Mo Nya Nibwɔ Ɔmɛ A He

Wa ngɛ blɔ hyɛe kaa ngɛ March 23 nɔ ɔ, nihi nɛ a hiɛ pe ayɔ 12, ma ba piɛɛ wa he kɛ ye Kaimi ɔ. Munyu tulɔ ɔ ma ná he blɔ kɛ ye mɛ odase ke e ngɛ kpɔmi nɔ́ ɔ, kɛ jɔɔmihi nɛ adesahi ma ná hwɔɔ se ɔ mi tsɔɔe ɔ! (Yes 11:6-9; 35:5, 6; 65:21-23; Yoh 3:16) Se ngɛ ligbi klɛdɛɛ nɛ ɔ nɔ ɔ, pi munyu tulɔ ɔ pɛ nɛ e ma ná he blɔ kɛ ye odase. Wɔ tsuo wa ma nyɛ maa ye odase kɛ gu nibwɔ ɔmɛ a he nɛ waa kɛ bua jɔmi ma nya a nɔ. (Rom 15:7) O ma nyɛ maa pee níhi nɛ nyɛɛ se nɛ ɔmɛ.

• O kɛ bua jɔmi nɛ nya nibwɔhi kɛ fiɛɛli nɛ a gbɔjɔ nɛ a maa ba Kaimi ɔ a he mohu pe nɛ o maa hi si nɛ o maa hi mlɛe kaa kpe ɔ nɛ je sisi

• Mo ná deka kɛ ha nihi nɛ o fɔ mɛ nine ɔ, nɛ o bɔ mɔde nɛ o to nihi nɛ a fɔ mɛ nine nɛ a ba kpe ɔ hu a he hɛ. Mo ha nɛ nibwɔhi nɛ a ba kpe ɔ nɛ a hi o kasa nya. Mo ha nɛ a hyɛ o Baiblo ɔ kɛ o la womi ɔ mi

• Ke a gbe kpe ɔ nya a, ha nɛ a le kaa o suɔ nɛ o ma ha sanehi nɛ a suɔ kaa a ma bi ɔmɛ a heto. Ke be be nɛ o kɛ mɛ maa sɛɛ ní akɛnɛ asafo kpa ko hu ma ba kpe ngɛ asa a nɔ he je ɔ, moo to blɔ nya nɛ o ya slaa mɛ ngɛ be kpiti mi. Ke o be a tɛlifoo nɔma loo adrɛs ɔ, o ma nyɛ ma de mɛ ke: “I suɔ nɛ ma le bɔ nɛ o na kpe ɔ ha. Kɛ ma pee kɛɛ kɛ na mo ekohu?”