Kɛ Jami Nɛ O Ngɛ Mi ɔ Peeɔ E Ní Ngɛ Je Mi Bami He Ha Kɛɛ?

Sylvia nɛ e tsuɔ ní ngɛ hiɔtsami he ko ɔ de ke: “Nihi nɛ i kɛ mɛ ya kɔleji ɔ a kpɛti nihi fuu deɔ ke a kɛ Mawu jami fiɛ we. Se a juɔ ngɛ ka peemi mi, nɛ a nuɔ tsopa yayahi hulɔ. Jami tsakee we a si himi.”

Nyumu ko nɛ a tsɛɛ lɛ ke Lionel ɔ de ke: “Nihi nɛ i kɛ mɛ tsuɔ ní ɔ yeɔ lakpa nɛ a deɔ ke a be he wami be mi nɛ a ngɛ he wami. A ti nɔ tsuaa nɔ ngɛ jami ko mi, se a ha we nɛ jami ɔ nɛ tsake a si himi. A kɛ jami pee kaa nɔ́ ko nɛ a kɛ dlaa tsu mi kɛkɛ ngɛ afɛu heje.”

Jami nyɛ we nɛ e tsake nihi fuu a je mi bami. Mwɔnɛ ɔ, nihi fuu ‘tsɛɔ a he ke Mawu jali, se a bui e mi he wami ɔ.’ (2 Timoteo 3:5) A jami nya dali ɔmɛ pee we nɔ hyɛmi nɔ́ kpakpa, nɛ jã kɛ̃ nɛ osɔfo ɔmɛ hu ha we asafo bimɛ ɔmɛ Baiblo mi ga womi nɛ sa konɛ a ba a je mi saminya. E be nyakpɛ kaa nihi fuu susuɔ kaa bɔnɛ a baa a je mi ha a pi Mawu kɔmɔ.

MƐNI BAIBLO Ɔ TSƆƆ?

Baiblo ɔ tsɔɔ kaa wa je mi bami ma nyɛ ma ha nɛ Mawu bua maa jɔ, nɛ e ma nyɛ ma ha nɛ e maa hao hulɔ. Benɛ blema Israelbi ɔmɛ tsɔ Mawu hɛ mi atua a, “a pee lɛ nidɔ ní.” (La 78:40) Se ke nɔ ko je e tsui mi nɛ e tsake e je mi bami ɔ, ‘bua jɔmi agbo baa hiɔwe.’ (Luka 15:7) Ke nɔ ko nu wa hiɔwe Tsɛ ɔ su kpakpa amɛ a sisi ɔ, suɔmi nɛ e ngɛ kɛ ha Mawu ɔ mi waa. Enɛ ɔ woɔ lɛ he wami nɛ e náa suɔmi kɛ haa níhi nɛ Mawu suɔ, nɛ e yuɔ e he ngɛ níhi nɛ Mawu sume ɔ a he.—Amos 5:15.

KƐ YEHOWA ODASEFOLI BAA A JE MI HA KƐƐ?

Adafi fiami womi ko tsɔɔ kaa Yehowa Odasefoli “haa nɛ suɔmi nɛ mi wa hiɔ nihi kɛ a weku mi bimɛ a kpɛti, a peeɔ nihi kpakpa, nɛ a ji ma bi nɛ a yeɔ anɔkuale.” (Deseret News of Salt Lake City, Utah, U.S.A.) Adafi fiami womi ɔ de hu ke: “Yehowa Odasefoli ngɔɔ je mi bami he mlaahi nɛ a nɔ kuɔ kɛ tsuɔ ní wawɛɛ. A he ye kaa sigaleti numi, dã fuu numi, tsopa yaya kɛ nítsumi, asɔ fiɛmi, ajuama bɔmi ní peepeehi, kɛ nyumu kɛ nyumu aloo yo kɛ yo a bɔmi nami ji ní peepeehi nɛ puɛɔ nɔ kɛ Mawu a kpɛti.”

Mɛni blɔ nɔ Mawu suhi a he ní nɛ Odasefoli kaseɔ ɔ yeɔ bua mɛ ngɛ? Sylvia nɛ wa tu e he munyu kɛ sɛ hlami ɔ de ke: “A sisiɔ nihi daa ngɛ hiɔtsami nítsumi ɔ mi. Ke o hyɛ we nɛ hi ɔ, o maa pee jã nɛ́ o be tɔmi ko nae ngɛ he. Se akɛnɛ i le bɔnɛ Yehowaa buu ní peepeehi kaa jã a ha heje ɔ, e ye bua mi nɛ i peeɔ nɔ́ nɛ da. I ngɛ bua jɔmi nɛ i ngɛ tue mi jɔmi hulɔ.” Sylvia ma nɔ mi kaa níhi nɛ e kase ngɛ e jami ɔ mi nɛ e kɛ tsuɔ ní ɔ, ha nɛ e si himi pee kpakpa.