Moo Kase Ní, Nɛ O Kɛ Ni Kpahi Nɛ Sɛɛ He Ní

Ke wa kase Baiblo ɔ, e haa nɛ wa bua jɔɔ. Se ke waa kɛ nihi sɛɛ junehi nɛ wa na ngɛ Baiblo ɔ mi ɔ he ni ɔ, e haa nɛ wa bua jɔɔ wawɛɛ. Abɛ 11:25 ɔ de ke: “Nɔ fɛɛ nɔ nɛ haa nɛ nihi a he mi jɔɔ mɛ ɔ, lɛ hu nihi ma ha nɛ e he mi maa jɔ lɛ.”

Ke waa kɛ nihi sɛɛ níhi nɛ wa kase ɔ he ní ɔ, e maa ye bua wɔ nɛ wa kai níhi nɛ wa kase ɔ nɛ waa nu sisi saminya. Akɛnɛ ni kpahi ma nyɛ ma na junehi nɛ wa kadi ɔ he se he je ɔ, wa suɔ kaa wa maa gba mɛ.—Níts. 20:35.

Moo ka enɛ ɔ nɛ o hyɛ: Ngɛ otsi nɛ nyɛɛ se ɔ mi ɔ, moo bɔ mɔde kaa o kɛ nɔ ko maa sɛɛ níhi nɛ o kase ɔ he ní. O kɛ o wekuno ko loo nyɛmi ko, loo nɔ ko nɛ o kɛ lɛ tsuɔ ní, loo o kɛ lɛ yaa sukuu, aloo o kɛ lɛ ngɛ kpɔ mi, loo nɔ ko nɛ o kɛ lɛ kpe ngɛ fiɛɛmi mi ɔ ma nyɛ maa sɛɛ níhi nɛ o kase ɔ he ní. Moo bɔ mɔde kaa o kɛ mo nitsɛ o munyuhi nɛ a ngɛ kpiti nɛ a sisi numi yi ɔ ma tsu ní.

Mo kai enɛ ɔ: O kɛ ni kpahi nɛ sɛɛ níhi nɛ o kase ɔ he ní konɛ o kɛ wo mɛ he wami, se pi nɛ o kɛ maa gbla nihi a juɛmi kɛ ba o nɔ.—1 Kor. 8:1.