Sɛ Womi Nɛ Je Nɔyemi Kuu ɔ Ngɔ
Wa Nyɛmimɛ Yehowa Odasefoli Nɛ Wa Suɔ:
Be nɛ wa ngɛ mi nɛ ɔ ji bua jɔmi be! Wa bua jɔ wawɛɛ nitsɛ! Wa nyɛmimɛ nyumuhi kɛ yihi nɛ wa suɔ nyɛ sane, wa bua jɔ kaa nyɛɛ kɛ wɔ “pee kake” kɛ ngɛ wa hiɔwe Tsɛ Yehowa he odase yee wawɛɛ.—Zef. 3:9; Yoh. 14:12.
Bua jɔmi nɛ wa ngɛ náe ngɛ Yehowa sɔmɔmi mi ɔ tsɔɔ we kaa waa kɛ haomihi nɛ a mi wa kpi. Ngɛ sɔmɔmi jeha nɛ be ɔ mi ɔ, zugba nɛ mimiɛ, kɛ nyu nɛ je nihi, kɛ kɔɔhiɔ nɛ nya wa nɛ fia, kɛ adebɔ nya oslaa kpahi nɛ ma nyɛ ma kpata adesa hɛ mi ɔ hao nyɛ ti ni komɛ. (Mat. 24:7) Nyɛ ti nihi fuu ngɛ nɛ hiɔ kɛ bwɔmi ha nɛ nyɛ ngɛ nɔ́ nae wawɛɛ. E sa nɛ wɔ tsuo wa mia wa hɛ mi nɛ waa da “kɔɔmi” nɛ ɔ nɛ mi ngɛ wae daa ligbi ɔ nya. (Mat. 24:8) Ngɛ mahi fuu nɛ Armenia, Eritrea, kɛ South Korea piɛ he ɔ a nɔ ɔ, a wo wa nyɛmimɛ fuu tsu ngɛ a hemi kɛ yemi ɔ heje.—Mat. 24:9.
Ngɛ haomi nɛ ɔmɛ tsuo nɛ waa kɛ ngɛ kpee ɔ se ɔ, mɛni ye bua wɔ nɛ loloolo ɔ, wa ngɛ bua jɔmi? Jeha 2010 ngmami ɔ kai wɔ nɔ́ titli nɛ ha nɛ wa ngɛ bua jɔmi: ‘Suɔmi toɔ e tsui si ngɛ nɔ́ tsuaa nɔ́ mi. Suɔmi se pui gblegbleegble.’ (1 Kor. 13:7, 8) Niinɛ, suɔmi nɛ wa ngɛ kɛ ha Yehowa kɛ wa nyɛmimɛ ɔmɛ ji nɔ́ nɛ woɔ wɔ he wami nɛ wa nyɛɔ nɛ wa daa haomihi nɛ waa kɛ kpee ɔ a nya a nɛ.
E peeɔ nihi babauu nɛ a tsɛɛɔ a he ke Kristofoli ɔ nyakpɛ kaa wa yaa nɔ nɛ wa fiɛɛɔ daa. E ngɛ mi kaa a kplɛɛ we wa hemi kɛ yemi kɛ wa tsɔɔmi ɔmɛ a nɔ mohu lɛɛ, se a ti ni komɛ po de ke, “Nítsumi nɛ nyɛ ngɛ tsue ɔ ji nítsumi nɛ e sa kaa Kristofoli tsuo nɛ a tsu!” Mɛni heje nɛ Yehowa Odasefoli fiɛɛɔ daa a? Sane bimi nɛ ɔ hu heto ji suɔmi. Kaa bɔnɛ wa hiɔwe Tsɛ ɔ sume nɛ nɔ ko hɛ mi nɛ kpata a, jã nɔuu kɛ̃ lɛ wɔ hu wa sume kaa nɔ ko hɛ mi nɛ kpata. (2 Pet. 3:9) Fiɛɛli a yibɔ ehe nɛ ji 7,508,050 nɛ wa ná ngɛ sɔmɔmi jeha nɛ be ɔ mi ɔ, tsɔɔ kaa wa suɔ nɛ nihi tsuo nɛ a tsake a tsui. Ngɛ Yehowa Odasefoli a se ɔ, anɛ jami kpa ko hu pa ngɛ nɛ e mi bimɛ ɔmɛ tsuo jeɔ a tsui mi nɛ a kɛ a he woɔ fiɛɛmi nítsumi ɔ mi kɛ kã lo?
