.05 29 ¶9-10

Paulo ngɔ nihi nɛ a be a yi wami hee ngɛ Yehowa ligbi ɔ nɔ ɔ kɛ to nihi nɛ a hwɔ mahe ɔ a he. Nihi nɛ a hwɔ mahe ɔ li nɔ́ nɛ ngɛ nɔ yae, nɛ a li kaa be hu ngɛ yae. Enɛ ɔ he ɔ, ke nɔ́ ko nɛ sa kadimi ngɛ nɔ yae ɔ, a be lee nɛ a be nyɛe maa ngɔ a he kɛ wo mi hulɔ. Mwɔnɛ ɔ, nihi fuu hwɔ mahe ngɛ mumi mi. (Rom. 11:8) A li kaa wa ngɛ “nyagbe ligbi ɔmɛ” a mi, nɛ e be kɛe nɛ amanehlu ngua a hu maa ba. (2 Pet. 3:​3, 4) Se a susu kaa e be bae piɔ. Se wɔɔ lɛɛ wa le kaa e he hia nɛ waa ya nɔ nɛ waa hwɔɔ daa ligbi. (1 Tɛs. 5:6) Enɛ ɔ he ɔ, e sa nɛ waa pee kpoo nɛ wa hɛ nɛ hi wa he nɔ. Mɛni he je? Ejakaa wa sume nɛ waa ngɔ wa he kɛ wo ma kudɔmi sanehi kɛ ní kpahi nɛ ngɛ nɔ yae ngɛ je ɔ mi ɔ a mi. Be mi nɛ Yehowa ligbi ɔ ngɛ sue ɔ, nihi maa nyɛ wa nɔ konɛ waa ngɔ wa he kɛ wo níhi kaa jã a mi. Se loloolo ɔ, e sɛ nɛ waa ye gbeye ngɛ bɔ nɛ wa maa pee wa ní ha a he. Mawu mumi ɔ ma nyɛ maa ye bua wɔ konɛ waa pee kpoo, nɛ wa hɛ nɛ hi wa he nɔ, nɛ waa mwɔ yi mi kpɔhi nɛ da.—Luka 12:​11, 12. w23.06 10 ¶6-7

Ke o nu biɛ nɛ ji Samson ɔ, mɛni baa o juɛmi mi? Eko ɔ, o susuɔ kaa Samson ji nɔ ko nɛ e ngɛ he wami wawɛɛ. Jã pɛpɛɛpɛ nɛ e ji. Se Samson mwɔ yi mi kpɔ ko nɛ ngɔ haomi kɛ ba e nɔ. Se kɛ̃ ɔ, Yehowa ngɔ e juɛmi kɛ ma níhi nɛ Samson pee konɛ e nyɛ nɛ e sɔmɔ lɛ ɔ nɔ. Lɔ ɔ he ɔ, e ha nɛ a ngma nɔ hyɛmi nɔ́ kpakpa nɛ Samson pee ɔ kɛ wo Baiblo ɔ mi konɛ wɔ hu wa ná he se. Yehowa gu Samson nɔ kɛ tsu nyakpɛ níhi fuu kɛ ye bua e ma nɛ ji Israel ɔ. Benɛ Samson gbo jeha lafa komɛ a se ɔ, Yehowa ha nɛ bɔfo Paulo wo e biɛ ta kɛ piɛɛ nyumu komɛ nɛ a kɛ anɔkuale yemi sɔmɔ Yehowa a he. (Heb. 11:​32-34) Samson nɔ hyɛmi nɔ́ ɔ ma nyɛ maa wo wɔ he wami wawɛɛ. Benɛ Samson kɛ nyagbahi ngɛ kpee po ɔ, e ngɔ e hɛ kɛ fɔ Yehowa nɔ. Wa ma nyɛ maa kase ní komɛ kɛ je Samson nɔ hyɛmi nɔ́ ɔ mi, kɛ bɔ nɛ e nɔ hyɛmi nɔ́ ɔ ma nyɛ maa wo wɔ he wami ha. w23.09 2 ¶1-2

Ke wa sɔleɔ be fɛɛ be nɛ wa deɔ Yehowa wa nyagbahi tsuo ɔ, e maa ye bua wɔ nɛ wa fĩ si wawɛɛ. (1 Tɛs. 5:17) Eko ɔ, amlɔ nɛ ɔ, o kɛ haomi ko nɛ nya wa kpi lolo. Ke jã nɛ e ji ngɛ o blɔ fa mi po ɔ, anɛ o hlaa Yehowa blɔ tsɔɔmi se blɔ ke o li nɔ́ nɛ o maa pee, o mi mi fu, aloo o hao? Ke o biɔ Mawu yemi kɛ buami be fɛɛ be ngɛ haomi nyafinyafihi nɛ o kɛ ngɛ kpee ɔ mi ɔ, lɔ ɔ ma ha nɛ e he be wae ha mo kaa o ma bi lɛ nɛ e ye bua mo ke o kɛ haomi nguahi kpe hwɔɔ se. Jehanɛ se hu ɔ, lɔ ɔ ma ha nɛ o ná nɔ mi mami kaa Yehowa le be tutuutu nɛ e maa ye bua mo kɛ blɔ nɔ nɛ e maa gu kɛ pee jã. (La 27:​1, 3) Ke wa fĩɔ si ngɛ kahi a mi amlɔ nɛ ɔ, e he be wae kaa wa maa pee jã ngɛ amanehlu ngua nɛ maa ba a mi. (Rom. 5:3) Mɛni he je nɛ wa ma nyɛ ma de jã a? Nyɛmimɛ fuu na kaa ke a fĩ si ngɛ ka ko mi ɔ, e yeɔ bua mɛ nɛ a nyɛɔ nɛ a daa ka kpahi a nya pee se. Ke Yehowa ye bua mɛ nɛ a fĩ si ngɛ ka ko mi ɔ, e haa nɛ a náa hemi yemi ngɛ e mi kaa e maa ye bua mɛ be fɛɛ be. Hemi kɛ yemi hu maa ye bua mɛ nɛ a da ka kpahi nɛ a kɛ maa kpe ɔ nya.—Yak. 1:​2-4. w23.07 3 ¶7-8

