Blɔhi Enuɔ Nɛ Wa Maa Gu Nɔ Kɛ Ná Baiblo Mi Nikaseli
1. Ke e he wa kɛ ha mo kaa o ma ná nɔ ko ngɛ o zugba kpɔ ɔ mi nɛ o kɛ lɛ nɛ kase Baiblo ɔ, mɛni e sa kaa o pee? Nɛ mɛni heje?
1 Anɛ e he wa kɛ ha mo kaa o ma ná nɔ ko nɛ o kɛ lɛ maa kase Baiblo ɔ lo? O kɔni mi nɛ ko jɔ̃. Yehowa jɔɔ nihi nɛ suɔ kaa a maa pee e suɔmi nya ní nɛ a kɔni mi jɔ̃ we ɔ. (Gal. 6:9) Blɔ tsɔɔmihi enuɔ nɛ nyɛɛ se ɔ maa ye bua mo.
2. Mɛni ji blɔ nɛ ngɛ tɛɛ nɛ wa ma nyɛ maa gu nɔ kɛ je Baiblo mi nikasemi sisi?
2 Mo Bi Nɔ ɔ Tɛɛ Kaa E Maa Suɔ Nɛ O Kɛ lɛ Nɛ Kase Baiblo ɔ Lo: Nihi babauu le kaa waa kɛ Hwɔɔmi Mɔ kɛ Awake! lɛ haa nihi, se eko ɔ, a li kaa waa kɛ mɛ peeɔ Baiblo mi nikasemi. Ke o ngɛ fiɛɛe ngɛ wehi a mi ɔ, mɛni heje nɛ o bi we nihi tɛɛ keji a suɔ nɛ o kɛ mɛ nɛ ba kase Baiblo ɔ lo? Ke o ya slaa nihi nɛ ngɛ munyu ɔ he bua jɔmi ɔ, o ma nyɛ ma bi mɛ keji a suɔ nɛ o kɛ mɛ nɛ ba kase Baiblo ɔ lo? Ke a kplɛɛ we nɔ ɔ, o ma nyɛ maa ya nɔ nɛ o ha mɛ womihi bɔnɛ pee nɛ a bua jɔmi ɔ nɛ ko ba si. Nyɛminyumu ko ya nɔ nɛ e ha nɔ ko kɛ e yo womi tɛtlɛɛ ɔ jehahi babauu. Be ko nɛ́ e kɛ womi tɛtlɛɛ ɔ ehe ɔ eko ya ha mɛ ɔ, e plɛ e he nɛ e maa je kɛkɛ nɛ e kai nɛ e bi mɛ ke: “Anɛ nyɛ maa suɔ nɛ i kɛ nyɛ nɛ ba kase Baiblo ɔ lo?” E pee lɛ nyakpɛ kaa a kplɛɛ nɔ. Amlɔ nɛ ɔ, a baptisi mɛ.
3. Anɛ e sa kaa wa susu kaa nihi tsuo nɛ a baa asafo mi kpehi ɔ ngɛ nihi nɛ a kɛ mɛ kaseɔ Baiblo ɔ lo? Moo tsɔɔ nya.
3 Nihi Nɛ Baa Asafo Mi Kpehi: Ko susu kaa nihi tsuo nɛ ngɛ munyu ɔ he bua jɔmi nɛ a baa asafo mi kpehi ɔ ngɛ nihi nɛ kɛ mɛ kase ɔ Baiblo ɔ. Nyɛminyumu ko de ke: “Nihi nɛ i kɛ mɛ kaseɔ Baiblo ɔ a kpɛti nihi fuu ji nihi nɛ a ba asafo mi kpehi nɛ i kɛ mɛ sɛɛ ní.” Nyɛmiyo ko mwɔ e yi mi kpɔ kaa e maa hɛ kɛ su yo ko nɛ gboɔ zo nɛ ngɛ biyihi enyɔ nɛ a baptisi mɛ ngɛ asafo ɔ mi ɔ he konɛ e kɛ lɛ nɛ sɛɛ ní. Yo ɔ kɛ maa pee jeha 15 sɔuu ya kpe ngɛ Matsɛ Yemi Asa a nɔ, nɛ e suɔ lejɛ ɔ benɛ a maa je kpe ɔ sisi pɛ, nɛ ke a kpa pɛ kɛkɛ e je. Yo ɔ kplɛɛ nɔ kaa a kɛ lɛ nɛ kase Baiblo ɔ, nɛ pee se ɔ, e ba anɔkuale ɔ mi. Nyɛmiyo ɔ ngma ke: “E dɔ mi wawɛɛ kaa i mlɛ nɛ jeha 15 sɔuu be loko i bi keji e suɔ nɛ a kɛ lɛ nɛ́ kase Baiblo ɔ!”
4. Mɛni blɔ nɔ o maa gu nɛ o ha nɛ nihi nɛ a kɛ kaseɔ Baiblo ɔ kɛ fiɛɛli hu nɛ le kaa o ngɛ nihi hlae nɛ o kɛ maa kase Baiblo ɔ?
