Moo To Blɔ Nya Nɔuu Nɛ́ O Bli O Sɔmɔmi Nítsumi ɔ Mi
1. Mɛni sa kadimi ngɛ Kaimi ɔ yemi be ɔ he, nɛ kɛ o ma plɛ kɛ dla o he kɛ ha jã peemi kɛɛ?
1 Be tsuaa be ngɛ Kaimi ɔ yemi be ɔ mi ɔ, wa náa he blɔ kɛ jeɔ Yehowa yi. (La 109:30) Blɔ kake nɔ nɛ o ma nyɛ maa gu kɛ na Nɔ nɛ e to kpɔmi nɔ́ ɔ he blɔ nya a si ɔ ji o sɔmɔmi nítsumi ɔ mi nɛ o ma bli ɔ. Anɛ o ma nyɛ maa pee jã ngɛ March nyɔhiɔ ɔ mi lo? Amlɔ nɛ ɔ ji be nɛ e sa kaa o to níhi a he blɔ nya nɛ o pee jã.—Abɛ 21:5.
2. Benɛ a je ngmlɛfia nɛ a kɛ tsuɔ blɔ gbali a wami nítsumi ɔ nɔ ngɛ April nyɔhiɔ ɔ mi jeha nɛ be ɔ, kɛ o kɛ ni kpahi nyɛ pee nyɛ ní ngɛ he ha kɛɛ?
2 Blɔ Gbali A Wami Nítsumi: Kekle jeha a, bua jɔmi hyi asafo ɔmɛ a mi tɔ benɛ nyɛmimɛ ná le kaa a je ngmlɛfia nɛ a kɛ tsuɔ blɔ gbali a wami nítsumi ɔ nɔ ngɛ April nyɔhiɔ ɔ mi ɔ. Nyɛminyumu ko ngma ke: “I ngɛ nɔ tsami sukuu yae nɛ i be deka nɛ ma kɛ tsu daa blɔ gbami nítsumi ɔ. Ma tsu blɔ gbali a wami nítsumi ɔ ngɛ April nyɔhiɔ ɔ mi. Ma ngma kaa ma ha ngmlɛfia 30 se ma bɔ mɔde kaa ma ná ngmlɛfia 50.” Nyɛmiyo ko nɛ e kɛ e be tsuo tsuɔ ní ɔ ngma ke: “Ngmlɛfia 30—ma nyɛ ma su he hluu tsɔ!” Benɛ a fia blɔ nya tomi nɛ ɔ he adafi ɔ, nyɛmiyo ko nɛ amlɔ nɛ ɔ, e ye jeha 80 kɛ se ɔ de ke: “He blɔ nɛ i ngɛ hlae ɔ nɛ i ná nɛ ɔ nɛ! Yehowa le kaa blɔ gbami nítsumi ɔ hi ha mi wawɛɛ!” Nihi nɛ a nyɛ we nɛ a tsu blɔ gbali a wami nítsumi ɔ hu tsu babauu ngɛ a sɔmɔmi nítsumi ɔ mi.
3. Mɛni yi mi tomihi a heje nɛ e sa kaa wa susu blɔ gbali a wami nítsumi ɔ he ngɛ March, April, kɛ May nyɔhiɔ ɔ mi ɔ he?
3 March nyɔhiɔ ɔ maa pee nyɔhiɔ nɛ e hi wawɛɛ nɛ waa kɛ ma tsu blɔ gbali a wami nítsumi ɔ konɛ wa ha ngmlɛfia 30 loo 50 nɛ a ngɛ hlae ɔ. Jehanɛ se hu ɔ, kɛ je Hɔ March 17 ɔ, wa ma gba nine fɔmi womihi kɛ ha nihi konɛ wa kɛ fɔ mɛ nine nɛ a ba piɛ wa he kɛ ye Kaimi ɔ ngɛ April 5. Nihi fuu a bua maa jɔ a he nɛ a kɛ maa wo sɔmɔmi nítsumi ɔ mi wawɛɛ ɔ he, nɛ enɛ ɔ ma ha nɛ a ma tsu blɔ gbali a wami nítsumi ɔ ngɛ April kɛ May nyɔhiɔ ɔmɛ a mi konɛ a kɛ ngmlɛfia 50 nɛ a ngɛ hlae ngɛ blɔ gbali a wali a dɛ ɔ nɛ ha.
4. Mɛni blɔ nɔ wa maa gu kɛ bli wa sɔmɔmi nítsumi ɔ mi, nɛ mɛni se wa ma ná?
4 Ke nyɛ ngɛ nyɛ weku Mawu Jami ɔ pee ɔ, nyɛ susu bɔnɛ weku ɔ mi bimɛ ɔmɛ a ti nɔ tsuaa nɔ ma plɛ kɛ bli e sɔmɔmi nítsumi ɔ mi ngɛ Kaimi yemi be ɔ mi ɔ he? (Abɛ 15:22) Nyɛ bi Yehowa nɛ e jɔɔ nyɛ mɔde bɔmi ɔmɛ a nɔ. (1 Yohane 3:22) Ke o bli o sɔmɔmi nítsumi ɔ mi ɔ, lɔɔ ma ha nɛ o ma je Yehowa yi, nɛ o bua maa jɔ wawɛɛ.—2 Kor. 9:6.