Bɔnɛ O Maa Pee Ha Kɛ Ná O Fiɛɛmi Yami Kuu ɔ He Se
1. Mɛni ji níhi nɛ a peeɔ ngɛ Asafo Womi Mi Nikasemi ɔ sisi nɛ a ma nyɛ maa pee ngɛ fiɛɛmi yami kuu ɔmɛ a mi?
1 Anɛ o hɛ jaa ngɛ ní komɛ nɛ a peeɔ ngɛ Asafo Womi Mi Nikasemi sisi ɔ he lo? Jamɛ a be ɔ mi ɔ, kuu ɔmɛ kle we nɛ a kpeɔ ngɛ hehi nɛ nɔ tsuaa nɔ he jɔɔ lɛ. Enɛ ɔ ha nɛ e yi kɛ ha wɔ kaa wa maa bɔ huɛ nɛ maa ye kɛ bua wɔ konɛ wa hemi kɛ yemi ɔ mi nɛ wa. (Abɛ 18:24) Asafo womi mi nikasemi nɔ hyɛlɔ ɔ leɔ si fɔfɔɛ pɔtɛɛ mi nɛ wa ngɛ, nɛ e woɔ nihi nɛ ngɛ e kuu ɔ mi ɔ he wami. (Abɛ 27:23; 1 Pet. 5:2, 3) A ma nyɛ maa ya nɔ maa pee jã ngɛ fiɛɛmi yami kuu ɔmɛ a mi.
2. Mɛni blɔ nɔ wa maa gu konɛ wa ha nɛ huɛ bɔmi nɛ mi wa nɛ ma ha nɔ nane nɛ pi si ngɛ Mawu jami mi ɔ nɛ́ hi waa kɛ nihi nɛ ngɛ wa fiɛɛmi yami kuu ɔ mi ɔ wa kpɛti?
2 Moo Sɛ Hlami Nɛ O Pee: Fiɛɛmi yami kuu ɔmɛ a klemi ngɛ kaa asafo womi mi nikasemi kuu ɔmɛ nɔuu. Ke waa kɛ ni kpahi ‘pee kake kɛ tsu ní’ ngɛ fiɛɛmi nítsumi ɔ mi ɔ, e haa nɛ waa kɛ mɛ náa huɛ bɔmi nɛ mi wa. (Fil. 1:27) O kuu ɔ mi nihi enyɛmɛ nɛ o nyɛ nɛ o kɛ mɛ tsu ní ngɛ fiɛɛmi mi? Anɛ o ma nyɛ ma “bli o tsui mi” ngɛ enɛ ɔ peemi mi lo? (2 Kor. 6:13) Jehanɛ ɔ hu ɔ, ke e ngɛ mi hluu ɔ, wa ma nyɛ maa fɔ wa kuu ɔ mi nɔ ko nine konɛ e ba piɛɛ wa he kɛ pee wa gbɔkuɛ Weku Mawu Jami ɔ loo e kɛ wɔ nɛ ba ye ní. Ngɛ asafo komɛ a mi ɔ, a to blɔ nya nɛ fiɛɛmi yami kuu ɔmɛ peeɔ nɔ ko nɛ je asafo kpa mi nɛ e ba tu magbɛ nɔ munyu ngɛ a we asafo ɔ mi ɔ nubwɔ. Ke e su kuu ko nɔ kaa e pee nɔ nubwɔ ɔ, e mi bi ɔmɛ kpeɔ kɛ ha ní yemi kɛ he wami womi ke munyu tulɔ ɔ be lejɛ ɔ bae po.
3. Mɛni blɔ nya a to bɔnɛ pee nɛ a slaa wɔ konɛ a wo wɔ he wami ngɛ wa fiɛɛmi yami kuu ɔmɛ a mi?
3 E ngɛ mi kaa amlɔ nɛ ɔ, asafo ɔ kpeɔ si enyɔ pɛ ngɛ o tsi ɔ mi mohu lɛɛ, se lɔɔ tsɔɔ we kaa kuu nɔ hyɛli ɔmɛ be fiɛɛli ɔmɛ slaae kpamkpam. A hla kuu tsuaa kuu nɔ hyɛlɔ konɛ e wo ni kakaakahi nɛ a ngɛ kuu ɔ mi ɔ he wami nɛ e tsɔse mɛ ngɛ fiɛɛmi nítsumi ɔ mi. Ke o kuu nɔ hyɛlɔ ɔ kɛ mo yɛ fiɛɛmi ɔ, mɛni heje nɛ o de we lɛ kaa o suɔ nɛ o kɛ lɛ nɛ ya fiɛɛmi ɔ? Jehanɛ hu ɔ, fiɛɛmi nítsumi nɔ hyɛlɔ ɔ toɔ blɔ nya daa nyɔhiɔ nɛ e kɛ fiɛɛmi yami kuu ko yaa fiɛɛmi ngɛ otsi ko nyagbe. Ngɛ asafo wawihi nɛ fiɛɛmi yami kuu bɔɔ pɛ lɛ ngɛ mi ɔ a mi ɔ, fiɛɛmi nítsumi nɔ hyɛlɔ ɔ ma nyɛ maa to blɔ nya nɛ e ya slaa kuu tsuaa kuu si enyɔ ngɛ jeha mi. Anɛ o toɔ blɔ nya konɛ o ya fiɛɛmi ke e ba slaa o kuu ɔ lo?