4 Bi Kaa Nɔ Ko Ngɛ Nɛ Maa Suɔ Nɛ O Kɛ Lɛ Nɛ Kase Baiblo ɔ Lo: Nyɛmiyo ko bɔɔ mɔde nɛ e ya yeɔ bua nyɛmimɛ kɛ peeɔ a Baiblo mi nikasemihi. Ke a kase ní ɔ ta a, e biɔ nɔ nɛ hyɛ nɔ ɔ blɔ, nɛ e biɔ nikaselɔ ɔ ke ‘Anɛ o le ni kpahi nɛ maa suɔ nɛ i kɛ mɛ nɛ kase Baiblo ɔ lo?’ Ke o kɛ Baiblo Tsɔɔmi womi ɔ ngɛ nɔ ko nɛ o yaa e ngɔ hae ɔ, o ma nyɛ ma bi lɛ ke: “Anɛ o le nɔ ko hu nɛ maa suɔ nɛ e ná womi nɛ ɔ eko lo?” Ngɛ be komɛ a mi ɔ, si fɔfɔɛ ɔ ha we fiɛɛli kɛ blɔ gbali he blɔ nɛ́ a kɛ nihi nɛ a kɛ kpeɔ ngɛ a zugba kpɔ ɔ mi ɔ nɛ pee Baiblo mi nikasemi. Lɔɔ he ɔ, ha fiɛɛli kpahi nɛ le kaa o ngɛ Baiblo mi nikaseli hlae.
5. Mɛni heje nɛ wa ma nyɛ ma bi wa nyɛmimɛ ɔmɛ a he piɛɛli nɛ be asafo ɔ mi ɔ keji a maa suɔ nɛ waa kɛ mɛ nɛ kase Baiblo ɔ lo ɔ?
5 Gba Si Himi Mi He Piɛɛli Nɛ A Be Asafo ɔ Mi: Anɛ fiɛɛli komɛ ngɛ nyɛ asafo ɔ mi nɛ a gba si himi mi he piɛɛli be asafo ɔ mi lo? Gba si himi mi he piɛɛli nɛ a be asafo ɔ mi ɔ ekomɛ sume kaa a he piɛɛli nɛ a ji Kristofoli ɔ kɛ mɛ tuɔ Baiblo mi munyu, se ke nɔ kpa ko de mɛ kaa e kɛ mɛ maa kase Baiblo ɔ, a maa kplɛɛ nɔ. Behi fuu ɔ, e hi saminya kaa o kɛ nyɛmi nɛ ji Kristofono ɔ ma susu he kɛ sɛ hlami konɛ o le blɔ kpakpa nɛ o maa gu nɔ kɛ pee enɛ ɔ.
6. Mɛni blɔ nɔ sɔlemi ma nyɛ maa ye bua mo wawɛɛ ke o ngɛ Baiblo mi nikaselɔ hlae?
6 Sɔlemi: Koo bu he wami nɛ sɔlemi ngɛ ɔ kaa nɔ́ ko nyafii. (Yak. 5:16) Yehowa wo wɔ si kaa ke wa bi lɛ nɔ́ ko ngɛ e suɔmi nya a, e maa bu wɔ tue. (1 Yoh. 5:14) Nyɛminyumu ko nɛ be deka kulaa sɔle konɛ e ná nɔ ko nɛ e kɛ lɛ nɛ kase Baiblo ɔ. E yo ɔ he we yi kaa e huno ɔ ma ná deka kɛ ha e Baiblo mi nikaselɔ, titli ɔ ke nikaselɔ ɔ ngɛ haomihi fuu ɔ. Lɔɔ he ɔ, e wo munyu nɛ ɔ nɔ ta kɛ tsɔɔ Yehowa benɛ e ngɛ sɔlee konɛ e huno ɔ nɛ́ e ná Baiblo mi nikaselɔ ɔ. A ha a sɔlemi ɔ heto ngɛ otsi enyɔ se benɛ blɔ gbalɔ ko ngɛ asafo ɔ mi ɔ na nyumu ko nɛ e suɔ nɛ a kɛ lɛ nɛ kase Baiblo ɔ, nɛ e kɛ lɛ ha nyɛminyumu ɔ. Nyɛminyumu ɔ yo ɔ ngma ke: “I ngɛ nihi tsuo nɛ a nuɔ he kaa e he wa kɛ ha mɛ kaa a ma ná Baiblo mi nikaseli ɔ dee kaa, ‘Ke o ngɛ sɔlee ɔ, bi nɔ́ tutuutu nɛ o ngɛ hlae ɔ, nɛ o sɔle ngɛ he daa.’ Wa bua jɔ wawɛɛ pe bɔnɛ i hyɛ blɔ ɔ.” Ke wa ha we nɛ wa kɔni mi nɛ wo nyu, nɛ wa ya nɔ nɛ wa hla Baiblo mi nikaselɔ ɔ, wɔ hu wa maa ye bua nɔ ko konɛ e ba nyɛɛ ‘blɔ nɛ kɛ nɔ yaa wami mi ɔ’ nɔ, nɛ wa ma ná bua jɔmi nɛ jɛɔ enɛ peemi mi kɛ baa a eko.—Mat. 7:13, 14.