Akɛnɛ Yehowa baa e he si nɛ e mi mi sãa lɛ ngɛ wa he he je ɔ, e nuɔ nɔ́ sisi nɛ e pee we kpɛii. Kaa nɔ hyɛmi nɔ́ ɔ, wa na bɔ nɛ Yehowa baa e he si ha benɛ e piɛ bɔɔ nɛ e ma kpata yiwutsotsɛmɛ nɛ a ngɛ Sodom ma a mi ɔ a hɛ mi ɔ. E gu bɔfo ko nɔ nɛ e kɛ blɔ tsɔɔmi ha Lot nɛ ji dalɔ ɔ kaa e tu fo kɛ ho yoku ɔmɛ a nɔ ya. Lot ye gbeye kaa e maa ya lejɛ ɔ, lɔ ɔ he ɔ, e kpa Yehowa pɛɛ kaa e ha nɛ e kɛ e weku ɔ nɛ ya sa we ngɛ Zoar, nɛ ji ma nyafii ko nɛ a ma kpata e hɛ mi kɛ piɛɛ Sodom he ɔ. Yehowa ko nyɛ de Lot kaa e sa nɛ e kɛ e blɔ tsɔɔmi ɔmɛ nɛ tsu ní pɛpɛɛpɛ. Se e pee we jã, mohu ɔ, Yehowa ha nɛ Lot ho Zoar ma a mi ya, nɛ e kpataa we Zoar ma a hɛ mi. (1 Mose 19:​18-22) Jeha komɛ a se ɔ, Yehowa mi mi sã lɛ ngɛ nihi nɛ a ngɛ Nineve ma a mi ɔ a he. E tsɔ gbalɔ Yona kaa e ya de yiwutsotsɛmɛ nɛ a ngɛ Nineve ma a mi ɔ kaa e ma kpata a kɛ a ma a tsuo hɛ mi. Se benɛ Nineve bi ɔmɛ tsake a tsui ɔ, Yehowa nu he kɛ ha mɛ nɛ e kɛ a tɔ̃mi ɔ ke mɛ nɛ e kpataa we ma a hɛ mi.—Yona 3:​1, 10; 4:​10, 11. w23.07 21 ¶5

Mɛni wa ma nyɛ maa kase ngɛ Yoash sane ɔ mi? Yoash ngɛ kaa tso nɛ e si poku sɛ we zu mi, nɛ a ngɔ tso kpa ko kɛ kpasa lɛ. Benɛ nɔ nɛ yeɔ bua Yoash nɛ ji Yehoyada a gbo se ɔ, Yoash ya bɔni ganɔhi nɛ a kɛ Yehowa mlaahi tsu we ní ɔ tue bumi. Enɛ ɔ ha nɛ e kpa Yehowa sɔmɔmi. E sane ɔ tsɔɔ wɔ kaa e sɛ nɛ waa bu Yehowa tue kɛkɛ akɛnɛ wa weku li loo ni kpahi nɛ a ngɛ asafo ɔ mi ɔ ngɛ jã pee he je. Bɔ nɛ pee nɛ huɛ bɔmi kpakpa nɛ hi waa kɛ Yehowa wa kpɛti daa a, e sa nɛ waa kase Baiblo ɔ nɛ wa pue wa yi mi tɛ ngɛ he, nɛ waa sɔle be fɛɛ be, konɛ suɔmi kɛ bumi nɛ wa ngɛ kɛ ha Yehowa a mi nɛ wa wawɛɛ. (Yer. 17:​7, 8; Kol. 2:​6, 7) Yehowa hyɛ we blɔ kaa waa pee níhi nɛ wa be nyɛe maa pee. A tsɔɔ nɔ́ nɛ e biɔ nɛ waa pee ngɛ Fiɛɛlɔ 12:13 ɔ mi. Lejɛ ɔ de ke: “Moo ye anɔkuale Mawu ɔ gbeye nɛ o ye e mlaa amɛ a nɔ, ejakaa enɛ ɔ ji nɔ́ nɛ e he hia pe kulaa ngɛ adesa si himi mi.” Ke wa yeɔ Mawu gbeye ɔ, e maa ye bua wɔ konɛ wa nyɛ nɛ waa da kahi nɛ waa kɛ maa kpe hwɔɔ se ɔ a nya, nɛ waa da si kpɛii. Ngɛ anɔkuale mi ɔ, nɔ́ ko nɔ́ ko be nyɛe ma puɛ huɛ bɔmi nɛ ngɛ waa kɛ Yehowa wa kpɛti ɔ gblee. w23.06 19 ¶17-19

Ngmami nɛ ɔ je sisi ke: “Nɔ nɛ e hii si ngɛ matsɛ sɛ ɔ nɔ ɔ de ke.” (Kpoj. 21:5a) Ngɛ Kpo Jemi womi ɔ mi ɔ, Yehowa nitsɛ tu munyu si etɛ pɛ ngɛ nina mi, nɛ enɛ ɔ ji a kpɛti kake. Lɔ ɔ he ɔ, pi bɔfo ko nɛ ngɛ he wami loo Yesu nɛ a tle lɛ si ɔ nɛ́ ha wɔ nɔ mi mami nɛ ɔ, mohu ɔ, e je Yehowa nitsɛ ngɔ! Enɛ ɔ ha nɛ wa na kaa wa ma nyɛ ma he nɔ́ nɛ e de kɛ tsa nɔ ɔ maa ye. Mɛni he je nɛ wa de jã a? Ejakaa Yehowa “be nyɛe maa ye lakpa.” (Tito 1:2) Enɛ ɔ he ɔ, munyu nɛ wa kane ngɛ Kpo Jemi 21:​5, 6 maa ba mi kokooko. Mo susu munyungu nɛ ji, “Hyɛ!” nɛ Yehowa kɛ tsu ní ɔ he. A kɛ Hela munyungu nɛ a tsɔɔ sisi ke “hyɛ!” ɔ tsu ní si abɔ ngɛ Kpo Jemi womi ɔ mi. Mɛni munyu nɛ Mawu tu kɛ nyɛɛ se? E de ke: “I ngɛ níhi tsuo pee ehe.” Ngɛ anɔkuale mi ɔ, nɔ́ nɛ Yehowa de ɔ ji nɔ́ ko nɛ e maa pee hwɔɔ se. Se akɛnɛ e ngɛ nɔ mi mami kaa e maa pee nɔ́ nɛ e de ɔ he je ɔ, e tu munyu ɔ kaa nɔ́ nɛ e ngɛ jamɛ a ní ɔmɛ pee momo.—Yes. 46:10. w23.11 3-4 ¶7-8

