Kase Ní Kɛ Je Mawu Munyu ɔ Mi
Anɛ Mawu Ma Ha Nɛ Nɔ Yemi Kake Maa Ye Je ɔ Nɔ Lo?
A susu sane komɛ nɛ eko ɔ, o bi hyɛ ɔ a he ngɛ munyu nɛ ɔ mi, nɛ a tsɔɔ hehi nɛ o ma nyɛ maa na heto ɔmɛ ngɛ ɔ ngɛ o Baiblo ɔ mi. Yehowa Odasefoli a bua maa jɔ kaa a kɛ mo ma susu heto ɔmɛ a he.
1. Mɛni heje nɛ e he hia kaa nɔ yemi kake nɛ ye je ɔ tsuo nɔ?
Mwɔnɛ ɔ, níhi haoɔ adesahi ngɛ je ɔ mi tsuo. Nihi fuu ngɛ ohia yee ngɛ ma komɛ a nɔ nɛ a waa nihi babauu hu yi mi. Ngɛ he komɛ hu ɔ, nihi fuu ná ní nɛ́ a pee we he nɔ́ ko. Ja nɔ yemi kake ye je ɔ tsuo nɔ loko nɔ tsuaa nɔ nɛ ngɛ zugba a nɔ ɔ nine maa su níhi nɛ a he hia lɛ ɔ a nɔ.—Kane Fiɛlɔ 4:1; 8:9.
2. Mɛnɔ nɛ a ma nyɛ ma ha lɛ he blɔ kaa e ye je ɔ tsuo nɔ?
Nihi fuu kplɛɛ we nɔ kaa nɔ ko ma nyɛ maa ye je ɔ tsuo nɔ, ejakaa adesa ko be nɛ ma nyɛ ma tsu jamɛ a ní ɔ saminya. Adesa ko be nɛ e ma nyɛ maa sa nɔ tsuaa nɔ hɛ mi. Jehanɛ se hu ɔ, nɔ ko be nɛ ke e ná blɔ nya a nɛ e kɛ tsuɔ ní ngɛ blɔ nɛ da nɔ? Ke nihi hyɛ nɛ a ma de ke adesa ko nɛ yi mi wa maa ye tsuo nɔ ɔ, a yeɔ gbeye.—Kane Abɛ 29:2; Yeremia 10:23.
Yehowa Mawu hla e Bi Yesu konɛ e ye adesahi a nɔ kɛ ya neneene. (Luka 1:32, 33) Yesu le bɔnɛ zugba a nɔ si himi ngɛ ha. Benɛ e ba zugba a nɔ ɔ, e tsa hiɔtsɛmɛ, e tsɔɔ nihi nɛ a he jɔ ɔ ní, nɛ e ná be kɛ ha jokuɛwi. (Marko 1:40-42; 6:34; 10:13-16) Enɛ ɔ he ɔ, Yesu ji Nɔ Yelɔ nɛ sa.—Kane Yohane 1:14.
3. Anɛ nɔ yemi ko ma nyɛ maa ye je ɔ tsuo nɔ lo?
Mawu hla e Bi ɔ konɛ e hi hiɔwe kɛ ye zugba a nɔ. (Daniel 7:13, 14) Ke adesa ko ngɛ ma ko nɔ yee ɔ, ma ngua a pɛ mi nɛ e hiɔ nɛ e kɛ yeɔ ma a tsuo nɔ, jã nɔuu nɛ e he hia we nɛ Yesu nɛ ba hi zugba a nɔ loko e ye adesahi a nɔ.—Kane Mateo 8:5-9, 13.
Anɛ nɔ tsuaa nɔ maa kplɛɛ Yesu nɔ kaa Nɔ Yelɔ lo? Dɛbi. Nihi nɛ a suɔ nɔ́ kpakpa pɛ nɛ a maa kplɛɛ e nɔ. Yehowa ma kpata nihi tsuo nɛ a be Nɔ Yelɔ nɛ e hla, nɛ e ngɛ suɔmi nɛ e peeɔ nɔ́ nɛ da a nɔ kplɛɛe ɔ a hɛ mi ngɛ zugba a nɔ.—Kane Mateo 25:31-33, 46.
4. Mɛni nɛ je ɔ tsuo Nɔ Yelɔ ɔ maa pee?
Kaa bɔnɛ to hyɛlɔ buaa e tohi a nya a, Yesu hu ngɛ nihi nɛ a he jɔ ɔ a nya buae ngɛ je ma amɛ a mi nɛ e ngɛ mɛ Mawu blɔ ɔmɛ nɛ suɔmi ngɛ mi ɔ tsɔɔe. (Yohane 10:16; 13:34) Nimli nɛ ɔmɛ kɛ bua jɔmi fĩɔ Yesu kɛ e nɔ yemi ɔ se. (La 72:8; Mateo 4:19, 20) Anɔkualetsɛmɛ nɛ a ngɛ Yesu nɔ yemi ɔ sisi ngɛ je kɛ wɛ ɔ pee kake kɛ ngɛ nihi dee kaa Yesu ngɛ Matsɛ yee.—Kane Mateo 24:14.
E be kɛe nɛ Yesu kɛ e he wami ɔ ma kpata adesa nɔ yemi yaya amɛ a hɛ mi konɛ adesahi a he nɛ jɔ mɛ. E hla e se nyɛɛli nɛ a yeɔ anɔkuale ɔ a kpɛti ni komɛ konɛ a piɛɛ e he kaa matsɛmɛ kɛ ye zugba a nɔ. (Daniel 2:44; 7:27) Yesu Matsɛ Yemi ɔ ma ha nɛ zugba a nɔ ma hyi tɔ kɛ Yehowa he nile, nɛ e maa ngɔ Paradeiso nɛ laa adesahi kɛ je blema a kɛ ba ekohu.—Kane Yesaya 11:3, 9; Mateo 19:28.