A Wo Nyumu ɔ Nɛ A Fɔ Lɛ Hɛ Yuyuilɔ ɔ He Gbeye

Yesu tsa nyumu ɔ nɛ e hɛngmɛ yu kɛ je benɛ a fɔ lɛ ɔ. Akɛnɛ Farisi bi ɔmɛ sume kaa a maa kplɛɛ nɔ kaa Yesu tsa lɛ he je ɔ, a tsɔ kɛ ya tsɛ nyumu ɔ fɔli konɛ a koli a nya mi. Nyumu ɔ fɔli ɔmɛ na kaa ke a hyɛ we nɛ hi ɔ, a maa ‘fie mɛ kɛ je kpe he ɔ.’ (Yohane 9:22) A le hu kaa ke a fie mɛ ɔ, a ní tsumi ma puɛ, nɛ ohia maa ye mɛ, nɛ a weku ɔ maa na nɔ́.

Farisi bi ɔmɛ bi nyumu ɔ fɔli ɔmɛ sane enyɔ. A bi mɛ ke: ‘Nyɛ bi ɔ nɛ nyɛ ke nyɛ fɔ lɛ hɛ yuyuilɔ ɔ ji nɛ ɔ lo? Kɛ peeɔ kɛɛ nɛ amlɔ nɛ ɔ e ngɛ nɔ́ hyɛe ɔ?’ Fɔli ɔmɛ he nɔ ke: ‘Ee, wa le kaa wa bi ji nɛ ɔ nɛ, nɛ wa le hulɔ kaa wa fɔ lɛ hɛ yuyuilɔ. Se bɔ nɛ ba nɛ e ngɛ nɔ́ hyɛe amlɔ nɛ ɔ, lɔ ɔ lɛɛ wa li; nɛ nɔmlɔ nɛ ha nɛ e bɔni nɔ́ hyɛmi ɔ hu wa li lɛ.’ Ke nyumu ɔ fɔli ɔmɛ le nɔ́ nɛ ba loko a bi ɔ bɔni nɔ́ hyɛmi po ