Hiob Womi ɔ Ma Nyɛ Maa Ye Bua Mo Ke O Ngɛ Nɔ́ Nae

1-2. Mɛni yi mi tomihi a he je nɛ e sa kaa waa kane Hiob womi ɔ?

ANƐ o ná he blɔ kɛ kane Hiob womi ɔ lingmi nɛ ɔ lo? E ngɛ mi kaa a ngma Hiob womi ɔ maa pee jeha 3,500 kɛ se ji nɛ ɔ mohu lɛɛ, se nihi fuu naa womi nɛ ɔ kaa womi ko nɛ se be. Akɛnɛ nɔ nɛ ngma Hiob womi ɔ ngɔ munyuhi nɛ a sisi numi yi nɛ he wami ngɛ mi kɛ tsu ní he je ɔ, nihi fuu bua jɔ he, nɛ a jeɔ womi ngmalɔ ɔ yi. E ngɛ mi kaa Mose lɛ ngɔ e nine kɛ ngma womi nɛ ɔ mohu lɛɛ, se Yehowa Mawu nitsɛ lɛ tsɔɔ lɛ nɔ́ nɛ e sa kaa e ngma.—2 Tim. 3:16.

² Hiob womi ɔ ji womi ko nɛ e he hia wawɛɛ ngɛ Baiblo ɔ mi. Mɛni he je? Yi mi tomi kake he je ji kaa, e yeɔ bua wɔ nɛ wa naa kaa bɔfohi kɛ adesahi tsuo ngɛ he blɔ kaa a maa hla kaa a ma sɔmɔ Yehowa akɛnɛ a suɔ lɛ, nɛ a ngɛ bu kɛ ha e biɛ ɔ he je. Jehanɛ se hu ɔ, womi nɛ ɔ tsɔɔ wɔ Yehowa suhi nɛ a ngɛ nyakpɛ ɔ a he ní. Su nɛ ɔmɛ ekomɛ ji suɔmi, nile, dami sane yemi kɛ he wami. Kaa nɔ hyɛmi nɔ́ ɔ, Hiob womi ɔ kɛ munyu nɛ ji “Ope ɔ” tsu ní si 31 sɔuu kɛ kale Yehowa pe Baiblo womi kpa amɛ tsuo nɛ a bla. Jehanɛ se hu ɔ, Hiob womi ɔ ha si himi ɔ mi sane bimihi fuu a heto. Sane bimi nɛ ɔmɛ a kpɛti kake nɛ haoɔ nihi fuu mwɔnɛ ɔ ji: Mɛni he je nɛ Mawu ngmɛ nɔ́ nami blɔ?

3. Mɛni ji ní komɛ nɛ wa ma nyɛ maa kase ngɛ Hiob womi ɔ mi?

³ Kaa bɔ nɛ ke o daa si ngɛ yoku nɔ nɛ́ o naa níhi nɛ bɔle mo ɔ saminya a, jã kɛ̃ nɛ Hiob womi ɔ nɛ wa maa kane ɔ maa ye bua wɔ konɛ waa na kahi nɛ waa kɛ kpeɔ ngɛ si himi mi ɔ kaa bɔ nɛ Yehowa naa mɛ ɔ. Nyɛ ha nɛ waa hyɛ bɔ nɛ Hiob womi ɔ nɛ wa maa kane ɔ maa ye bua wɔ ha ke wa ngɛ nɔ́ nae. Wa maa na bɔ nɛ Hiob sane ɔ ko nyɛ ye bua Israelbi ɔmɛ ha kɛ bɔ nɛ e ma nyɛ maa ye bua wɔ ha mwɔnɛ ɔ. Jehanɛ hu ɔ, wa maa na bɔ nɛ waa kɛ Hiob womi ɔ ma nyɛ maa ye bua ni kpahi ha.