Bɔfo Petro hwu kɛ si e gbɔjɔmihi. Nyɛ ha nɛ wa susu nɔ hyɛmi ní komɛ a he nɛ waa hyɛ. Benɛ Yesu de e kaseli ɔmɛ kaa e sa nɛ e na nɔ́ nɛ e gbo konɛ e kɛ ha nɛ Baiblo gbami nɛ ba mi ɔ, Petro kã e hɛ mi. (Maak. 8:​31-33) Jehanɛ hu ɔ, Petro kɛ bɔfo kpa amɛ sã nya ngɛ nɔ nɛ ji nɔmlɔ ngua ngɛ a kpɛti ɔ he si abɔ. (Maak. 9:​33, 34) Nyɔ mi nɛ e nɔ jena Yesu ma gbo ɔ, Petro tua nyumu ko nɛ e po e tue. (Yoh. 18:10) Nɛ ngɛ jamɛ a nyɔ ɔ mi nɔuu ɔ, Petro ye gbeye wawɛɛ, enɛ ɔ he ɔ, e kua e huɛ nɛ ji Yesu ɔ si etɛ sɔuu nɛ e tsɔɔ kaa e li lɛ. (Maak. 14:​66-72) Enɛ ɔ ha nɛ Petro fo ya wawɛɛ. E ngɛ mi kaa Petro hao wawɛɛ mohu lɛɛ, se Yesu kɔni mi jɔ̃ we ngɛ e he. Benɛ a tle Yesu si ɔ, e ha nɛ Petro le kaa e suɔ lɛ loloolo. Yesu de Petro kaa e je he si bami mi kɛ hyɛ e to ɔmɛ a nɔ. (Yoh. 21:​15-17) Petro pee klaalo kaa e maa pee nɔ́ nɛ Yesu de lɛ ɔ. Enɛ ɔ he ɔ, Petro ya Yerusalem ngɛ Pentekoste ligbi ɔ nɔ, nɛ e piɛɛ kekleekle nihi nɛ a ngɔ mumi klɔuklɔu ɔ kɛ pɔ mɛ nu ɔ a he. w23.09 22 ¶6-7

Bɔfo Petro wo asafo mi nikɔtɔmahi he wami kaa a “hyɛ Mawu to kuu ɔ” nɔ. (1 Pet. 5:​1-4) Ke o ji asafo mi nɔkɔtɔma a, wa le kaa o suɔ nyɛmimɛ ɔmɛ wawɛɛ, nɛ o suɔ nɛ o hyɛ a nɔ. Se be komɛ ɔ, o ma nyɛ maa nu he kaa o be deka kulaa aloo pɔtɔ o he, nɛ o be nyɛe ma tsu ní tsumi nɛ ɔ. Ke e ba jã a, mɛni o ma nyɛ maa pee? Mo de Yehowa bɔ nɛ o ngɛ he nue ha a tsuo. Petro ngma ke: “Ke nɔ ko sɔmɔɔ ɔ, ha nɛ e pee jã kaa nɔ nɛ e kɛ e he fɔ he wami nɛ Mawu haa nɔ ɔ nɔ.” (1 Pet. 4:11) Eko ɔ, nyɛmimɛ ɔmɛ kɛ nyagbahi nɛ a be nyɛe ma tsu he ní kulaa kɛ pi si ngɛ je yaya nɛ ɔ mi ɔ ngɛ kpee. Se mo kai kaa “to nɔ hyɛlɔ ngua” nɛ ji Yesu Kristo ɔ ma nyɛ maa ye bua mɛ wawɛɛ pe mo. E ma nyɛ maa ye bua mɛ amlɔ nɛ ɔ, nɛ jehanɛ hu ɔ, e maa ye bua mɛ ngɛ je ehe ɔ mi. Nɔ́ nɛ Yehowa ngɛ blɔ hyɛe kaa asafo mi nikɔtɔmahi nɛ a pee pɛ ji kaa a suɔ a nyɛmimɛ ɔmɛ, a hyɛ a nɔ, nɛ a “pee nɔ hyɛmi níhi kɛ ha to kuu ɔ.” w23.09 29-30 ¶13-14

E sɛ nɛ waa ngɔ adesahi a susumi kɛ tsu ní. Ke wa susuɔ níhi a he kaa bɔ nɛ nihi nɛ a kɛ Yehowa mlaa amɛ tsu we ní ɔ peeɔ ɔ, lɔ ɔ ma ha nɛ wa ma kua Yehowa kɛ e mlaa amɛ. (1 Kor. 3:19) “Je nɛ ɔ mi juɛmi ɔ” haa nɛ nihi fuu diɔ a we akɔnɔhi a se. Kristofohi nɛ a ngɛ Pergamo kɛ Tiatira a, a kpɛti ni komɛ ha nɛ nihi nɛ a bɔle mɛ nɛ́ a kɛ a he woɔ ajuama bɔmi kɛ wɔ jami mi ɔ a ní peepee ná a nɔ he wami. Akɛnɛ asafo nɛ ɔmɛ kplɛɛ ajuama bɔmi nɔ he je ɔ, Yesu kɛ kɔkɔ bɔmi nɛ ngɛ hɛdɔ ha mɛ ngɛ he. (Kpoj. 2:​14, 20) Mwɔnɛ ɔ, nihi nɛ a bɔle wɔ ɔ ma nyɛ maa bɔ mɔde kaa a ma ná wa nɔ he wami konɛ waa kplɛɛ susumi nɛ dɛ nɛ a hɛɛ ɔ nɔ. Eko ɔ, wa wekuli kɛ wa huɛmɛ ma nyɛ ma de wɔ kaa wa ngɛ kpɛii tsɔ, nɛ a maa suɔ nɛ waa pee nɔ́ ko nɛ Yehowa sume. Kaa nɔ hyɛmi nɔ́ ɔ, a ma nyɛ ma de ke e he hia we nɛ nɔ ko je mi bami he nɛ tsɔ daa, nɛ Baiblo mlaahi nɛ kɔɔ je mi bami he ɔ hu be be. Be komɛ ɔ, wa ma nyɛ ma susu kaa sisi numi be blɔ tsɔɔmihi nɛ Yehowa kɛ haa wɔ ɔ he. Eko ɔ, wa ma nyɛ maa nu he kaa waa “be níhi nɛ a ngma a he.”—1 Kor. 4:6. w23.07 16 ¶10-11

