Wa He Nɛ Maa Be Ngɛ Fiɛɛmi Ní Tsumi ɔ Mi​—Bɔ Nɛ O Ma Plɛ Kɛ Ye Nɔ Ko Nɛ E Bli We E Sinya a Ha Mo ɔ Odase Ha

NƆ́ HE JE NƐ E HE HIA: Akɛnɛ awi yemi pɔ he wawɛɛ he je ɔ, nihi yeɔ gbeye kaa a ma ngmɛ nibwɔhi blɔ nɛ a ba a wehi a mi. Ngɛ ma ngua komɛ a mi ɔ, nihi bɔɔ pɛ nɛ a ngɛ camera aloo intercom ngɛ a sinya amɛ a he. Enɛ ɔ haa nɛ a nyɛɔ naa nihi nɛ a baa a we ɔmɛ a mi ɔ nɛ a kɛ mɛ tuɔ munyu be mi nɛ a ngɛ a tsu ɔmɛ a mi nɛ a bli we a sinya amɛ po. Eko ɔ, wa maa ye gbeye kaa wa maa fiɛɛ ha nɔ ko nɛ e ngɛ e we mi be mi nɛ wa nɛ́ e hɛ mi. Blɔ tsɔɔmihi nɛ nyɛɛ se ɔ maa ye bua wɔ konɛ waa kɛ kã nɛ fiɛɛ ha nɔ ko be mi nɛ wa nɛ́ e hɛ mi.

BƆ NƐ O MAA PEE LƐ HA:

• Mo ná juɛmi nɛ da. Wetsɛmɛ fuu maa suɔ kaa a kɛ wɔ maa sɛɛ ní be mi nɛ a ji kpo ngɛ a tsu mi

• E sa nɛ wa hɛ nɛ hi nɔ kaa loko wa ma si sinya a aloo wa maa nyɛ ngmlɛ ɔ nɔ ɔ, eko ɔ, wetsɛ ɔ ngɛ wɔ hyɛe nɛ e ngɛ wɔ tue bue

• Ke wetsɛ ɔ he nɔ ɔ, o kɛ lɛ nɛ tu munyu kaa nɔ́ nɛ e daa si ngɛ o hɛ mi. Muɔ hɛlii nɛ hi o nya he nɛ o kɛ tu munyu. Mo de wetsɛ ɔ nɔ́ nɛ jinɛ o to kaa o ma de lɛ ke ji kaa e daa si ngɛ o hɛ mi ɔ. Ke camera ngɛ agbo ɔ aloo sinya a he ɔ, koo ngɔ o hɛ mi kɛ ya camera a he tsɔ

• Ke o kɛ wetsɛ ɔ sɛɛ ní ta a, moo hyɛ saminya ngɛ munyu nɛ o kɛ nɔ nɛ piɛɛ o he ɔ maa tu be mi nɛ nyɛ ji lejɛ ɔ lolo ɔ. O hɛ nɛ hi nɔ kaa eko ɔ, wetsɛ ɔ ngɛ mo hyɛe loloolo aloo eko ɔ, e ngɛ tue bue