Mo Ha Nɛ Kaimi Be Nɛ ɔ Nɛ Pee Bua Jɔmi!
1. Mɛni ji blɔ kake nɛ o ma nyɛ maa gu nɔ kɛ ná bua jɔmi wawɛɛ ngɛ Kaimi be nɛ ɔ mi?
1 Anɛ o suɔ nɛ o ma ná bua jɔmi wawɛɛ ngɛ March, April, kɛ May nyɔhiɔ ɔmɛ a mi lo? Blɔ kake nɛ o maa gu nɔ kɛ ná ji, nɛ o ma bli o sɔmɔmi nítsumi ɔ mi, nɛ ke e maa hi ɔ, o pee blɔ gbali a walɔ. Mɛni blɔ nɔ nɛ enɛ ɔ ma ha nɛ o ma ná bua jɔmi?
2. Mɛni blɔ nɔ nɛ wa sɔmɔmi nítsumi ɔ mi nɛ wa ma bli ɔ ma ha nɛ wa ná bua jɔmi wawɛɛ ngɛ?
2 Mo Ná Bua Jɔmi Wawɛɛ: Yehowa bɔ wɔ nɛ wa ja lɛ konɛ wa ná bua jɔmi nɛ wa tsui nɛ nɔ wa mi. (Mat. 5:3) Jehanɛ se hu ɔ, e bɔ wɔ nɛ wa ná bua jɔmi ngɛ nɔ́ hami mi. (Níts. 20:35) Sɔmɔmi nítsumi ɔ haa nɛ wa tsuɔ ní enyɔ ɔ tsuo a he ní—wa jaa Mawu nɛ wa yeɔ bua nihi. Enɛ ɔ he ɔ, e fɔɔ si heii kaa ke wa tsu babauu ngɛ sɔmɔmi nítsumi ɔ mi ɔ, wa ma ná bua jɔmi wawɛɛ. Jehanɛ se ɔ, ke wa fiɛɛ babauu ɔ, wa he maa be wawɛɛ nitsɛ. Ke wa he be ɔ, wa ma ná he kɛ nɔ fɔmi, nɛ wa tsui be poe ke wa ya fiɛɛmi. Enɛ ɔ ma ha nɛ wa ma ná he blɔhi fuu kɛ ye nihi odase konɛ waa je Baiblo mi nikasemi sisi. Enɛ ɔmɛ lɛ haa nɔ bua jɔmi wawɛɛ ngɛ sɔmɔmi nítsumi ɔ mi ɔ nɛ.
3. Mɛni heje nɛ March kɛ April nyɔhiɔ ɔ maa hi saminya kɛ ha blɔ gbali a wami nítsumi ɔ?
3 March kɛ April nyɔhiɔ ɔ maa hi saminya kɛ ha blɔ gbali a wami nítsumi ɔ, ejakaa wa ma nyɛ maa hla kaa waa kɛ ngmlɛfia 30 loo 50 maa fiɛɛ. Jehanɛ se ɔ, kɛ je Hɔ, March 22, kɛ ya si Hɔɛgbi, April 14, nɛ ji Kaimi ligbi ɔ, waa kɛ bua jɔmi maa fɔ nihi nine nɛ a ba piɛɛ wa he kɛ ye Kaimi ɔ. Asafo ɔmɛ a mi maa pee kɛ bua jɔmi ejakaa nihi fuu kɛ ‘kake peemi’ ma tsu zugba kpɔ ɔ mi ní ngɛ be nɛ a to ɔ nya.—Zef. 3:9.
4. Ke wa suɔ kaa wa maa pee blɔ gbali a walɔ ɔ, mɛni e sa kaa waa pee?
4 To Blɔ Nya Amlɔ: Ke o tui blɔ nya lolo ɔ, lɛɛ moo ngɔ be kɛ susu o blɔ nya tomi he nɛ o hyɛ tsakemi nɛ o ma nyɛ maa pee konɛ o bli o sɔmɔmi ɔ mi ngɛ nyɔhiɔ kake loo nyɔhiɔ enyɔ mi. O kɛ sɔlemi nɛ susu he. (Yak. 1:5) O kɛ o weku ɔ kɛ nihi ngɛ asafo ɔ mi ɔ nɛ sɛɛ he ní. (Abɛ 15:22) O maa na kaa ke o be nɔmlɔtso mi he wami kpakpa ko loo o nítsumi ha we mo deka po ɔ, mo hu o ma nyɛ maa tsu blɔ gbali a wami nítsumi ɔ konɛ o ná bua jɔmi.
5. Ke wa bli wa sɔmɔmi nítsumi ɔ mi ngɛ Kaimi be ɔ mi ɔ, mɛni maa je mi kɛ ba?
5 Yehowa suɔ kaa e sɔmɔli nɛ a ná bua jɔmi. (La 32:11) Ke wa bɔ mɔde nɛ wa pee babauu ngɛ fiɛɛmi nítsumi ɔ mi ngɛ Kaimi be nɛ ɔ mi ɔ, pi wɔ pɛ nɛ wa ma ná bua jɔmi, wa hiɔwe Tsɛ ɔ hu bua maa jɔ.—Abɛ 23:24; 27:11.