Yesu mami nɛ ji Maria a hia he wami womi. Jamɛ a be ɔ mi ɔ, Maria sɛ we gba si himi mi, se a ha nɛ e le kaa e maa ngɔ hɔ. E tsɔse we bi hyɛ, se kɛ̃ ɔ, e ma tsɔse bi nɛ pee se ɔ, e ma ba pee Mesia a. Maria ngɔ hɔ be mi nɛ e kɛ nyumu ko ná we bɔmi hyɛ. Se akɛnɛ Yosef wo lɛ si kaa e kɛ lɛ maa sɛ gba si himi mi he je ɔ, kɛ e ma plɛ kɛ tsɔɔ lɛ níhi a nya ha kɛɛ? E ngɛ heii kaa Maria be lɛ náe gbɔjɔɔ kaa e maa pee jã. (Luka 1:​26-33) Mɛni lɛ wo Maria he wami? E ha nɛ ni kpahi ye bua lɛ. Kaa nɔ hyɛmi nɔ́ ɔ, e bi Gabriel konɛ e tsɔɔ lɛ níhi fuu kɛ kɔ ní tsumi nɛ ɔ he. (Luka 1:34) Be bɔɔ se ɔ, e hia blɔ gagaaga kɛ nyɛɛ Yuda “yoku ɔmɛ a nɔ” kɛ ya slaa Elizabet nɛ ji e weku no ɔ. Benɛ e ya su lejɛ ɔ, Elizabet je Maria yi, nɛ Yehowa mumi ɔ wo Elizabet he wami nɛ e gba gbami ko nɛ kɔɔ bimwɔyo nɛ ngɛ Maria mi mi ɔ he, nɛ enɛ ɔ wo Maria he wami wawɛɛ. (Luka 1:​39-45) Maria de ke, Yehowa “kɛ e nine tsu he wami ní tsumihi.” (Luka 1:​46-51) Yehowa gu Gabriel kɛ Elizabet nɔ kɛ wo Maria he wami. w23.10 14-15 ¶10-12

A pɔ Kristo kaseli ɔmɛ ekomɛ nu kɛ mumi klɔuklɔu ɔ, nɛ huɛ bɔmi klɛdɛɛ ko ba ngɛ a kɛ Yehowa a kpɛti. Nimli nɛ ɔmɛ a yibɔ ji 144,000, nɛ a kɛ Yesu ma sɔmɔ kaa osɔfohi ngɛ hiɔwe. (Kpoj. 14:1) He Klɔuklɔu ɔ nɛ ngɛ bo tsu mi ɔ daa si kɛ ha nimli 144,000 ɔ, nɛ Mawu kplɛɛ a nɔ kaa e mumi mi bimɛ be mi nɛ a ngɛ zugba a nɔ loloolo. (Rom. 8:​15-17) He Klɔuklɔu Pe Kulaa a nɛ ngɛ bo tsu ɔ mi ɔ daa si kɛ ha hiɔwe, he nɛ Yehowa ngɛ ɔ. “Tsu mi pomi bo ɔ” nɛ a kɛ po He Klɔuklɔu ɔ kɛ He Klɔuklɔu Pe Kulaa a kpɛti ɔ daa si ha Yesu nɔmlɔ tso loo e he lo ɔ. Akɛnɛ Yesu ji nɔmlɔ he je ɔ, e be nyɛe maa ya hiɔwe kaa Osɔfo Nɔkɔtɔma Ngua pe kulaa ngɛ mumi mi sɔlemi we ɔ mi. Yesu ngɔ e nɔmlɔ tso ɔ kɛ sã afɔle ngɛ adesahi a he, nɛ lɔ ɔ bli blɔ kɛ ha Kristofohi tsuo nɛ a pɔ mɛ nu ɔ konɛ a nyɛ nɛ a ya hiɔwe. Akɛnɛ nihi nɛ a pɔ mɛ nu ɔ be nyɛe maa ngɔ adesa nɔmlɔ tso kɛ ya hiɔwe he je ɔ, e ma bi nɛ a ngmɛɛ he.—Heb. 10:​19, 20; 1 Kor. 15:50. w23.10 28 ¶13

Benɛ Efraimbi ɔmɛ tu Gideon hɛ mi munyu ɔ, e to e tsui si. (Many. 8:​1-3) Gideon kɛ abofu ha we mɛ heto, mohu ɔ, e bu mɛ tue saminya, nɛ e je mi mi jɔmi mi kɛ tu munyu kɛ tsɔɔ kaa e baa e he si. Enɛ ɔ ha nɛ Efraimbi ɔmɛ a mi mi fumi ɔ nya ba si. Asafo mi nikɔtɔmahi nɛ a ngɛ nile ɔ kaseɔ Gideon nɛ ke a tu a hɛ mi munyu ɔ, a buɔ tue saminya, nɛ a jeɔ mi mi jɔmi mi kɛ tuɔ munyu. (Yak. 3:13) Jã nɛ a peeɔ ɔ haa nɛ tue mi jɔmi hii asafo ɔ mi. Benɛ Gideon ye Mediabi ɔmɛ a nɔ kunimi nɛ nihi je e yi ɔ, e gbla ni ɔmɛ a juɛmi kɛ ya Yehowa nɔ. (Many. 8:​22, 23) Mɛni nɛ asafo mi nikɔtɔmahi ma nyɛ maa kase ngɛ Gideon nɔ hyɛmi nɔ́ ɔ mi. Ke a nyɛ tsu nɔ́ ko ngɛ asafo ɔ mi ɔ, e sa nɛ a ngɔ yi jemi ɔ kɛ ha Yehowa. (1 Kor. 4:​6, 7) Kaa nɔ hyɛmi nɔ́ ɔ, ke a jé asafo mi nɔkɔtɔma ko yi ngɛ e ní tsɔɔmi he ɔ, e ma nyɛ ma de kaa blɔ tsɔɔmi nɛ ngɛ Mawu Munyu ɔ mi kɛ níhi nɛ wɔ tsuo wa ngɛ kasee ngɛ Yehowa asafo ɔ mi ɔ lɛ ye bua lɛ. E sa nɛ asafo mi nikɔtɔmahi nɛ a hyɛ kaa a ní tsɔɔmi ngɔɔ yi jemi kɛ haa Yehowa aloo e gblaa nihi a juɛmi kɛ baa mɛ nitsɛmɛ a nɔ. w23.06 4 ¶7-8

Ke wa sɔle ngɛ nɔ́ ko he nɛ wa nine sui nɔ ɔ, wa ma nyɛ ma bi wa he ke, ‘Anɛ nɔ́ nɛ i ngɛ sɔlee ngɛ he ɔ sa lo?’ Behi fuu ɔ, wa susuɔ kaa wa le níhi nɛ maa hi kɛ ha wɔ. Se eko ɔ, níhi nɛ wa sɔleɔ ngɛ he ɔ be wɔ ye buae kɛ pi si. Ke wa ngɛ sɔlee ngɛ nyagba ko he ɔ, eko ɔ, blɔ nɛ hi pe kulaa ngɛ nɛ a ma nyɛ maa gu nɔ kɛ tsu nyagba a he ní pe nɔ́ nɛ wa ngɛ bie ɔ. Jehanɛ hu ɔ, e ma nyɛ maa ba kaa níhi nɛ wa ngɛ sɔlee ngɛ he ɔ kɛ Yehowa suɔmi nya ní kpa we gbi. (1 Yoh. 5:14) Kaa nɔ hyɛmi nɔ́ ɔ, mo susu fɔli nɛ a sɔleɔ kɛ biɔ Yehowa kaa e ha nɛ a bimɛ ɔmɛ nɛ a hi anɔkuale ɔ mi daa a he nɛ o hyɛ. Eko ɔ, enɛ ɔ maa pee nɔ́ nɛ hi wawɛɛ. Se kɛ̃ ɔ, Yehowa be nɔ ko nɔ nyɛe kaa e sɔmɔ lɛ. E suɔ nɛ nɔ fɛɛ nɔ nɛ e hla kaa e ma sɔmɔ lɛ. Wa bimɛ ɔmɛ hu piɛɛ he. (5 Mose 10:​12, 13; 30:​19, 20) Enɛ he ɔ, jinɛ e sa nɛ fɔli ɔmɛ nɛ a bi Yehowa nɛ e ye bua mɛ nɛ a su a bimɛ ɔmɛ a tsui he, konɛ a suɔ Yehowa nɛ a pee e huɛ.—Abɛ 22:6; Efe. 6:4. w23.11 21 ¶5; 23 ¶12

Mɛni he je nɛ ke wa wo nihi a bua a, lɔ ɔ tsɔɔ kaa wa suɔ mɛ ɔ? Baiblo sisi tsɔɔmi womi ko tsɔɔ kaa munyu nɛ ji ‘bua womi’ nɛ Paulo kɛ tsu ní ɔ ma nyɛ maa tsɔɔ kaa “waa hi nɔ ko nɛ e ngɛ nɔ́ nae ɔ kasa mi, nɛ waa wo lɛ he wami.” Enɛ ɔ he ɔ, ke wa nyɛmi ko ngɛ nɔ́ nae nɛ wa wo e bua a, lɔ ɔ tsɔɔ kaa wa ngɛ lɛ ye buae konɛ e ya nɔ nɛ e kɛ anɔkuale yemi nɛ sɔmɔ Yehowa. Be fɛɛ be nɛ wa maa wo nyɛmiyo ko loo nyɛminyumu ko bua a, lɔ ɔ tsɔɔ kaa wa suɔ lɛ wawɛɛ nitsɛ. (2 Kor. 7:​6, 7, 13) Wa mi mi nɛ maa sã wɔ ngɛ nihi a he kɛ a bua nɛ wa maa wo ɔ ngɛ tsakpa wawɛɛ. Ngɛ mɛni blɔ nɔ? Nɔ nɛ e mi mi sãa lɛ ɔ bɔɔ mɔde kaa e maa wo nihi a bua nɛ e ye bua mɛ. Enɛ ɔ he ɔ, kekleekle ɔ, wa mi mi sãa wɔ ngɛ nihi a he, nɛ lɔ ɔ se ɔ, wa woɔ a bua. Paulo tsɔɔ kaa Yehowa mi mi sãa lɛ ngɛ nihi a he, nɛ lɔ ɔ haa nɛ e woɔ a bua. Paulo kale Yehowa kaa e ji “Tsɛ mɔbɔ nalɔ, kɛ bua womi tsuo Mawu ɔ.”—2 Kor. 1:3. w23.11 9-10 ¶8-10

E sa nɛ Kristo se nyɛɛli tsuo nɛ a hyɛ blɔ kaa a kɛ haomihi maa kpe. Mo susu bɔfo Paulo nɔ hyɛmi nɔ́ ɔ he nɛ o hyɛ. E de Tɛsalonikabi ɔmɛ ke: “Benɛ waa kɛ nyɛ ngɛ ɔ, wa de nyɛ ngɔ to kaa wa maa na amanehlu, nɛ . . . lɔ ɔ lɛ ba mi ɔ nɛ.” (1 Tɛs. 3:4) Nɛ e de Korinto bi ɔmɛ ke: “Wa sume kaa wa maa ngɔ amanehlu nɛ waa kɛ kpe . . . ɔ kɛ laa nyɛ. . . . Wa hɛ be nɔ po kaa wa maa hi wami mi.” (2 Kor. 1:8; 11:​23-27) Kristofohi nɛ a ngɛ mwɔnɛ ɔ hu ma nyɛ maa hyɛ blɔ kaa a kɛ amanehlu kaa kikɛ nɛ ɔ maa kpe. (2 Tim. 3:12) Akɛnɛ o ba ná hemi kɛ yemi ngɛ Kristo mi nɛ o ngɛ e se nyɛɛe ɔ,o huɛmɛ kɛ o weku li ma nyɛ maa ye o he fɛu. Eko po ɔ, a ngɛ mo yi mi wae wawɛɛ. Anɛ akɛnɛ o fia o pɛɛ si kaa o maa ya nɔ maa ye anɔkuale ngɛ o ní tsumi mi he je ɔ, e ha nɛ a ngɛ mo yi mi wae lo? (Heb. 13:18) Anɛ akɛnɛ o tuɔ o hɛ kɛ nɔ fɔmi ɔ he munyu kɛ tsɔɔ ni kpahi he je ɔ, amlaalo ɔ teɔ si kɛ woɔ mo lo? Mo kai kaa Haomi fɛɛ haomi nɛ waa kɛ maa kpe ɔ, Paulo wo wɔ he wami kaa e sa nɛ wa bua nɛ jɔ. w23.12 10-11 ¶9-10

