Mo Hla Anɔkuale ɔ

Jeha akpehi abɔ nɛ be ɔ, nɔ ko nɔ ko li nɔ́ tutuutu nɛ haa nɛ wa nuɔ hiɔ. Enɛ ɔ ha nɛ hiɔ komɛ nɛ a sãa nɔ gbe nihi ayɔhi abɔ. Se pee se ɔ, je mi si kpali ba le nɔ́ nɛ haa nɛ wa nuɔ hiɔ. A ba na kaa muawahi lɛ a haa nɛ wa nuɔ hiɔ. Anɔkuale nɛ ɔ nɛ a ba le ɔ ye bua nɛ nihi ye a he ngɛ hiɔ komɛ a he nɛ a nyɛ nɛ a na ekomɛ hu a he tsopa. Enɛ ɔ ha nɛ nihi ayɔ akpehi abɔ ná nɔmlɔ tso mi he wami kpakpa, nɛ a se kɛ ngɛ je mi.

Nɛ sane bimi kpahi nɛ a he hia amɛ hu nɛɛ? Kɛ sane bimihi nɛ nyɛɛ se nɛ ɔmɛ a heto nɛ o ma hla a maa ye bua mo ha kɛɛ?

• Mɛnɔ ji Mawu?

• Mɛnɔ ji Yesu Kristo?

• Mɛni ji Mawu Matsɛ Yemi ɔ?

• Mɛni maa ba hwɔɔ se?

Nihi ayɔhi abɔ na sane bimi nɛ ɔmɛ a heto, nɛ lɔ ɔ tsake a si himi nɛ a si himi ba pee kpakpa. Mo hu sane bimi nɛ ɔmɛ a heto nɛ o maa na a ma nyɛ maa ye bua mo.

ANƐ O MA NYƐ MAA NA ANƆKUALE Ɔ LO?

Eko ɔ, o ma bi ke, ‘Anɛ nɔ ko ma nyɛ maa le anɔkuale nɛ kɔɔ nɔ́ ko he lo?’ E be gbɔjɔɔ kaa nɔ ko maa le anɔkuale nɛ kɔɔ níhi fuu a he. Mɛni he je?

Nihi fuu he we amlaalohi, ní tsumi hehi loo oposide ngmali yi kaa a ma nyɛ ma de mɛ anɔkuale nɛ kɔɔ nɔ́ ko he. E he waa kɛ haa nihi kaa a maa le ke ji níhi nɛ nihi deɔ mɛ ɔ ji anɔkuale loo e ji nɔ́ ko nɛ a po de loo pi anɔkuale ɔ tsuo nɛ a ngɛ dee loo pe a ngɛ lakpa yee. Akɛnɛ nihi he we a sibi yi, nɛ níhi fuu nɛ nihi deɔ ɔ ji lakpa he je ɔ, ke nɔ ko ngɛ mɛ anɔkuale nɛ e maa sa a he ɔ dee po ɔ, a kplɛɛ we nɔ.

Ngɛ nyagba nɛ ɔmɛ tsuo a se ɔ, o ma nyɛ maa na hetohi nɛ da kɛ ha si himi ɔ mi sane bimihi nɛ a he hia amɛ. Ngɛ mɛni blɔ nɔ? Wa peeɔ níhi a mi hlami kɛ hlaa anɔkuale nɛ ngɛ sane ko mi, nɛ wa ma nyɛ maa pee jã kɛ hla sane bimihi nɛ a he hia amɛ hu a heto.

WA HLAA ANƆKUALE NƐ NGƐ SANE KO MI

Ke e hí kulaa a, daa ligbi ɔ, o hlaa anɔkuale nɛ kɔɔ nɔ́ ko he. Mo susu Jessica si fɔfɔɛ ɔ he nɛ o hyɛ. E de ke: “Ke ye biyo ɔ ye akate (gigɛ) aloo nɔ́ ko nɛ a kɛ akate (gigɛ) nyafii wo mi po ɔ, e ma nyɛ maa ye lɛ awi.” E he hia nɛ Jessica nɛ le ke ji niye ní nɛ e ma he ha e biyo ɔ maa hi ha lɛ lo. E de ke: “Ke ma he niye ní ko ɔ, nɔ́ nɛ i peeɔ kekleekle ji kaa, i kaneɔ nɔ́ nɛ a ngma ngɛ niye ní ɔ he ɔ, konɛ ma le níhi nɛ a kɛ pee. Lɔ ɔ se ɔ, i peeɔ níhi a mi hlami nɛ i fiaa ní tsumi he nɛ pee niye ní ɔ, konɛ ma le ke ji a ngɔ nɔ́ ko nɛ akate (gigɛ) ngɛ mi kɛ wo niye ní ɔ mi. Jehanɛ se hu ɔ, i hlaa níhi a mi ngɛ he kpahi hulɔ konɛ ma ná nɔ mi mami kaa niye ní ɔ maa hi ha ye biyo ɔ lo.”

Eko ɔ, sane bimihi nɛ o hlaa a heto ngɛ o si himi mi ɔ he hia we tsɔ kaa Jessica nɔ́ ɔ, se kaa bɔ nɛ Jessica pee ɔ, mo hu o ma nyɛ maa pee níhi nɛ nyɛɛ se nɛ ɔmɛ kɛ hla o sane bimi ɔmɛ a heto:

• Mo hla anɔkuale ɔ.

• Moo pee níhi a mi hlami fuu.

• Moo hyɛ nɛ hehi nɛ o maa pee níhi a mi hlami ɔ ngɛ ɔ nɛ pee hehi nɛ nihi ma nyɛ maa fĩa kɛ fɔ a nɔ.

Blɔ nɛ ɔmɛ a nɔ nɛ o maa gu ɔ maa ye bua mo konɛ o na sane bimihi nɛ a he hia amɛ a heto. Ngɛ mɛni blɔ nɔ?

WOMI NƐ MA NYƐ MAA TSƆƆ WƆ ANƆKUALE Ɔ

Benɛ Jessica ngɛ Baiblo ɔ mi anɔkuale ɔ hlae ɔ, e ngɔ blɔ nɔ nɛ e guɔ kɛ hlaa niye ní nɛ sa ha e bi ɔ kɛ tsu ní. E de ke, “Níhi nɛ i kaneɔ saminya kɛ níhi a mi hlami nɛ i pee ɔ ye bua mi nɛ i na anɔkuale ɔ ngɛ Baiblo ɔ mi.” Kaa bɔ nɛ Jessica ba na anɔkuale ɔ, nihi ayɔhi abɔ hu ba kase nɔ́ nɛ Baiblo ɔ de ngɛ sane bimihi nɛ nyɛɛ se nɛ ɔmɛ a he:

• Mɛni he je nɛ wa ba je ɔ mi ngɛ?

• Mɛni si fɔfɔɛ mi nɛ ni gbogboe ɔmɛ ngɛ?

• Mɛni he je nɛ wa ngɛ nɔ́ nae?

• Mɛni Mawu maa pee kɛ po nɔ́ nami se?

• Mɛni wa ma nyɛ maa pee konɛ wa weku si himi nɛ pee bua jɔmi?

O ma nyɛ maa na sane bimi nɛ ɔmɛ kɛ ekpahi a heto kɛ gu Baiblo ɔ nɛ o maa kane kɛ jehanɛ se hu, níhi a mi hlami nɛ o maa pee ngɛ www.jw.org ɔ nɔ ɔ.