MAWU NGMƐ BLƆ NƐ HIOB NA NƆ́

4. Mɛni lɛ ha nɛ Hiob je e kpa kulaa ngɛ Israelbi nɛ a hi Egipt ɔ a he?

⁴ Benɛ Israelbi ɔmɛ ngɛ nyɔguɛ yemi mi ngɛ Egipt ɔ, jamɛ a be ɔ mi ɔ, nyumu ko ngɛ Uz zugba a nɔ nɛ a tsɛɛ lɛ ke Hiob. E ma nyɛ maa ba lɛ kaa Uz ngɛ Si Womi Zugba a puje he blɔ, nɛ e kɛ Arabia he kɛ we. Benɛ Israelbi ɔmɛ ngɛ Egipt ɔ, a kpɛti ni komɛ ja lakpa mawuhi, se Hiob lɛɛ e kɛ anɔkuale yemi sɔmɔ Yehowa. (Yosh. 24:14; Eze. 20:8) Yehowa de ngɛ Hiob he ke: “Nɔ ko nɔ ko be zugba a nɔ nɛ ngɛ kaa lɛ.”a (Hiob 1:8) Hiob ngɛ ní wawɛɛ nitsɛ, nɛ a buɔ lɛ pe nɔ fɛɛ nɔ ngɛ jamɛ a be ɔ mi. (Hiob 1:3) Hyɛ bɔ nɛ e maa pee Satan tai ha kaa nyumu nɛ ɔ kɛ anɔkuale yemi ngɛ Mawu sɔmɔe!

5. Mɛni he je nɛ Yehowa ngmɛ blɔ nɛ Hiob na nɔ́ ɔ? (Hiob 1:​20-22; 2:​9, 10)

⁵ Satan tsɔɔ kaa ke Hiob ngɛ nɔ́ nae ɔ, e ma kpa Yehowa sɔmɔmi. (Hiob 1:​7-11; 2:​2-5) E ngɛ mi kaa Yehowa suɔ Hiob sane wawɛɛ mohu lɛɛ, se nɔ́ nɛ Satan de ɔ tle sane ko nɛ he hia wawɛɛ si. Enɛ ɔ he ɔ, Yehowa ngmɛ Satan blɔ konɛ e kɛ tsɔɔ kaa nɔ́ nɛ e ngɛ dee kɛ kɔ Hiob he ɔ ji anɔkuale aloo lakpa. (Hiob 1:​12-19; 2:​6-8) Satan ha nɛ a ba nuu Hiob lohwe lɛlɛɛ ɔmɛ tsuo kɛ je. Lɔ ɔ se ɔ, e gbe Hiob bimɛ nyɔngma, nɛ e ha nɛ tslɔɔ nɛ yeɔ nɔ fuu Hiob kɛ je e yi kɛ ma si. Se yiwutso ní nɛ ɔmɛ tsuo nɛ Satan pee konɛ e kɛ ha nɛ Hiob nɛ kpa Mawu anɔkuale yemi ɔ yi manye. (Kane Hiob 1:​20-22; 2:​9, 10.) Pee se ɔ, Yehowa ha nɛ Hiob ná he wami, e ba pee niatsɛ, nɛ nihi buɔ lɛ kaa sa a ekohu. Jehanɛ hu ɔ, Yehowa ha nɛ Hiob kpale fɔ bimɛ nyɔngma. Nɛ e ha nɛ Hiob ye jeha 140 kɛ piɛ jeha nɛ e ye momo ɔ he. Enɛ ɔ ha nɛ e na e bibimɛ kɛ e bibimibimɛ. (Hiob 42:​10-13, 16) Kɛ Hiob sane ɔ ko ye bua Mawu sɔmɔli nɛ a hi si blema a ha kɛɛ? Nɛ kɛ e ma nyɛ maa ye bua wɔ ha kɛɛ mwɔnɛ ɔ?

