Ngmɔ Ɔmɛ Gba Futaa Kɛ Ha Ní Kpami
1. Mɛni nítsumi nɛ e he hia lɛ ngɛ nɔ yae amlɔ nɛ ɔ?
1 Benɛ Yesu ye Samaria yo ko odase ta a, e de e kaseli ɔmɛ ke: ‘Nyɛɛ hyɛ ngmɔ ɔmɛ a nɔ kɛ kpe, nɛ nyɛ maa na kaa a gba futaa kɛ ha ní kpami.’ (Yoh. 4:35, 36) Yesu nyɛ nɛ e na kɛ sɛ hlami bɔnɛ a ma tsu mumi mi ní kpami nítsumi ko nɛ ngɛ nɔ yae ngɛ je kɛ wɛ ɔ ha. Yesu ngɛ hiɔwe, se e yaa nɔ nɛ e ngɔɔ e he kɛ woɔ ní kpami nítsumi ɔ mi. (Mat. 28:19, 20) Mɛni odase yemi lɛ tsɔɔ kaa ke nítsumi nɛ ɔ ma nyagbe ɔ, e yi ma bli?
2. Mɛni nɔ yami lɛ tsɔɔ kaa je kɛ wɛ ní kpami nítsumi ɔ ngɛ nɔ yae wawɛɛ?
2 Ní Kpami Ngɛ Je Kɛ Wɛ: Ke a gba fiɛɛli a yibɔ nɛ wa ná ngɛ jeha 2009 sɔmɔmi jeha a mi ɔ mi lafa a, e mi etɛ kɛ se ji ni hehi nɛ wa ná. Ke a gba fiɛɛli a yibɔ nɛ a ná ngɛ mahi nɛ a tsi fiɛɛmi nítsumi ɔ nya ngɛ a nɔ ɔ mi lafa a, e mi 14 ji ni hehi nɛ a ná. Baiblo mi nikasemi nɛ a pee daa nyɔhiɔ ɔ hiɛ pe 7,619,000—yibɔ nɛ ɔ hiɛ pe fiɛɛli a yibɔ nɛ hiɛ pe kulaa nɛ wa ná a, nɛ jehanɛ se hu e hiɛ pe Baiblo mi nikasemi he akɔtaa bumi nɛ a bɔ he amaniɛ ngɛ jeha nɛ be ɔ mi ɔ maa pee akpe lafa enuɔ sɔuu. Be mi nɛ nítsumi ɔ ngɛ hɛ mi yae mlamlaamla ngɛ mahi fuu a nɔ ɔ, nihi ngɛ bie konɛ a wo ma se sane kpakpa fiɛɛli nɛ a tsɔse mɛ ngɛ Gilead sukuu ɔ blɔ kɛ ba nɛ a ba ye bua mɛ. Ngɛ mahi fuu a nɔ ɔ, sane kpakpa a nɛ a ngɛ fiɛɛe kɛ ngɛ nihi nɛ tuɔ ma se gbi hae ɔ ngɛ yiblii woe wawɛɛ nitsɛ. E ngɛ heii kaa Yehowa ngɛ ní kpami nítsumi ɔ fo woe be mi nɛ e ma nyagbe ɔ. (Yes. 60:22) Anɛ o ngɛ nihi nɛ a ngɛ o zugba kpɔ ɔ mi ɔ a he juɛmi kpakpa lo?
