Yesu Tsa Nyumu Ko Nɛ A Fɔ Lɛ Hɛ Yuyuilɔ

Yesu ya Yerusalem ngɛ Hejɔɔmi ligbi ɔ nɔ, nɛ e se kɛ bɔɔ ngɛ lejɛ ɔ. Benɛ e kɛ e kaseli ɔmɛ ngɛ nyɛɛe ngɛ ma a mi ɔ, e na nyumu ko nɛ a fɔ lɛ hɛ yuyuilɔ. Kɛkɛ nɛ kaseli ɔmɛ bi Yesu ke: “Tsɔɔlɔ, mɛnɔ lɛ pee yayami nɛ a fɔ nɔmlɔ nɛ ɔ hɛ yuyuilɔ ɔ? Lɛ nitsɛ, aloo e fɔli?”​​—Yohane 9:2.

Kaseli ɔmɛ le kaa mumi ko be adesa mi nɛ sɛɛ hlami ba hii je mi loko a fɔɔ lɛ, se kɛ̃ ɔ, a susu kaa eko ɔ, nɔ ko ma nyɛ maa pee yayami be mi nɛ e ngɛ e nyɛ mi mi. Yesu ha mɛ heto ke: “Nɔmlɔ nɛ hɛ yu nɛ ɔ, pi lɛ nitsɛ nɛ pee yayami, nɛ pi e fɔli hulɔ. Mohu ɔ, e hɛ yu, bɔ nɛ pee nɛ a gu e nɔ kɛ tsɔɔ bɔ nɛ Mawu he wami ɔ tsuɔ ní ha.” (Yohane 9:3) Enɛ ɔ he ɔ, pi nyumu ɔ, loo e fɔli nɛ a pee yayami ko. Mohu ɔ, yayami nɛ Adam pee nɛ ha nɛ adesahi tsuo yí mluku ɔ lɛ ha nɛ a jeɔ kpa, nɛ́ eko ji hɛ yumi. Se nyumu ɔ hɛngmɛ nɛ yu ɔ ha Yesu blɔ nɛ e tsu Mawu ní tsumi kɛ wo e hɛ mi nyami.

Yesu ma bɔ nɛ e he hia ha kaa a kɛ oya yemi ma tsu Mawu ní tsumi ɔ nɔ mi. E de ke: “Nɛ je na nɛ ɔ, ja wa tsu nɔ nɛ tsɔ mi ɔ ní tsumi ɔmɛ. Je maa jɔ, nɛ nɔ ko nɔ ko be nyɛe ma tsu ní. Be abɔ nɛ i ngɛ je ɔ mi nɛ ɔ, imi ji je ɔ la a nɛ.” (Yohane 9:4, 5) Ngɛ anɔkuale mi ɔ, e piɛ bɔɔ nɛ Yesu ma gbo nɛ a maa pu lɛ, nɛ e be nyɛe ma tsu nɔ́ ko ngɛ yɔkɔ ɔ mi. Se amlɔ nɛ ɔ, e ji la ngɛ je ɔ mi.

Yesu ma tsa nyumu ɔ, se mɛni blɔ nɔ e maa gu kɛ tsa lɛ? Yesu la lada kɛ pue zugba nɛ e kɛ lada a pɔtɔ zu. E ngɔ zu ɔ kɛ kpa nyumu ɔ hɛngmɛ ɔmɛ a nɔ nɛ e de lɛ ke: “Yaa Siloam pa a mi nɛ o ya fɔ o he.” (Yohane 9:7) Nyumu ɔ bu lɛ tue. E ya pee jã pɛpɛɛpɛ, nɛ e bɔni nɔ́ hyɛmi! Mo susu bɔ nɛ nyumu nɛ hyɛ we nɔ́ gblee nɛ ɔ bua maa jɔ ha kaa e bɔni nɔ́ hyɛmi ɔ he nɛ o hyɛ!

Benɛ nihi nɛ a le nyumu nɛ ɔ na kaa e hɛngmɛ bli ɔ, e pee mɛ nyakpɛ. A bi ke: “Anɛ pi nɔmlɔ nɛ ɔ nɛ hiɔ si, nɛ e hii nɔ́ bae be ko ɔ” ji nɛ ɔ lo? Ni komɛ de ke: “Nyumu ɔ ji nɛ ɔ nɛ.” Se ni komɛ hu de ke, “Dɛbi, pi lɛ; e je lɛ kɛkɛ.” Enɛ ɔ he ɔ, nyumu ɔ nitsɛ de mɛ ke, “Imi.”​​—Yohane 9:8, 9.

Kɛkɛ nɛ a bi lɛ ke: “Kɛ pee kɛɛ loko jehanɛ lɛɛ o ngɛ nɔ hyɛe ɔ?” E de mɛ ke: “Nyumu ɔ nɛ a tsɛɛ lɛ Yesu ɔ nɛ pɔtɔ zu, nɛ e ngɔ ha ye hɛngmɛ ɔmɛ a nɔ. Lɔ ɔ se ɔ, e de mi ke ma ya fɔ ye he ngɛ Siloam pa a mi.” A bi lɛ ke: “Jije e ngɛ?” E he nɔ ke: “I li.”​​—Yohane 9:10-12.

Ni ɔmɛ ngɔ nyumu ɔ kɛ ya Farisi bi ɔmɛ a ngɔ, nɛ mɛ hu a ngɛ hlae nɛ a maa le bɔ nɛ pee nɛ e hɛngmɛ bli ɔ. E de mɛ ke: “E pɔtɔ zu kɛ ha ye hɛngmɛ ɔmɛ a nɔ, nɛ i ya fɔ ye he, kɛkɛ nɛ i bɔni nɔ́ hyɛmi.” Jinɛ e sa nɛ Farisi bi ɔmɛ a bua ko jɔ kaa Yesu tsa nyumu ɔ. Se a gbe Yesu he guɛ, nɛ a de ke: “Nɔmlɔ nɛ pee nɔ́ nɛ ɔ, pi Mawu ngɔ nɛ e je; ejakaa e bui Hejɔɔmi ligbi ɔ.” A ti ni komɛ hu de ke: “Kɛ nɔmlɔ nɛ peeɔ yayami ma plɛ kɛ to okadihi kaa kikɛ nɛ ɔ kɛɛ?” (Yohane 9:15, 16) Kɛkɛ nɛ ni ɔmɛ a mi gba.

Akɛnɛ a nya pee we kake ngɛ sane nɛ ɔ he he je ɔ, a bi nyumu ɔ nɛ a tsa lɛ ɔ ke: “Tse o de wɔ ke e bli o hɛngmɛ! Saminya, kɛ moo o deɔ ngɛ e he kɛɛ?” Nyumu ɔ juɛmi pee we lɛ enyɔɔnyɔ ngɛ Yesu he. Enɛ ɔ he ɔ, e de mɛ ke: “Gbalɔ ji lɛ.”​​—Yohane 9:17.

Se Yuda bi ɔmɛ lɛɛ a sume nɛ a maa kplɛɛ nɔ kaa Yesu tsa nyumu ɔ niinɛ. Eko ɔ, a susu kaa Yesu kɛ nyumu ɔ ya so kaa e ba de ke e tsa lɛ konɛ e kɛ sisi nihi. Lɔ ɔ he ɔ, a ma a juɛmi nya si kaa a maa bi nyumu ɔ fɔli kaa be ko nɛ be ɔ, a bi ɔ hyɛ we nɔ́ niinɛ lo, konɛ anɔkuale ɔ nɛ je kpo.