6. Ke Israelbi ɔmɛ le nɔ́ he je nɛ Mawu ngmɛ nɔ́ nami blɔ ɔ, kɛ lɔ ɔ ko ye bua mɛ ha kɛ kɛɛ? (Hyɛ foni ɔ hulɔ.)

⁶ Bɔ nɛ Israelbi ɔmɛ ko ná he se ha. Benɛ Israelbi ɔmɛ ngɛ Egipt ɔ, si himi ɔ mi he wa ha mɛ wawɛɛ ngɛ lejɛ ɔ. Kaa nɔ hyɛmi nɔ́ ɔ, Yoshua kɛ Kaleb wa ngɛ Egipt kaa nyɔguɛhi. E ngɛ mi kaa Yoshua kɛ Kaleb pee we nɔ́ yayami ko mohu lɛɛ, se Israelbi kpa amɛ a tue gbomi he je ɔ, a kɛ Israelbi ɔmɛ tsuo nyɛɛ nga a nɔ jeha 40 sɔuu. Kaa Israelbi ɔmɛ le kahi nɛ Hiob kɛ kpe ngɛ e si himi mi, kɛ nɔ́ nɛ je mi kɛ ba a, jinɛ atsinyɛ jemi ko be he kaa e ko ye bua mɛ wawɛɛ. Nɛ jã kɛ̃ nɛ e ko ye bua yi nɔhi nɛ ba ngɛ a se ɔ, nɛ a ko le nɔ tutuutu nɛ ha nɛ adesahi ngɛ nɔ́ nae ɔ. Jehanɛ hu ɔ, a ko nu nɔ́ he je nɛ Yehowa ngmɛɔ nɔ́ nami blɔ ɔ sisi. Nɛ a ko na kaa Yehowa bua jɔɔ nihi nɛ a kɛ anɔkuale yemi fĩɔ si ngɛ haomi behi a mi ɔ he.

7-8. Ke wa ngɛ nɔ́ nae ɔ, kɛ Hiob womi ɔ ma nyɛ maa ye bua wɔ ha kɛɛ? Mo ha enɛ ɔ he níhi a si kpami.

⁷ Bɔ nɛ wa ma ná he se ha. Aywilɛho sane ji kaa, mwɔnɛ ɔ, nihi fuu be hemi kɛ yemi ngɛ Mawu mi ejakaa a nui nɔ́ he je nɛ ní yayamihi baa nimli kpakpahi a nɔ ɔ sisi. Mo susu Hazelb nɛ e je Rwanda a nɔ hyɛmi nɔ́ ɔ he nɛ o hyɛ. Benɛ e ji yiheyo ɔ, e he Mawu ye. Se níhi ba tsake. E fɔli ɔmɛ ba po gba mi, nɛ pee se ɔ, nyumu kpa nɛ e yayo kɛ sɛ gba si himi mi ɔ wa lɛ yi mi wawɛɛ. Nyumu ko hu tua lɛ abonua benɛ e yi jeha 20 lolo ɔ. Hazel ya sɔlemi kaa e ma ya ná bua womi ngɛ lejɛ ɔ lo, se e ya ná we bua womi ko fɛɛ. Pee se ɔ, Hazel ngma sɛ womi kɛ ha Mawu. E ngma ngɛ sɛ womi ɔ mi ke: “Mawu lee, i sɔleɔ ha mo, nɛ i bɔ mɔde kaa ma pee nɔ́ nɛ da, se o kɛ yayami wo mi hiɔ. Amlɔ nɛ ɔ lɛɛ i ngɛ o he jee, nɛ i to kaa ma pee nɔ́ fɛɛ nɔ́ ko nɛ ma ha nɛ ye bua nɛ jɔ!” Kaa bɔ nɛ e ba ngɛ Hazel blɔ fami ɔ, ni komɛ hu ngɛ nɛ ni kpahi ha nɛ a nuɔ he kaa Mawu lɛ ha nɛ a ngɛ nɔ́ nae. Ke wa na nihi kaa jã a, e dɔɔ wɔ wawɛɛ!