3. Mɛni ji nɔ́ nɛ eko ɔ, ni komɛ ma de ngɛ ní kpami ngɛ a zugba kpɔ ɔ mi ɔ he?
3 Ní Kpami Ngɛ O Zugba Kpɔ ɔ Mi: Eko ɔ, ni komɛ ma de ke, “Nihi bui munyu ɔ tue ngɛ ye zugba kpɔ ɔ mi.” E ji anɔkuale kaa zugba kpɔ komɛ ngɛ nɛ nihi bui munyu ɔ tue kaa bɔnɛ a buɔ tue ngɛ zugba kpɔ kpahi a mi ɔ, aloo kaa bɔnɛ a bu tue be ko nɛ be ɔ mohu. Enɛ ɔ ma nyɛ ma ha nɛ Odasefoli komɛ maa ma nya si kaa nihi tsuo nɛ a maa bu munyu ɔ tue ngɛ zugba kpɔ nɛ ɔmɛ a mi ɔ, lɛ a bu tue ɔ nɛ, nɛ nɔ́ nɛ e piɛ kɛkɛ ji kaa a ma hla ni kakaakahi nɛ a nine sui a nɔ ɔ a se blɔ. Anɛ jã ji sane ɔ lo?
4. Mɛni ji juɛmi kpakpa nɛ sa kaa wa ná ngɛ wa sɔmɔmi nítsumi ɔ he, nɛ mɛni heje?
4 E sa nɛ waa kɛ kã nɛ tsu ní kpami nítsumi ɔ kɛ je sisije kɛ ya si nyagbe. Mo kadi hɛdɔ nɛ ngɛ Yesu munyu nɛ ɔ mi ɔ: “Ngmɔ ɔ ba ní saminya; se mohu apaatsɛmɛ ɔmɛ lɛ a he pi. Lɔɔ he ɔ, nyɛ kpa ngmɔtsɛ ɔ pɛɛ, konɛ e wo apaatsɛmɛ blɔ kɛ ba bua ní nya.” (Mat. 9:37, 38) Yehowa nɛ ji Ngmɔtsɛ ɔ lɛ e le be nɛ ní kpami ɔ maa ya nɔ babauu, kɛ he nɛ e maa ya nɔ ngɛ. (Yoh. 6:44; 1 Kor. 3:6-8) Wɔɔ lɛɛ mɛni ji wa nítsumi? Baiblo ɔ ha heto ke: “Du ní mɔtu kɛ gbɔkuɛ tsuo.” (Fiɛlɔ 11:4-6) Niinɛ, pi be nɛ ní kpami nítsumi ɔ ma nyagbe nɛ ɔ nɛ wa kɔni ma gbo!
5. Mɛni heje e sa nɛ waa ya nɔ nɛ waa ngɔ kã kɛ fiɛɛ kɛ tsɔɔ nihi nɛ a ngɛ zugba kpɔ nɛ ngɛ kaa nɔ́ nɛ a bui munyu ɔ tue ngɛ mi ɔ mi?
5 Yaa Nɔ Nɛ O Tsu Ní Kpami Nítsumi ɔ: Ke wa fiɛɛ ngɛ wa zugba kpɔ ɔ mi si abɔ nɛ e pee kaa nɔ́ nɛ nihi nɛ a ngɛ mi ɔ bui munyu ɔ tue po ɔ, wa ngɛ yi mi tomi kpakpa heje nɛ sa kaa waa ngɔ kã kɛ fiɛɛ nɛ wa ko to tsle. (2 Tim. 4:2) Haomihi nɛ ngɛ hɛ mi yae ngɛ je ɔ mi wawɛɛ ɔ haa nɛ nihi tsakeɔ a subai nɛ a susuɔ a hwɔɔ se si himi he wawɛɛ. Be mi nɛ jokuɛwi ngɛ wae ɔ, e ma nyɛ maa pee mɛ kaa e he hia nɛ a ná slɔkee si himi kɛ tue mi jɔmi. Jehanɛ se hu ke wa ya nɔ nɛ wa fiɛɛ ɔ, lɔɔ ma nyɛ ma ha nɛ ni kpahi hu maa bu wɔ tue. Niinɛ nihi nɛ a bui wɔ tue be ko nɛ be ɔ, ma nyɛ maa bu wɔ tue be kpa mi. E sa nɛ waa bɔ nihi nɛ jeɔ blɔ nɛ a kuaa wa munyu ɔ po kɔkɔ.—Ezek. 2:4, 5; 3:19.