Yakob fĩ si ngɛ si fɔfɔɛ fuu a mi. Yakob binyumu ɔmɛ a kpɛti ni enyɔ nɛ ji Simon kɛ Levi ɔ pee ní komɛ nɛ ngɔ hɛ mi si puemi kɛ ba a weku ɔ nɔ. Nɔ́ nɛ a pee ɔ gbe Yehowa biɛ ɔ he guɛ. Jehanɛ hu ɔ, Yakob yo nɛ e suɔ lɛ wawɛɛ ɔ gbo benɛ e ngɛ e binyumu enyɔne ɔ fɔe ɔ. Benɛ hwɔ nɛ nya wa ko ba a, e ha nɛ Yakob hia kɛ ho Egipt ya ngɛ e bwɔmi si. (1 Mose 35:​16-19; 37:28; 45:​9-11, 28) E ngɛ mi kaa Yakob kɛ haomi nɛ ɔmɛ tsuo kpe mohu lɛɛ, se loloolo ɔ, e ha nɛ hemi kɛ yemi nɛ e ngɛ ngɛ Yehowa kɛ e si womi ɔmɛ a mi ɔ mi wa wawɛɛ, nɛ Yehowa hu jɔɔ lɛ wawɛɛ. Kaa nɔ hyɛmi nɔ́ ɔ, Yehowa ya nɔ nɛ e jɔɔ Yakob wawɛɛ kɛ he lo nya níhi. Moo hyɛ bɔ nɛ Yakob bua maa jɔ ha benɛ e kɛ e binyumu Yosef nɛ e susu kaa e gbo ɔ kpale kpe ɔ. Akɛnɛ huɛ bɔmi kpakpa ngɛ Yakob kɛ Yehowa a kpɛti he je ɔ, e nyɛ nɛ e da kahi a nya. (1 Mose 30:43; 32:​9, 10; 46:​28-30) Ke wa ha nɛ huɛ bɔmi kpakpa hi waa kɛ Yehowa wa kpɛti ɔ, wɔ hu wa ma nyɛ maa da kahi nɛ waa kɛ kpeɔ tlukaa a nya. w23.04 15 ¶6-7

La 23 ɔ ji la nɛ maa nɔ mi kaa Yehowa suɔ wɔ nɛ e susuɔ wa he. David ji nɔ nɛ ngma la nɛ ɔ nɛ. David tsɔɔ huɛ bɔmi gbagbanii nɛ ngɛ e kɛ Yehowa nɛ ji e Nɔ Hyɛlɔ ɔ a kpɛti. Akɛnɛ David ha nɛ Yehowa tsɔɔ lɛ blɔ, nɛ e ngɔ e hɛ kɛ e fɔ e nɔ kulaa he je ɔ, e nu he kaa e ngɛ slɔkee. David le kaa Yehowa ma je suɔmi kpo kɛ tsɔɔ lɛ daa ligbi ngɛ e si himi mi. Mɛni ha nɛ David ná nɔ mi mami nɛ ɔ? Akɛnɛ Yehowa haa David e hiami níhi be fɛɛ be he je ɔ, David nu he kaa nɔ́ ko nɔ́ ko he hia we lɛ. Jehanɛ hu ɔ, David le kaa Yehowa ji e huɛ nɛ e kplɛɛ e nɔ. Enɛ ɔ he ɔ, David ná nɔ mi mami nɛ mi wa kaa bɔ fɛɛ bɔ nɛ níhi ma ji ha ngɛ e si himi mi ɔ, Yehowa maa ya nɔ ma ha lɛ e hiami níhi tsuo. Akɛnɛ David ngɛ hemi kɛ yemi kaa Yehowa suɔ lɛ nɛ e susuɔ e he he je ɔ, lɔ ɔ ye bua lɛ nɛ e hɛwi tsɔ, nɛ e bua jɔ níhi nɛ e ngɛ ɔ he.—La 16:11. w24.01 29 ¶12-13

Kɛ je benɛ a hwu je mi ta enyɔne ɔ se ɔ, Yehowa we bi nyɛ nɛ a fiɛɛ faa ngɛ mahi fuu a nɔ. Ngɛ anɔkuale mi ɔ, Yehowa sɔmɔli ngɛ fiɛɛe loloolo ngɛ je kɛ wɛ. Mwɔnɛ ɔ, Blɔ Tsɔɔmi Ajla Toli ɔmɛ nyɛɛɔ Kristo blɔ tsɔɔmi se. A suɔ kaa blɔ tsɔɔmihi nɛ a kɛ ma ha nyɛmimɛ ɔmɛ ɔ nɛ pee nɔ́ nɛ je Yehowa ngɔ. A guɔ kpɔ mi nɔ hyɛli kɛ asafo mi nikɔtɔma amɛ a nɔ nɛ a kɛ blɔ tsɔɔmi haa nyɛmimɛ ɔmɛ. Asafo mi nikɔtɔmahi nɛ a pɔ mɛ nu ɔ “ngɛ [Kristo] hiɔ nine mi.” (Kpoj. 2:1) Ngɛ anɔkuale mi ɔ, asafo mi nikɔtɔma nɛ ɔmɛ yi mluku nɛ mɛ hu a tɔ̃ɔ be komɛ. Mose kɛ Yoshua tɔ̃, nɛ jã kɛ̃ nɛ e ji ngɛ bɔfo ɔmɛ hu a blɔ fa mi. (4 Mose 20:12; Yosh. 9:​14, 15; Rom. 3:23) Se wa naa heii kaa Kristo ngɛ tsɔlɔ anɔkualetsɛ kɛ asafo mi nikɔtɔma amɛ kudɔe, nɛ e maa ya nɔ maa pee jã. Enɛ ɔ he ɔ, e sa nɛ wa ná hɛ kɛ nɔ fɔmi ngɛ nihi nɛ e guɔ a nɔ kɛ haa wɔ blɔ tsɔɔmi ɔ a mi. w24.02 23-24 ¶13-14

