MUNYUHI NƐ KƆƆ HƐ MI MUNYU Ɔ HE | ANƐ BƆFOHI NGƐ NIINƐ LO? NƆ́ HE JE NƐ E HE HIA

Anɔkuale Nɛ Kɔɔ Bɔfohi A He

Anɛ o suɔ nɛ o le anɔkuale nɛ kɔɔ bɔfohi a he—nihi nɛ a ji, bɔ nɛ a plɛ kɛ ba, kɛ ní nɛ a tsuɔ lo? Mawu munyu nɛ ji Baiblo ɔ pɛ nɛ ma nyɛ ma ha wɔ heto. (2 Timoteo 3:16) Mɛni ji nɔ́ nɛ Baiblo ɔ de?

Kaa bɔ nɛ Mawu ji Mumi ɔ, bɔfohi hu ji mumi nɛ “a be he lo kɛ wuhi.” Wa be nyɛe maa na mɛ. Bɔfohi nɛ a yeɔ anɔkuale ɔ ngɛ hiɔwe nɛ a naa Mawu hɛ mi.—Luka 24:39, NW; Mateo 18:10; Yohane 4:24.
Be ko nɛ be ɔ, ke Mawu tsɔ bɔfohi kɛ ba zugba a nɔ konɛ a ba tsu ní tsumi ko ɔ, a tsakeɔ a he kɛ peeɔ adesahi nɛ a ba tsuɔ ní tsumi nɛ a kɛ wo a dɛ ɔ. Ke a gbe nya a, a tsakeɔ peeɔ bɔfohi ekohu.—Manyadali 6:11-23; 13:15-20.
E ngɛ mi kaa Baiblo ɔ tu bɔfohi a he munyu kaa nyumuhi, nɛ ke a ba zugba a nɔ hu ɔ, a tsakeɔ kɛ peeɔ nyumuhi. Se ngɛ anɔkuale mi ɔ, bɔfo ko be nɛ e ji nyumu loo yo. A sɛ we gba si himi mi, nɛ a fɔ we hulɔ. Jehanɛ hu ɔ, a bɛ wami mi kaa adesahi kekle ngɛ zugba a nɔ loko pee se a ya pee bɔfohi. Nɛ a be kaa adesahi nɛ a fɔɔ mɛ nɛ a waa. Yehowa ji nɔ nɛ bɔ bɔfo ɔmɛ tɛɛ, enɛ ɔ he ɔ, Baiblo ɔ tsɛɛ mɛ ke “Mawu bimɛ.”—Hiob 1:6; La 148:2, 5.
Baiblo ɔ tu ‘adesahi a gbihi kɛ hiɔwe bɔfohi a gbihi’ a he munyu, enɛ ɔ tsɔɔ kaa bɔfohi tuɔ munyu, nɛ a ngɛ gbi nɛ a tuɔ hulɔ. E ngɛ mi kaa Mawu ha nɛ bɔfohi ngɔ e sɛ gbi kɛ ba ha adesahi mohu lɛɛ, se e ngmɛ́ blɔ kaa wa ja mɛ loo waa sɔle kɛ ha mɛ.—1 Korinto Bi 13:1; Kpojemi 22:8, 9.
Bɔfohi maa pee akpe nyɔngmahi abɔ nɛ bɔ he akpe nyɔngmahi abɔ lɛ ngɛ. Eko ɔ, a yibɔ maa su ayɔ akpehi abɔ po.—Daniel 7:10, NW; Kpojemi 5:11.
Bɔfohi “ngɛ kã,” nile nɛ se be kɛ nyɛmi nɛ pã adesahi a nɔ́ kulaa. A nyɛɔ hiaa blɔ gagaa ngɛ be kpiti mi, nɛ fo nɛ a kɛ peeɔ jã a nya wa nɛ wa be nyɛe maa kale.—La 103:20; Daniel 9:20-23.
Se huzu ngɛ he wami kɛ nile nɛ se be nɛ bɔfohi ngɛ ɔ he, nɛ ní komɛ hu ngɛ nɛ a li.—Mateo 24:36; 1 Petro 1:12.
Bɔfo ɔmɛ ngɛ su slɔɔtohi, nyɛmi kɛ he blɔ nɛ a kɛ peeɔ nɔ́ nɛ nɔ suɔ. Lɔ ɔ he ɔ, kaa bɔ nɛ e ji ngɛ adesahi a blɔ fa mi ɔ, a ma nyɛ maa hla kaa a maa pee kpakpa aloo a maa pee yayami. Aywilɛho sane ji kaa, bɔfo komɛ hla kaa a ma tsɔ atuã kɛ si Mawu.—Yuda 6.

Bɔ Nɛ A To Mawu Bɔfo Ɔmɛ A He Blɔ Nya Ha

Bɔfo nɔkɔtɔma Mikael. Lɛ ji bɔfo ɔmɛ a nyatsɛ, ejakaa e ngɛ he wami kɛ he blɔ ngua pe bɔfo kpa amɛ tsuo. Ngmami ɔ ma nɔ mi kaa Mikael ji biɛ kpa nɛ a kɛ tsɛɔ Yesu Kristo.—1 Tesalonika Bi 4:16; Yuda 9.

Serafhi a kuu ɔ ji bɔfohi a kuu nɛ a nɔ kuɔ wawɛɛ nɛ a ngɛ hɛ mi nyami kɛ he blɔ pe bɔfo kpa amɛ. A ji sɔmɔli nɛ a bɔle Mawu matsɛ sɛ ɔ kɛ kpe.—Yesaya 6:1-3.

Kerubhi a kuu ɔ hu ji bɔfohi a kuu nɛ a nɔ kuɔ nɛ a ngɛ blɔ nya ní tsumi klɛdɛɛ ko nɛ kɔɔ Ope ɔ hɛ mi nyami womi he. Be babauu ɔ, a tuɔ a he munyu kaa mɛ nɛ Mawu tsɔɔ.—1 Mose 3:24; Ezekiel 9:3; 11:22.

Bɔfohi akpe nyɔngmahi abɔ kpahi nɛ a ji tsɔli ɔ tsuɔ ní kaa Ope ɔ nane mi dali kɛ e tsɔli nɛ a tsuɔ Mawu yi mi tomihi a he ní.a—Hebri Bi 1:7, 14.

a Ke o ngɛ hlae nɛ o le babauu kɛ kɔ bɔfohi a he ɔ, moo hyɛ womi nɛ Yehowa Odasefohi pee nɛ ji, Mɛni Baiblo ɔ Ma Nyɛ Maa Tsɔɔ Wɔ? yi 10 kɛ munyu nɛ ji “Bɔfo Nɔkɔtɔma Mikael” nɛ ngɛ nyagbe ningma a mi ɔ. O ma nyɛ maa gbla ngɛ www.jw.org/ada.