Moo Ye Bua Wetsɛ ɔ Nɛ E Susu Níhi A He
1. Mɛni blɔ nɔ nɛ ke wa gu kɛ fiɛɛ ɔ, e maa pi si wawɛɛ?
1 Mɛni blɔ nɔ nɛ ke o gu kɛ fiɛɛ ɔ, e maa pi si wawɛɛ—nɛ́ o maa tsɔɔ wetsɛ ɔ nɔ́ nɛ e pee, aloo nɛ́ o maa ye bua lɛ nɛ e susu níhi a he nɛ lɛ nitsɛ e mwɔ sanehi a nya? Bɔfo Paulo kɛ Yudabi nɛ a ngɛ Tesalonika a susu níhi a he nɛ enɛ ɔ ha nɛ “a ti ni komɛ he ye.” (Níts. 17:2-4) Mɛni blɔ nɔ wa ma nyɛ maa gu nɛ waa kɛ nihi nɛ susu níhi a he?
2. Mɛni blɔ nɔ wa ma nyɛ maa gu kɛ kase Paulo ke wa ngɛ sane kpakpa a fiɛɛe?
2 Mo Susu Níhi Nɛ Nɔ ɔ Bua Jɔ He Kɛ Si Himi Mi Nɛ E Ngɛ ɔ He: Loko waa kɛ nihi ma nyɛ ma susu níhi a he ɔ, ja wa susu níhi nɛ nihi nɛ a ngɛ wa zugba kpɔ ɔ mi ɔ a bua jɔ he ɔ a he. Benɛ Paulo tu munyu kɛ tsɔɔ Helabi nɛ a he we yi ngɛ Areopago ɔ, níhi nɛ e wo a ta ngɛ e munyu ɔ sisije ɔ ji níhi nɛ eko ɔ, a le loo níhi nɛ a kplɛɛ nɔ. (Níts. 17:22-31) Lɔɔ he ɔ, ke o ngɛ munyu nɛ o maa tu ke o ya fiɛɛmi ɔ kasee ɔ, mo susu hemi kɛ yemi nɛ nihi nɛ a ngɛ nyɛ zugba kpɔ ɔ mi ɔ hɛɛ kɛ juɛmi nɛ dɛ nɛ a hɛɛ ɔ he. (1 Kor. 9:19-22) Ke wetsɛ ɔ kɛ mo kpa we gbi ɔ, moo bɔ mɔde nɛ o de nɔ́ ko nɛ e bua maa jɔ he, konɛ o da lɔɔ nɔ nɛ o kɛ lɛ nɛ sɛɛ ní.
3. Mɛni blɔ nɔ waa kɛ sane bimihi ma nyɛ ma tsu ní ngɛ he bemi mi konɛ waa kɛ nihi nɛ susu níhi a he ngɛ blɔ nɛ pi si nɔ?
3 O Kɛ Sane Bimihi Nɛ Tsu Ní Kɛ He Bemi: Loko wa ma nyɛ maa kale blɔ kɛ ha blɔ hialɔ ko nɛ e ma ya su he nɛ e yaa a, ja wa le he nɛ e ngɛ. Jã nɔuu kɛ̃ nɛ ja wa le wetsɛ ko juɛmi ngɛ sane ko he loko wa ma nyɛ maa ye bua lɛ nɛ e mwɔ sanehi a nya ngɛ blɔ nɛ da nɔ. Behi fuu ɔ, loko Yesu kɛ nɔ ko ma susu níhi a he ɔ, e biɔ nɔ ɔ sanehi konɛ e kɛ le nɔ́ nɛ nɔ ɔ ngɛ susue. Kaa nɔ hyɛmi nɔ́ ɔ, benɛ nyumu ko bi Yesu ke, “Kɛ ma pee kɛɛ nɛ ma ná neneene wami?” ɔ, Yesu hla nyumu ɔ juɛmi ngɛ sane ɔ he loko e ha lɛ heto. (Luka 10:25-28) Be kpa ko hu nɛ Petro ha sane ko heto nɛ e dɛ ɔ, Yesu kɛ sane bimihi tsu ní ngɛ he bemi mi kɛ dla Petro juɛmi. (Mat. 17:24-26) Lɔɔ he ɔ, ke wetsɛ ɔ bi sane ko loo e de nɔ́ ko nɛ dɛ ɔ, waa kɛ sane bimihi ma nyɛ ma tsu ní kɛ ye bua lɛ kɛ susu sane ɔ he.
4. Mɛni heje nɛ e sa kaa waa bɔ mɔde nɛ waa ye bua wetsɛ ɔ konɛ e susu níhi a he?
4 Ke wa ye bua wetsɛ ɔ nɛ e susu níhi a he ɔ, lɔɔ tsɔɔ kaa wa ngɛ Yesu nɛ ji Tsɔɔlɔ Ngua a kɛ fiɛɛli kpahi nɛ a le ní tsɔɔmi saminya nɛ a hi si ngɛ blema Kristofoli ɔmɛ a be ɔ mi ɔ kasee. Ke wa pee jã a, lɔɔ tsɔɔ kaa wa ngɛ bumi kɛ ha wetsɛ ɔ. (1 Pet. 3:15, 16) Enɛ ɔ ma ha nɛ eko ɔ, e maa ngmɛ blɔ nɛ wa ba slaa lɛ ekohu.