Mwɔnɛ ɔ, ke wa tuɔ Yehowa he munyu kɛ tsɔɔ nihi kɛ tsɔɔ kaa wa suɔ lɛ, nɛ wa hɛ sa ní kpakpahi nɛ e peeɔ kɛ haa wɔ ɔ, lɔ ɔ haa nɛ e bua jɔɔ. Ke wa ngɛ fiɛɛe ɔ, wa suɔ nɛ waa ye bua ni kpahi konɛ a hɛ kɛ su Yehowa he, nɛ a na wa hiɔwe Tsɛ ɔ kaa bɔ nɛ wa naa lɛ ɔ. (Yak. 4:8) Baiblo ɔ tsɔɔ kaa Yehowa ngɛ suɔmi, nile, he wami, e yeɔ dami sane, nɛ e ngɛ su kpakpahi fuu hulɔ. Ke wa tu su nɛ ɔmɛ a he munyu kɛ tsɔɔ nihi ɔ, e haa nɛ wa bua jɔɔ. Jehanɛ hu ɔ, ke wa bɔ mɔde kaa wa maa kase Yehowa a, lɔ ɔ tsɔɔ kaa wa ngɛ e yi jee nɛ wa suɔ nɛ waa sa e hɛ mi. Ke wa pee jã a, e ma ha nɛ nihi nɛ a na kaa wa ngɛ slɔɔto ngɛ ni kpahi nɛ a ngɛ je yaya nɛ ɔ mi ɔ a he, nɛ eko ɔ, a maa suɔ nɛ a le nɔ́ he je. (Mat. 5:​14-16) Enɛ ɔ he ɔ, ke waa kɛ mɛ ngɛ ní sɛɛe ɔ, wa ma nyɛ maa tsɔɔ mɛ nɔ́ he je nɛ wa ngɛ slɔɔto ɔ. Enɛ ɔ ma ha nɛ tsui kpakpatsɛmɛ maa hɛ kɛ su wa Mawu ɔ he. Ke wa gu blɔ nɛ ɔmɛ a nɔ kɛ je Yehowa yi ɔ, e haa nɛ e tsui nɔɔ e mi.—1 Tim. 2:​3, 4. w24.02 10 ¶7

Loko o ma nyɛ maa pee Kristofono nɛ e nane pi si ɔ, e he maa hia nɛ o kase ní komɛ nɛ maa ye bua mo ngɛ si himi mi. Jã nɛ o maa pee ɔ maa ye bua mo konɛ o nyɛ nɛ o tsu ní tsumihi nɛ a kɛ maa wo o dɛ ngɛ asafo ɔ mi ɔ. Jehanɛ hu ɔ, e maa ye bua mo konɛ o nyɛ nɛ o tsu ní kɛ hyɛ mo nitsɛ o he kɛ weku ɔ, nɛ huɛ bɔmi kpakpa nɛ hi o kɛ ni kpahi nyɛ kpɛti. Kaa nɔ hyɛmi nɔ́ ɔ, moo kase ní kanemi kɛ ní ngmami saminya. Baiblo ɔ tsɔɔ kaa loko niheyo ko ma ná bua jɔmi nɛ e ye manye ngɛ si himi mi ɔ, ja e ná be kɛ kane Mawu Munyu ɔ nɛ e pue e yi mi tɛ ngɛ he. (La 1:​1-3) Ke niheyo ko kaneɔ Baiblo ɔ daa ligbi ɔ, e maa le bɔ nɛ Yehowa susuɔ níhi a he ha, nɛ lɔ ɔ maa ye bua lɛ konɛ e susu níhi a he saminya, nɛ e ngɔ níhi nɛ e kaneɔ ngɛ Ngmami ɔ mi ɔ nɛ tsu ní. (Abɛ 1:​3, 4) Wa hia nyumuhi kaa jã ngɛ asafo ɔ mi konɛ a nyɛ nɛ a tsɔɔ wɔ ní nɛ a wo wɔ ga kɛ je Baiblo ɔ mi. Ke o nyɛɔ nɛ o kaneɔ ní nɛ o ngmaa ní saminya a, e maa ye bua mo konɛ o dla o he kɛ ha ní tsumihi nɛ a kɛ maa wo o dɛ ngɛ asafo ɔ mi, nɛ o ma ha munyu heto nɛ maa fia o nyɛmimɛ ɔmɛ kɛ ma si hulɔ. Jehanɛ hu ɔ, e maa ye bua mo konɛ o nyɛ nɛ o ngma otihi nɛ a he hia a kɛ fɔ si. Enɛ ɔ ma ha o hemi kɛ yemi ɔ mi nɛ wa, nɛ e maa wo ni kpahi he wami hulɔ. w23.12 26-27 ¶9-11

Ke o ngɛ gbeye yee ɔ, mo pue o yi mi tɛ ngɛ nɔ́ nɛ Yehowa maa pee hwɔɔ se ke Satan be hu ɔ he. Ngɛ kpokpa nɔ kpe nɛ a pee ngɛ jeha 2014 ɔ sisi ɔ, a pee peemi kɛ tsɔɔ ko nɛ tsɔɔ bitsɛ ko kɛ e weku ɔ susu 2 Timoteo 3:​1-5 ɔ he. Bitsɛ ɔ tsɔɔ kaa ke ngmami nɛ ɔ ngɛ bɔ nɛ si himi ɔ ma ji ha ngɛ Paradeiso ɔ mi ɔ he munyu tue ɔ, jinɛ a ko ngma ke: “Ngɛ je ehe ɔ mi ɔ, si himi ɔ maa pee bua jɔmi. Ejakaa adesahi maa suɔ a nyɛmimɛ, a maa suɔ mumi mi níhi, a be fĩae, a maa ba a he si, nihi ma je Mawu yi, nihi maa bu a fɔli, a maa pee nihi nɛ a le sina, nihi nɛ a yeɔ anɔkuale, nihi nɛ a susuɔ a weku mi bimɛ a he, nihi nɛ a kɛ mɛ ma nyɛ maa so, nihi nɛ a jeɔ nɔ yi be fɛɛ be, nihi nɛ a yeɔ a he nɔ, nihi nɛ a he jɔ, nihi nɛ a suɔ nɔ́ kpakpa, nihi nɛ a tsɔɔ we nɔ se blɔ, nihi nɛ a pee we a tsui nya ní, nihi nɛ a pee we pupuupu, nihi nɛ a suɔ Mawu pe bɔ nɛ a suɔ níhi nɛ haa nɔ bua jɔmi, nihi nɛ a jaa Mawu ngɛ anɔkuale mi, nimli kaa kikɛ nɛ ɔmɛ ɔ, o kɛ mɛ nɛ bɔ wawɛɛ.” Anɛ o kɛ o weku ɔ loo nyɛmimɛ ɔmɛ susuɔ bɔ nɛ si himi ɔ ma ji ha ngɛ je ehe ɔ mi ɔ he lo? w24.01 6 ¶13-14

