Anɛ O Ngɛ O Hɛ Mi Yae Ngɛ Sɔmɔmi Ní Tsumi ɔ Mi Lo?
1. Mɛni lɛ ya nɔ ngɛ kaseli ɔmɛ a be ɔ mi nɛ tsɔɔ kaa e sa nɛ waa ya wa hɛ mi ngɛ fiɛɛmi ní tsumi ɔ mi?
1 E sa nɛ Kristofohi a ya a hɛ mi ngɛ a sɔmɔmi ní tsumi ɔ mi. Enɛ ɔ he je nɛ Yesu tsɔɔ e kaseli ɔmɛ ní konɛ a ya a hɛ mi ngɛ fiɛɛmi ní tsumi ɔ mi ɔ nɛ. (Luka 9:1-5; 10:1-11) Enɛ ɔ nɔuu he je nɛ Akuila kɛ Priskila a ngɔ Apolo kɛ ya a we mi nɛ ‘a tsɔɔ lɛ Mawu blɔ ɔ fitsofitso’ ɔ nɛ. (Níts. 18:24-26) Paulo hu wo Timoteo nɛ e ji fiɛɛlɔ nɛ e he be ɔ he wami kaa e ya nɔ nɛ e tsɔɔ ní saminya “konɛ nihi tsuo nɛ a na” e mɔde bɔmi ɔ nɛ. (1 Tim. 4:13-15) Ke wa ngɛ Nyɔmtsɛ ɔ sɔmɔe kaa sane kpakpa fiɛɛli jeha babauu ji nɛ ɔ po ɔ, e sa nɛ waa ya nɔ nɛ wa ha nɛ wa he nɛ be ngɛ fiɛɛmi ní tsumi ɔ mi.
2. Mɛni blɔ nɔ wa ma nyɛ maa gu kɛ kase ní kɛ je ni kpahi a ngɔ?
2 Moo Kase Ní Kɛ Je Ni Kpahi A Ngɔ: Blɔ kake nɛ wa ma nyɛ maa gu nɔ kɛ ya wa hɛ mi ji kaa wa maa kase ní kɛ je ni kpahi a ngɔ. (Abɛ 27:17) Enɛ ɔ he ɔ, ke nɔ nɛ o kɛ lɛ ya fiɛɛmi ɔ ngɛ fiɛɛe ɔ, moo pee totooto nɛ o bu lɛ tue. Mo bi ga womi kɛ je fiɛɛli nɛ a he be ɔ a ngɔ, nɛ o bu nɔ́ nɛ a ma de ɔ tue. (Abɛ 1:5) Anɛ o li bɔ nɛ o maa pee ha kɛ kpale ya slaa nɔ ko, loo bɔ nɛ o ma plɛ kɛ je Baiblo mi ní kasemi sisi, loo bɔ nɛ o maa plɛ kɛ tsu fiɛɛmi ní tsumi ɔ fã ko he ní ha lo? Ke jã a, mo bi nyɛ fiɛɛmi yami kuu nɔ hyɛlɔ ɔ, loo fiɛɛlɔ ko nɛ e he be nɛ e ye bua mo. Mo kai kaa Yehowa mumi klɔuklɔu ɔ maa ye bua mo. Enɛ ɔ he ɔ, e he hia nɛ o sɔle be tsuaa be.—Luka 11:13.
3. Kɛ e sa nɛ waa pee wa ní ha kɛɛ ke nyɛmi ko wo wɔ ga be mi nɛ wa bi we lɛ ga womi?
3 Ke o bi we ga womi, nɛ nɔ ko wo mo ga ngɛ bɔ nɛ o maa pee ha kɛ ya o hɛ mi he ɔ, o mi mi kó fu. (Fiɛlɔ 7:9) Moo kase Apolo, nɛ o je he si bami mi nɛ o kplɛɛ yemi kɛ buami nɔ. Jã a nɛ o maa pee ɔ maa tsɔɔ kaa o le ní.—Abɛ 12:15.
4. Mɛni he je nɛ Yesu tsɔɔ kaa e sa nɛ fiɛɛli nɛ a ya a hɛ mi ɔ?
4 Hɛ Mi Yami Woɔ Mawu Hɛ Mi Nyami: Yesu ngɔ nɔ́ hetomi nɔ́ kɛ tsu ní kɛ wo e kaseli ɔmɛ he wami konɛ a ya a hɛ mi ngɛ fiɛɛmi ní tsumi ɔ mi. Yesu ngɔ e he kɛ to wai tso he, nɛ e ngɔ e kaseli ɔmɛ kɛ to wai tso kɔnihi a he. E de kaa e tsɛ ɔ ma sã tso ɔ kɔni ɔmɛ tsuo a he konɛ a nyɛ nɛ a ‘wo yiblii fuu.’ (Yoh. 15:2) Kaa bɔ nɛ wai ngmɔtsɛ suɔ kaa e wai tso kɔnihi nɛ wo yiblii babauu ɔ, jã a kɛ̃ nɛ Yehowa hu suɔ kaa waa ya wa hɛ mi konɛ nɔ́ nɛ waa kɛ “wa nya jajeɔ” ɔ nɛ wo yiblii fuu. (Heb. 13:15) Ke fiɛɛli ya a hɛ mi ɔ, mɛni lɛ maa je mi kɛ ba? Yesu ha heto ke: “Yiblii babauu nɛ nyɛ woɔ ɔ, nyɛɛ kɛ woɔ Tsaatsɛ hɛ mi nyami.”—Yoh. 15:8.