⁸ Hiob sane ɔ ha nɛ wa ba na kaa tsa pi Mawu nɛ haa nɛ wa naa nɔ́, mohu ɔ, Satan. Wa na hu kaa ke nihi ngɛ nɔ́ nae ɔ, e sɛ nɛ wa susu kaa a ngɛ yayami ko nɛ a pee ɔ he hiɔwo náe. Ngmami ɔ tsɔɔ kaa “níhi nɛ a hyɛ we blɔ” ma nyɛ maa ba wa ti nɔ fɛɛ nɔ ko nɔ be fɛɛ be. (Fiɛɛ. 9:11; Hiob 4:​1, 8) Nɛ wa na kaa ke wa ya nɔ nɛ waa kɛ anɔkuale yemi fĩ si ngɛ behi nɛ a mi wa mi ɔ, lɔ ɔ ma ha nɛ Yehowa ma ná heto kɛ ha Satan nya pomi ɔ. (Hiob 2:3; Abɛ 27:11) Wa bua jɔ anɔkuale nɛ ɔmɛ nɛ wa ba kase ngɛ Baiblo ɔ mi ɔ he wawɛɛ, ejakaa e ha nɛ wa na nɔ́ he je nɛ waa kɛ wa suɔli naa nɔ́. Pee se ɔ, Hazel ha nɛ Yehowa Odasefo ɔmɛ kɛ lɛ bɔni Baiblo ɔ kasemi, nɛ lɔ ɔ ha nɛ e ba na kaa pi Mawu nɛ ngɔ haomi ɔ kɛ ba e nɔ. E de ke: “I je ye tsui mi nɛ i sɔle kɛ ha Mawu ekohu. I de Yehowa ke benɛ i de lɛ kaa i be lɛ jae hu ɔ, pi nɛ i suɔ kaa ma kpa lɛ jami niinɛ. Ke ma de po ɔ, jamɛ a be ɔ mi ɔ, i li Mawu saminya. Amlɔ nɛ ɔ lɛɛ, i ba ná nɔ mi mami kaa Yehowa suɔ mi. I ngɛ bua jɔmi, nɛ ye tsui nɔ ye mi.” Wa bua jɔ wawɛɛ kaa wa ba le nɔ́ he je nɛ Mawu ngmɛ nɔ́ nami blɔ. Amlɔ nɛ ɔ, nyɛ ha nɛ waa hyɛ bɔ nɛ Hiob sane ɔ ma nyɛ maa ye bua wɔ kaa ni kakaakahi ha ke waa kɛ kahi ngɛ kpee.

BƆ NƐ HIOB SANE Ɔ YEƆ BUAA WƆ HA NƐ WA FĨƆ SI

9. Kɛ o maa kale Hiob si fɔfɔɛ ɔ ha kɛɛ? (Yakobo 5:11)

⁹ Moo po Hiob nɛ lɛ nɔ kake pɛ e hii si ngɛ lazu mi nɛ tslɔɔ fuu lɛ kɛ je e yi kɛ ma si nɛ e ngɛ lɛ yee wawɛɛ ɔ he foni nɛ o hyɛ. E nɔmlɔ tso ɔ tsuo pee kɛ pahi sɔuu, nɛ e flaa wawɛɛ. Hiob he wami nɔ gbɔ kulaa. E ngɔɔ buɛhi nɛ ywia kɛ hluaa e he. E pɔɔ yeyee nɛ e ngɛ mi gblee ɔ he munyu tumi. Se ngɛ Hiob nɔ́ nami ɔ tsuo se ɔ, e ya nɔ nɛ e fĩ si nɛ e ye Yehowa anɔkuale. (Kane Yakobo 5:11.) Mɛni lɛ ye bua Hiob nɛ e nyɛ nɛ e fĩ si ɔ?

10. Mɛni huɛ bɔmi lɛ ngɛ Hiob kɛ Yehowa a kpɛti? Moo tsɔɔ nya.

¹⁰ Hiob de Yehowa bɔ nɛ e ngɛ he nue ha a tutuutu. (Hiob 10:​1, 2; 16:20) Kaa nɔ hyɛmi nɔ́ ɔ, Hiob yi 3 ɔ tsɔɔ bɔ nɛ e tu e nɔ́ nami ɔ he munyu nyanyaanya ha. E pee jã ejakaa e susu kaa Yehowa lɛ ngɔ haomi ɔ kɛ ba e nɔ ɔ nɛ. Benɛ e kɛ e huɛmɛ etɛ ɔmɛ ngɛ ní sɛɛe ɔ, e ha nɛ a le kaa e pee we yayami ko, nɛ e pɔɔ Yehowa piami ngɛ e nɔ́ nami ɔ he. Munyuhi nɛ Hiob tu ɔ tsɔɔ kaa e bu e he dalɔ pe Mawu. (Hiob 10:​1-3; 32:​1, 2; 35:​1, 2) Hiob nitsɛ de kaa be komɛ ɔ, e ‘tuɔ munyu basabasa,’ ejakaa e ngɛ mɔde bɔe kaa e ma ha nɛ nihi nɛ a na kaa tɔmi ko be e he. (Hiob 6:​3, 26) Ngɛ Hiob yi 31 ɔ mi ɔ, e tsɔɔ kaa e pee we yayami ko nɛ e sa nɛ a gbla e tue, enɛ ɔ he ɔ, e suɔ nɛ Mawu nɛ ha lɛ e sane bimi ɔmɛ a heto. (Hiob 31:35) Ngɛ anɔkuale mi ɔ, jinɛ e sɛ nɛ Hiob ko nyɛ Mawu nɔ kaa e tsɔɔ lɛ nɔ́ he je nɛ e ngɛ nɔ́ nae ɔ.