Lemi nɛ wa le kaa Yehowa bua jɔ e we bi tsuo a he ɔ woɔ wa bua wawɛɛ! Baiblo ɔ de ke: “Yehowa bua jɔɔ e we bi a he.” (La 149:4) Se be komɛ ɔ, ni komɛ a kɔni mi jɔ̃ɔ nɛ a biɔ ke, ‘Anɛ Yehowa bua jɔ ye he niinɛ lo?’ Yehowa sɔmɔli anɔkualetsɛmɛ nɛ a hi si blema a hu a kɔni mi jɔ̃ɔ be komɛ, nɛ e he waa ha mɛ kaa a ma he ye kaa Yehowa bua jɔ a he. (1 Sam. 1:​6-10; Hiob 29:​2, 4; La 51:11) Baiblo ɔ tsɔɔ heii kaa adesahi nɛ a yi mluku ɔ ma nyɛ maa pee níhi nɛ ma ha nɛ Yehowa bua nɛ jɔ a he loo e kplɛɛ a nɔ. Ngɛ mɛni blɔ nɔ? E sa nɛ wa ná hemi kɛ yemi ngɛ Yesu Kristo mi nɛ wa ha nɛ a baptisi wɔ. (Yoh. 3:16) Ke wa pee jã a, wa ngɛ ni kpahi dee ke wa pia wa he ngɛ wa he yayami ɔmɛ a he, nɛ wa wo Mawu si kaa wa maa pee e suɔmi nya ní. (Níts. 2:38; 3:19) Ke wa pee ní nɛ ɔmɛ konɛ huɛ bɔmi kpakpa nɛ hi waa kɛ Yehowa wa kpɛti ɔ, e bua maa jɔ. Ke wa ya nɔ nɛ wa bɔ mɔde kaa wa maa ye wa he nɔ jɔɔmi kita a nɔ ɔ, Yehowa maa kplɛɛ wa nɔ nɛ e kɛ wɔ maa pee e huɛmɛ.—La 25:14. w24.03 26 ¶1-2

Mwɔnɛ ɔ, wa ma nyɛ maa kase nɔ́ nɛ kaseli ɔmɛ pee ɔ nɛ waa ya nɔ nɛ waa fiɛɛ ke nɔ yeli ɔmɛ fã wɔ kaa wa kpa fiɛɛmi po. Wa ma nyɛ ma ná nɔ mi mami kaa Yehowa maa ye bua wɔ konɛ wa tsu wa sɔmɔmi ní tsumi ɔ kɛ pi si. Enɛ ɔ he ɔ, moo sɔle konɛ Yehowa nɛ ha mo kã kɛ nile. Mo bi Yehowa nɛ e ye bua mo konɛ o nyɛ nɛ o da nyagbahi nɛ o kɛ ngɛ kpee ɔ a nya. Hiɔ kɛ ní kpahi ngɛ wa kpɛti nihi fuu haoe. Wa suɔli nɛ a gbo, weku mi nyagba, yi mi wami kɛ ní kpahi ma nyɛ ma ha nɛ waa hao wawɛɛ. Jehanɛ hu ɔ, hiɔ nɛ sãa nɔ kɛ tahi haa nɛ e he waa kaa wa maa da nyagba nɛ ɔmɛ a nya. Ke e ba jã a, mo de Yehowa bɔ nɛ o ngɛ he nue ha tutuutu. Moo tu o si fɔfɔɛ ɔ he munyu kɛ tsɔɔ lɛ kaa bɔ nɛ o ma de o huɛ ko nɛ o suɔ lɛ wawɛɛ ɔ. Mo ná nɔ mi mami kaa Yehowa “maa piɛɛ o he.” (La 37:​3, 5) Ke wa sɔleɔ be fɛɛ be ɔ, e maa ye bua wɔ nɛ wa “fĩ si ngɛ amanehlu mi.” (Rom. 12:12) Yehowa le si fɔfɔɛhi nɛ e sɔmɔli kɛ ngɛ kpee, nɛ “e nuɔ ya nɛ a foɔ kɛ biɔ yemi kɛ buami ɔ.”—La 145:​18, 19. w23.05 5-6 ¶12-15

Ke e he ba hia nɛ waa mwɔ yi mi kpɔhi nɛ a he hia ngɛ wa si himi mi ɔ, e sa nɛ wa “yɔse nɔ́ nɛ ji Yehowa suɔmi nya ní,” nɛ waa da nɔ kɛ pee jã. (Efe. 5:17) Ke wa hla Baiblo sisi tomi mlaahi nɛ kɔɔ wa si fɔfɔɛ ɔ he ɔ, lɔ ɔ tsɔɔ kaa wa suɔ nɛ waa le Mawu susumi ngɛ jamɛ a si fɔfɔɛ ɔ he. Lɔ ɔ se ɔ, ke waa kɛ Baiblo sisi tomi mlaa amɛ tsu ní ɔ, e he be wae kaa wa maa mwɔ yi mi kpɔhi nɛ da. “Nɔ yayami ɔ,” nɛ ji wa he nyɛlɔ Satan suɔ nɛ waa ngɔ wa be tsuo kɛ di níhi nɛ ngɛ je ɔ mi ɔ se konɛ wa ko ná be kɛ sɔmɔ Mawu. (1 Yoh. 5:19) E he be wae kulaa kaa Kristofono ko maa ngɔ he lo nya níhi, sukuu yami, aloo ní tsumi kɛ ye kekle blɔ he pe Yehowa nɛ e ma sɔmɔ. Ke e ba lɛ jã a, lɔ ɔ tsɔɔ kaa je ɔ susumi ɔ ngɛ e nɔ he wami náe. Ngɛ anɔkuale mi ɔ, tɔmi be ní nɛ ɔmɛ a he, se e sɛ nɛ waa ngɔ kɛ ye kekle blɔ he ngɛ wa si himi mi. w24.03 24 ¶16-17