Yesaya gbami munyu nɛ nyɛɛ se nɛ ɔ nɛ wa na kaa e ngɛ mi bae ɔ woɔ wɔ he wami: ‘Ngɛ nyagbe ligbi ɔmɛ a mi ɔ, Yehowa we ɔ maa ma yo gagaa ko yi mi; yo nɛ ya hiɔwe gojoo pe yo ɔmɛ tsuo yi mi e maa ma. Je ma amɛ tsuo ma bu yuu kɛ ba e he.’ ( Yes. 2:2-4) Nihi nɛ a bu yuu kɛ ba Yehowa we ɔ a kpɛti nihi ji nimli 294,368 nɛ a baptisi mɛ ngɛ sɔmɔmi jeha nɛ be ɔ mi ɔ nɛ. Wa ngɛ nihi nɛ wa suɔ a sane wawɛɛ nɛ ɔ a he nyae kɛ ba asafo ɔ mi. Nyɛ ha nɛ suɔmi nɛ wa ngɛ kaa Kristofoli ɔ nɛ wo wɔ he wami nɛ waa ya nɔ nɛ waa ye bua mɛ konɛ a nyɛ nɛ a da haomihi nɛ wa he nyɛlɔ Satan Abosiami kɛ ngɛ a nɔ bae ɔ nya.—1 Pet. 5:8, 9.
Nimli a yibɔ ehe nɛ ji 18,706,895 nɛ a ya Kaimi ɔ yemi ngɛ Pɛplɛgbi, March 30, 2010, tsɔɔ kaa nimli ayɔhi abɔ pa ngɛ loloolo nɛ a ma ba piɛɛ wa he kɛ sɔmɔ Yehowa. Wa ma nyɛ ma ná bua jɔmi kaa Yehowa kpataa we je yaya nɛ ɔ hɛ mi lolo! Se loko jamɛ a be ɔ maa su ɔ, suɔmi nɛ wa ngɛ ɔ maa ye bua wɔ konɛ waa ya nɔ nɛ waa to wa tsui si.—2 Tes. 3:5.
“Hii Yehowa Kasa Mi!” Kpe Ngua a nɛ a pee fuu ngɛ je ɔ mi tsuo ngɛ jeha 2010 ha nɛ huɛ bɔmi nɛ ngɛ waa kɛ wa hiɔwe Tsɛ Yehowa wa kpɛti ɔ mi wa. La polɔ ɔ munyu nɛ ɔmɛ ngɛ mi anɔkuale: ‘Nihi nɛ Yehowa ji a Mawu ɔ, a bua maa jɔ.’ (La 144:15) Ngɛ nɔ́ tsuaa nɔ́ nɛ maa ba hwɔɔ se tsuo se ɔ, wa ngɛ hɛ kɛ nɔ fɔmi kaa ke Yehowa ngɛ wa kasa nya a, wa be nɔ́ ko nɔ́ ko gbeye yee. (La 23:4) E be kɛe nɛ Yehowa maa gu e Bi ɔ nɔ kɛ ‘kpata níhi nɛ Abosiami tsu ɔ a hɛ mi.’ (1 Yoh. 3:8) Ngɛ anɔkuale mi ɔ, waa kɛ bua jɔmi ngɛ jamɛ a ligbi ɔ blɔ hyɛe! Se loko jamɛ a be ɔ maa su ɔ, wa ngɛ nítsumi babauu nɛ wa ma tsu.—1 Kor. 15:58.
Nyɛ na nɔ mi mami kaa ‘wa kaiɔ nyɛ daa nɛ wa jɔɔ we ngɛ wa sɔlemi mi.’ (Rom. 1:9) Nyɛɛ ya nɔ nɛ ‘nyɛɛ to nyɛ he ngɛ Mawu suɔmi ɔ mi, nɛ nyɛɛ hyɛ wa Nyɔmtsɛ Yesu Kristo mɔbɔ nami ɔ blɔ, konɛ nyɛ ná neneene wami.’—Yuda 21.
Wa suɔ nyɛ tsuo!
Nyɛ nyɛmimɛ,
Yehowa Odasefoli A Nɔyemi Kuu ɔ