11. Benɛ Hiob ngɛ e we anɔkuale yemi ɔ he munyu tue ɔ, mɛni Yehowa pee kɛ ye bua lɛ?

¹¹ Ke o hyɛ bɔ nɛ Hiob nyɛ nɛ e de Yehowa bɔ nɛ e ngɛ he nue ha a, lɔ ɔ tsɔɔ kaa huɛ bɔmi nɛ ngɛ e kɛ lɛ a kpɛti ɔ mi wa, nɛ e ngɛ nɔ mi mami kaa Yehowa maa ye dami sane ha lɛ. Pee se ɔ, Yehowa kɛ Hiob tu munyu kɛ je ahumi ko mi. Se e tu we nɔ́ he je nɛ Hiob ngɛ nɔ́ nae ɔ he munyu tsɔ. Nɛ e gbla we Hiob tue kaa e tu níhi a he munyu nyanyaanya, loo kaa e bu e he dalɔ. Mohu ɔ, kaa bɔ nɛ tsɛ kpakpa maa pee ɔ, Yehowa je mi mi jɔmi mi nɛ e tsɔɔ Hiob nɔ́ nɛ e sa kaa e pee. Nɛ blɔ nɔ nɛ Yehowa gu kɛ ye bua Hiob ɔ hi wawɛɛ nitsɛ. Enɛ ɔ ha nɛ Hiob je he si bami mi nɛ e kplɛɛ nɔ kaa e li nɔ́ fɛɛ nɔ́, nɛ e pia e he kaa e tu munyu basabasa. (Hiob 31:6; 40:​4, 5; 42:​1-6) Kɛ Hiob sane nɛ ɔ ko nyɛ ye bua nihi nɛ a hi si blema a ha kɛɛ, nɛ kɛ e ma nyɛ maa ye bua wɔ hu ha kɛɛ mwɔnɛ ɔ?

12. Kɛ Hiob sane ɔ ko nyɛ ye bua Israelbi ɔmɛ ha kɛɛ?

¹² Bɔ nɛ Israelbi ɔmɛ ko ná he se ha. Jinɛ e sa nɛ Israelbi ɔmɛ ko kase nɔ́ ko kɛ je Hiob sane ɔ mi. Kaa nɔ hyɛmi nɔ́ ɔ, mo susu nɔ́ nɛ ba Mose nɔ ɔ he nɛ o hyɛ. Benɛ Mose ngɛ Israelbi ɔmɛ a hɛ mi nyɛɛe ɔ, e ná we lɛ gbɔjɔɔ. A tsɔ Yehowa hɛ mi atuã si abɔ, nɛ a ha nɛ Mose kɔni mi jɔ̃. E ngɛ mi kaa ke níhi a mi wa a, Israelbi ɔmɛ tuɔ munyu kɛ siɔ Yehowa mohu lɛɛ, se Mose lɛɛ e pee we jã, mohu ɔ, e ya nɔ nɛ e sɔle ha Yehowa konɛ e ye bua lɛ ngɛ behi nɛ a mi wa mi. (2 Mose 16:​6-8; 4 Mose 11:​10-14; 14:​1-4, 11; 16:​41, 49; 17:5) Hiob nɔ hyɛmi nɔ́ ɔ hu ko nyɛ ye bua Mose benɛ Yehowa tsɔse lɛ ɔ. Kaa nɔ hyɛmi nɔ́ ɔ, benɛ e piɛ bɔɔ nɛ Israelbi ɔmɛ maa su Si Womi Zugba a nɔ ɔ, Mose mi mi fu Israelbi ɔmɛ nɛ “e tu munyu basabasa.” Enɛ ɔ ha nɛ e kɛ yi jemi nɛ sa Yehowa a ha we lɛ. (La 106:​32, 33) Nɔ́ nɛ je mi kɛ ba ji kaa Yehowa ha we Mose he blɔ nɛ e ya su Si Womi Zugba a nɔ. (5 Mose 32:​50-52) E ngɛ mi kaa tsɔsemi nɛ ɔ dɔ Mose wawɛɛ mohu lɛɛ, se kɛ̃ ɔ, e je he si bami mi nɛ e kplɛɛ nɔ. E sa nɛ Hiob sane ɔ ko nyɛ ye bua Israelbi anɔkualetsɛmɛ nɛ a hi si ngɛ Mose gbenɔ se ɔ konɛ a nyɛ nɛ a da kahi nɛ a kɛ kpe ɔmɛ a nya. Ke a pue a yi mi tɛ ngɛ nɔ́ nɛ ya nɔ ngɛ Hiob sane ɔ mi ɔ he ɔ, a ko kase bɔ nɛ a jeɔ tsui mi nɛ a kɛ Yehowa tuɔ munyu ha, nɛ a ko kai hu kaa e sɛ nɛ a pee a he kaa a da pe Mawu. A ko kase hu kaa ke Yehowa tsɔse mɛ ɔ, e sa nɛ a kɛ he si bami nɛ kplɛɛ nɔ.