6. Ke nihi bui munyu ɔ tue ngɛ wa zugba kpɔ ɔ mi ɔ, mɛni maa ye bua wɔ nɛ wa maa ya nɔ maa fiɛɛ kɛ kã?
6 Ke nihi bui munyu ɔ tue ngɛ wa zugba kpɔ ɔ mi ɔ, mɛni maa ye bua wɔ nɛ wa maa ya nɔ maa fiɛɛ kɛ kã? Eko ɔ, wa ma nyɛ maa ngɔ wa he kɛ wo odase nɛ a yeɔ ngɛ nítsumi he loo tɛlifoo nɔ ɔ mi kɛ piɛɛ wehi a mi fiɛɛmi nɛ wa fiɛɛɔ ɔ he. Aloo wa ma nyɛ ma tsake munyu nɛ waa kɛ yaa fiɛɛmi ɔ hɛ mi konɛ e pee nɔ́ ehe kɛ ha wa tue buli ɔmɛ. Wa ma nyɛ ma tsake be nɛ waa kɛ yaa fiɛɛmi ɔ hu hɛ mi; wa ma nyɛ maa ya fiɛɛmi ɔ gbɔkuɛ loo ngɛ be nɛ wa ma nyɛ ma na nihi ngɛ a wehi a mi ɔ nɔ. Wa ma nyɛ maa kase gbi kpa konɛ wa nyɛ nɛ waa fiɛɛ sane kpakpa a kɛ ha nihi fuu hulɔ. Jehanɛ se hu, wa ma nyɛ ma bli wa sɔmɔmi nítsumi ɔ mi kɛ gu wa he nɛ waa kɛ maa wo blɔ gbami nítsumi ɔ mi ɔ nɔ. Loo wa ma nyɛ maa hia kɛ ho he ko nɛ ní kpali babauu a he hia ngɛ ya. Ke wa bua jɔ ní kpami nítsumi ɔ he ɔ, lɔɔ ma ha nɛ wa maa bɔ mɔde nɛ wa maa ngɔ wa he kɛ wo nítsumi nɛ he hia nɛ ɔ mi wawɛɛ.
7. Mɛni be lɛ wa maa ya nɔ ma tsu ní kpami nítsumi ɔ kɛ ya si?
7 Be bɔɔ pɛ lɛ ngmɔ huli ngɛ nɛ a kɛ buaa a ngmɔ ní nya, enɛ ɔ he ɔ, a jɔɔ we a he, nɛ a tui tsle, ja a gbe nítsumi ɔ nya. Jã kɛ̃ lɛ e sa kaa wa hɛ nɛ dɔ ngɛ mumi mi ní kpami nítsumi ɔ he. Mɛni be lɛ wa maa ya nɔ ma tsu ní kpami nítsumi ɔ kɛ ya si? Wa maa ya nɔ ma tsu kɛ gblee ‘je nɛ ɔ nyagbe ligbi ɔmɛ a mi’ kɛ ya si “nyagbe ɔ maa ba.” (Mat. 24:14; 28:20) Kaa bɔnɛ Yehowa Sɔmɔlɔ kpanaa a pee ɔ, wɔ hu wa suɔ kaa waa gbe nítsumi nɛ a ngɔ kɛ wo wa dɛ ɔ nya. (Yoh. 4:34; 17:4) Enɛ ɔ he ɔ, nyɛ ha nɛ waa kɛ bua jɔmi, kɛ kã, kɛ juɛmi nɛ da nɛ tsu wa sɔmɔmi nítsumi ɔ kɛ ya si nyagbe. (Mat. 24:13) Ní kpami nítsumi ɔ bɛ nyagbe lolo!
[Bua jɔmi munyu nɛ a ma nɔ mi ngɛ ba fa 2]
E sa nɛ waa kɛ kã nɛ tsu ní kpami nítsumi ɔ kɛ je sisije kɛ ya si nyagbe