4. (a) Kɛ a to fiɛɛmi yami kpe ɔ he blɔ nya ha kɛɛ? (b) Mɛni heje nɛ e sa kaa wa bua nɛ jɔ he kaa waa kɛ wa we ma ha konɛ a kpe ngɛ mi kɛ ya fiɛɛmi ɔ?
4 Behi fuu ɔ, se nami ngɛ he kaa kuu tsuaa kuu maa to e blɔ nya kɛ ya fiɛɛmi Hɔ kɛ Hɔgba. Ke nyɛ ná hehi fuu nɛ a maa kpe ngɛ kɛ ha fiɛɛmi yami ɔ ngɛ be kake mi ɔ, e be yee ha fiɛɛli ɔmɛ kaa a maa ya fiɛɛmi yami kpe ɔ, kɛ eko ɔ, zugba kpɔ ɔ mi hulɔ. Lɔɔ ma ha nɛ a ma gba fiɛɛli ɔmɛ oya konɛ a ya zugba kpɔ ɔ mi mla. Jehanɛ ɔ hu e peeɔ gbɔjɔɔ kɛ ha kuu nɔ hyɛlɔ ɔ kaa e maa ye bua e kuu ɔ mi bi ɔmɛ saminya. Se kɛ̃ ɔ, si fɔfɔɛ ko ma nyɛ maa bi nɛ kuu enyɔ loo nɔ́ nɛ be jã nɛ pee kake kɛ kpe ngɛ he ko kɛ ya fiɛɛmi. Ke asafo ɔ tsuo ba kpe ngɛ kekleekle Hɔ nɛ ngɛ nyɔhiɔ ɔ mi ɔ nɔ loo benɛ a gbe Hwɔɔmi Mɔ ɔ mi nikasemi ɔ nya a, e maa hi kaa a maa hi si ngɛ kuu nya kuu nya konɛ kuu nɔ hyɛlɔ ɔ nɛ kɛ be bɔɔ nɛ́ gba e kuu ɔ mi bi ɔmɛ loko a sɔle kɛ kpa fiɛɛmi yami kpe ɔ.—Hyɛ daka nɛ ji, “Anɛ O Ma Nyɛ Maa Ngɔ O We Kɛ Ha Lo?”
5. E ngɛ mi kaa wa kpa Asafo Womi Mi Nikasemi ɔ peemi mohu lɛɛ, se mɛni hɛ kɛ nɔ fɔmi wa ngɛ?
5 E ngɛ mi kaa wa kpa Asafo Womi Mi Nikasemi ɔ peemi mohu lɛɛ, se loloolo ɔ, Yehowa kɛ níhi tsuo nɛ e sa kaa wa ná konɛ waa pee e suɔmi nya ní ɔ haa wɔ. (Heb. 13:20, 21) Akɛnɛ Yehowa ji wa hyɛlɔ heje ɔ, nɔ́ ko hia we wɔ. (La 23:1) Wa náa jɔɔmihi babauu kɛ gu fiɛɛmi yami kuu ɔmɛ a nɔ. Ke wa sɛ hlami nɛ wa “du wu fuu ɔ,” wa ma “kpa ní babauu.” —2 Kor. 9:6.
[Foni he ningma ngɛ bafa 6]
Anɛ O Ma Nyɛ Maa Ngɔ O We Kɛ Ha Lo?
Asafo komɛ haa fiɛɛmi yami kuuhi nɛ pe kake kpeɔ kɛ yaa fiɛɛmi Hɔ kɛ Hɔgba akɛnɛ wehi nɛ a kpeɔ ngɛ mi ɔ pi heje. Fiɛɛmi yami kpe ɔ piɛɛ asafo ɔ blɔ nya tomi ɔ he, lɔɔ he ɔ, e ji he blɔ ngua kaa wa kɛ wa we ma ha konɛ a kpe ngɛ mi. Anɛ o ma nyɛ maa ngɔ o we kɛ ha lo? Ko susu kaa o we ɔ hí lɔɔ o be nyɛe kɛ ma ha. Asafo mi nikɔtɔma amɛ ma susu he nɛ o we ɔ ngɛ ɔ he, nɛ a maa hyɛ ní kpahi hulɔ kaa bɔnɛ a peeɔ ke a ngɛ hehi nɛ a kɛ ha kaa a pee asafo womi mi nikasemi ngɛ ɔ hyɛe ɔ. Ke o suɔ nɛ o kɛ o we ma ha a, mo de o kuu nɔ hyɛlɔ ɔ.