13. Mɛni blɔ nɔ Hiob sane ɔ ma nyɛ maa ye bua wɔ konɛ wa fĩ si? (Hebri Bi 10:36)

¹³ Bɔ nɛ wa ma ná he se ha. Akɛnɛ Kristofohi ji wɔ he je ɔ, wɔ hu wa hia si fĩmi. (Kane Hebri Bi 10:36.) Kaa nɔ hyɛmi nɔ́ ɔ, wa ti ni komɛ be he wami, nɛ ni komɛ hu ngɛ haoe wawɛɛ. Ni komɛ hu ngɛ nɛ a kɛ nyagbahi ngɛ kpee ngɛ a weku ɔ mi, ni komɛ a suɔli gbo, aloo a kɛ nyagba kpahi nɛ a mi wa ngɛ kpee. Nɛ be komɛ ɔ, ni komɛ a munyu tutui kɛ a ní peepee haa nɛ e he waa kɛ haa wɔ kaa wa maa da nyagbahi nɛ waa kɛ kpe ɔmɛ a nya. (Abɛ 12:18) Se wa kase ngɛ Hiob womi ɔ mi kaa wa ma nyɛ ma de Yehowa bɔ nɛ wa ngɛ he nue ha tutuutu, nɛ́ wa ná nɔ mi mami kaa e maa bu wɔ tue. (1 Yoh. 5:14) Ke wa de Yehowa bɔ nɛ wa ngɛ he nue ha, nɛ be komɛ po wa ‘tu munyu basabasa’ kaa bɔ nɛ e ba ngɛ Hiob blɔ fami ɔ, e mi mi be wɔ fue kɔkɔɔkɔ. Mohu ɔ, e ma ha wɔ nyɛmi kɛ juɛmi nɛ wa hia a konɛ wa nyɛ nɛ wa fĩ si. (2 Kron. 16:9; Yak. 1:5) Be komɛ ɔ, ke e he ba hia kaa Yehowa nɛ tsɔse wɔ kaa bɔ nɛ e tsɔse Hiob ɔ, e maa pee jã. Hiob womi ɔ hu tsɔɔ wɔ kaa ke Yehowa gu e Munyu ɔ, e we asafo ɔ, loo wa huɛ ko nɛ e nane pi si ɔ nɔ kɛ ngɛ wɔ tsɔsee ɔ, e sa nɛ wa fĩ si. (Heb. 12:​5-7) Kaa bɔ nɛ Hiob je he si bami mi nɛ e kplɛɛ tsɔsemi nɔ nɛ e ná he se ɔ, jã nɔuu kɛ̃ nɛ wɔ hu ke wa kplɛɛɔ tsɔsemi nɔ ɔ, wa ma ná he. (2 Kor. 13:11) Moo hyɛ níhi fuu nɛ wa kase ngɛ Hiob sane ɔ mi! Amlɔ nɛ ɔ, nyɛ ha nɛ wa susu blɔ nɔ nɛ wa maa gu nɛ waa kɛ Hiob sane ɔ maa ye bua ni kpahi ɔ he.

