Nyɛ Nya A He!
1. Mɛni ní peemi lɛ haa wɔ he blɔ nɛ se be nɛ́ wa kɛ ye nihi odase, nɛ mɛni heje?
1 Kaimi ɔ nɛ wa yeɔ daa jeha a ji he blɔ nɛ se be nɛ waa kɛ yeɔ nihi odase. Mo susu he nɛ o hyɛ: Jeha nɛ ɔ, wa ngɛ blɔ hyɛe kaa nibwɔhi nɛ a hiɛ pe ayɔ nyɔngma maa ya Kaimi ɔ, nɛ a maa bu munyu nɛ kɔɔ suɔmi enyɔ nɛ pe kulaa nɛ a je kpo kɛ tsɔɔ adesahi kɛ gu kpɔmi nɔ́ ɔ nɔ ɔ tue. (Yoh. 3:16; 15:13) A maa tsɔɔ mɛ jɔmihi nɛ Yehowa ma ha mɛ kaa nike ní ɔ. (Yes. 65:21-23) Se kɛ̃ ɔ, pi munyu tulɔ ɔ pɛ nɛ maa ye odase ngɛ be nɛ ɔ mi. Wɔ tsuo wa ma ná he blɔ kɛ ye odase babauu kɛ gu nibwɔ ɔmɛ a he nɛ wa ma nya a nɔ.—Rom. 15:7.
2. Mɛni blɔ nɔ wa maa gu kɛ nya nibwɔ ɔmɛ a he?
2 E sa nɛ o bɔ mɔde kaa o ma je o he si kɛ tsɔɔ nihi nɛ maa hi o kasa nya a pe nɛ o maa hi si nɛ o maa mlɛ konɛ a je ní peemi ɔ sisi. Eko ɔ, zo maa pee nibwɔ ɔmɛ loo a be bɔnɛ níhi maa ya nɔ ha a lee. Muɔ nɛ maa hi wa nya he nɛ wa ma nga mɛ kɛ bua jɔmi ɔ ma ha nɛ a hɛ maa mwɔ si. Ke o ngɛ hlae nɛ o le kaa nine fɔmi womi ɔ nɛ́ a ha nɔ ko heje nɛ e ba ngɛ ɔ, o ma nyɛ ma bi lɛ kaa enɛ ɔ ji e kekle be nɛ e ba wa kpe ɔ eko sisi loo e le nɔ ko ngɛ asafo ɔ mi. O ma nyɛ maa ha nɛ e hi o kasa mi konɛ o kɛ lɛ nɛ hyɛ o Baiblo kɛ o la womi ɔ mi. Ke Matsɛ Yemi Asa nɔ a maa ye Kaimi ɔ ngɛ ɔ, o ma nyɛ nɛ o tsɔɔ lɛ níhi nɛ ngɛ lejɛ ɔ. Ke a tu munyu ɔ ta a, bi lɛ kaa e ngɛ sane bimi ko nɛ e suɔ kaa a ha lɛ heto lo. Ke nyɛ asafo ɔ maa je oya konɛ asafo kpa nɛ ba a, o ma nyɛ ma de lɛ ke: “I suɔ nɛ ma le o juɛmi ngɛ ní peemi ɔ he. Mɛni blɔ nɔ ma gu kɛ na mo?” Lɔɔ se ɔ, moo to blɔ nya nɛ o ya slaa lɛ. E sa nɛ nikɔtɔma amɛ nɛ a pee klaalo kaa a maa wo nihi nɛ a kpa fiɛɛmi yami nɛ a ba a he wami.
3. Mɛni heje nɛ e he hia kaa waa bɔ mɔde nɛ waa nya nibwɔhi a he ngɛ Kaimi ɔ sisi ɔ?
3 Ngɛ nibwɔ ɔmɛ fuu a blɔ fa mi ɔ, enɛ ɔ maa pee kekle be nɛ a maa na bua jɔmi, tue mi jɔmi kɛ kake peemi nɛ ngɛ Yehowa webi a kpɛti ɔ. (La 29:11; Yes. 11:6-9; 65:13, 14) Mɛni ji nɔ́ nɛ nibwɔ ɔmɛ ma kai ngɛ Kaimi ɔ he? Enɛ ɔ daa si ngɛ bɔnɛ wa maa ye bua mɛ ha a nɔ.