MOO NGƆ HIOB WOMI Ɔ KƐ YE BUA NI KPAHI

14. Ke o ngɛ fiɛɛe ɔ, mɛni blɔ nɔ o ma nyɛ maa gu kɛ tsɔɔ nɔ ko nɔ́ he je nɛ adesahi ngɛ nɔ́ nae ɔ nya?

¹⁴ Anɛ o kɛ nɔ ko kpe ngɛ fiɛɛmi mi hyɛ nɛ e bi mo nɔ́ he je nɛ nihi ngɛ nɔ́ nae ɔ lo? Benɛ e bi mo jã a, kɛ o ha lɛ heto ha kɛɛ? Eko ɔ, o kɛ lɛ susu nɔ́ nɛ ya nɔ ngɛ Eden abɔɔ mi nɛ Baiblo ɔ tu he munyu ɔ he. Nɛ o je sisi kaa Satan nɛ ji yiwutsotsɛ ɔ sisi Adam kɛ Hawa nɛ lɔ ɔ ha nɛ a gbo Mawu nɔ tue. (1 Mose 3:​1-6) Nɛ lɔ ɔ se ɔ, o tsɔɔ lɛ nya kaa akɛnɛ Adam kɛ Hawa gbo Mawu nɔ tue he je nɛ adesahi ngɛ nɔ́ nae nɛ a ngɛ gboe ɔ nɛ. (Rom. 5:12) Nyagbe ɔ, eko ɔ, o ha nɛ e le kaa Mawu ngmɛ blɔ konɛ be nɛ pue mi nɛ nɔ fɛɛ nɔ nɛ na kaa Satan ji lakpatsɛ. Jehanɛ se hu ɔ, e pee jã konɛ a nyɛ nɛ a fiɛɛ sane kpakpa nɛ ji kaa hwɔɔ se ɔ, adesahi maa ye mluku ekohu ɔ. (Kpoj. 21:​3, 4) Enɛ ɔ ji heto nɛ da, nɛ e ye bua nihi fuu nɛ a ba nu nɔ́ he je nɛ adesahi ngɛ nɔ́ nae ɔ sisi.

15. Ke nɔ ko bi mo nɔ́ he je nɛ adesahi ngɛ nɔ́ nae ɔ, kɛ o kɛ Hiob womi ɔ maa ye bua lɛ ha kɛɛ? (Hyɛ foni ɔmɛ hulɔ.)

¹⁵ Moo hyɛ blɔ kpa nɔ nɛ wa ma nyɛ maa gu kɛ ngɔ Hiob womi ɔ kɛ tsɔɔ nihi nɔ́ he je nɛ adesahi ngɛ nɔ́ nae ɔ mi. Kekleekle ɔ, o ma nyɛ ma je nɔ ɔ yi kaa e bi sane ko kaa jã. Lɔ ɔ se ɔ, o ma nyɛ ma de lɛ kaa Hiob nɛ ji nyumu anɔkualetsɛ nɛ e hao wawɛɛ ɔ hu bi sane ko kaa kikɛ hyɛ. E susu po kaa Mawu lɛ ha nɛ e ngɛ nɔ́ nae ɔ nɛ. (Hiob 7:​17-21) Ke nɔ nɛ o kɛ ngɛ ní ɔ sɛɛe ɔ le kaa kɛ je blema tɔɔ nɛ nihi suɔ nɛ a le nɔ́ he je nɛ adesahi ngɛ nɔ́ nae ɔ, e ma nyɛ maa pee lɛ nyakpɛ wawɛɛ. Lɔ ɔ se ɔ, o kɛ mi mi jɔmi ma nyɛ maa tsɔɔ lɛ nya kaa Hiob womi ɔ ha nɛ wa na kaa Abosiami lɛ ngɔ nɔ́ nami ɔ kɛ ba Hiob nɔ ɔ nɛ, se pi Mawu. Abosiami pee jã konɛ e kɛ tsɔɔ kaa nɔ́ nɛ adesahi náa kɛ jeɔ Mawu ngɔ ɔ he je nɛ a ngɛ lɛ sɔmɔe ɔ nɛ. O ma nyɛ ma tsa nɔ ke, Mawu le kaa pi nɔ́ nɛ e sɔmɔli anɔkualetsɛmɛ náa kɛ jeɔ e ngɔ ɔ he je nɛ a jaa lɛ ngɛ. Enɛ ɔ he ɔ, Mawu ngmɛɔ blɔ nɛ e sɔmɔli anɔkualetsɛmɛ naa nɔ́ konɛ a kɛ tsɔɔ kaa Satan ji lakpatsɛ. Nyagbe ɔ, o ma nyɛ ma de lɛ kaa pee se ɔ, Mawu jɔɔ Hiob ngɛ e we anɔkuale yemi ɔ he je. Wa ma nyɛ maa wo e bua nɛ wa ha nɛ e ná nɔ mi mami kaa pi Mawu nɛ ha nɛ e ngɛ nɔ nae.

16. Mo ha nɔ hyɛmi nɔ́ ko nɛ tsɔɔ bɔ nɛ Hiob womi ɔ ma nyɛ maa ye bua nɔ ko nɛ e ngɛ nɔ́ nae ɔ ha.

¹⁶ Moo hyɛ bɔ nɛ Hiob womi ɔ ye bua Mario ha. Ngɛ jeha 2021 ɔ mi ɔ, ligbi ko ɔ, nyɛmiyo ko ngɛ odase yee ngɛ tɛlifoo nɔ. Nɔ kekleekle nɛ e fia ji Mario. Nɛ e kane ngmami ko kɛ tsɔɔ lɛ. Ngmami nɛ nyɛmiyo ɔ kane ɔ tsɔɔ kaa Mawu wo si kaa hwɔɔ se ɔ, e maa pee ní kpakpahi fuu kɛ ha adesahi, nɛ amlɔ nɛ ɔ po ɔ, e buɔ wa sɔlemi tue. Benɛ nyɛmiyo ɔ bi Mario e susumi ngɛ ngmami ɔ he ɔ, Mario de nyɛmiyo ɔ kaa jinɛ e ngɛ sɛ womi ngmae kɛ ya ha e weku ɔ nɛ e de mɛ kaa e suɔ nɛ e gbe e he, loko e kɛ tsɛ lɛ ɔ nɛ. Mario de ke, “I he Mawu ye, se mɔtu nɛ ɔ, i ngɛ he nue kaa Mawu kua mi.” Pee se ɔ, nyɛmiyo ɔ tsɛ lɛ ekohu nɛ e kɛ lɛ susu Hiob sane ɔ he. Mario ma e juɛmi nya si kaa e maa kane Hiob womi ɔ tsuo. Lɔ ɔ he ɔ, wa nyɛmiyo ɔ ngɔ Je Ehe Sisi Tsɔɔmi Baiblo ɔ he link ɔ kɛ mane lɛ. Mɛni lɛ je mi kɛ ba? Mario kplɛɛ kaa e maa kase Baiblo ɔ. Nɛ e bua jɔ kaa e ba kase níhi fuu nɛ tsɔɔ kaa Mawu suɔ lɛ, nɛ e susuɔ e he.

17. Mɛni he je nɛ o bua jɔ kaa Mawu ha nɛ a ngɔ Hiob womi ɔ kɛ piɛɛ e Munyu ɔ he ɔ? (Hiob 34:12)

¹⁷ Niinɛ, Mawu munyu ɔ ngɛ he wami nɛ e yeɔ bua nihi, titli nihi nɛ a ngɛ nɔ́ nae ɔ. (Heb. 4:12) Wa bua jɔ wawɛɛ kaa Yehowa ha nɛ a ngma Hiob sane ɔ kɛ wo Baiblo ɔ mi! (Hiob 19:​23, 24) Hiob womi ɔ ha nɛ wa ná nɔ mi mami kaa “ngɛ anɔkuale mi ɔ, Mawu pee we yiwutso ní.” (Kane Hiob 34:12.) Jehanɛ hu ɔ, Hiob womi ɔ ha nɛ wa na nɔ́ he je nɛ Mawu ngmɛɔ blɔ nɛ nihi naa nɔ́, kɛ blɔ nɔ nɛ wa maa gu kɛ fĩ si. Nɛ e yeɔ bua wɔ konɛ waa na blɔ nɔ nɛ wa maa gu kɛ wo nihi nɛ a ngɛ nɔ́ nae ɔ a bua. Ngɛ ní kasemi nɛ nyɛɛ se ɔ mi ɔ, wa maa na bɔ nɛ Hiob womi ɔ maa ye bua wɔ ha ke wa ngɛ nihi ga woe.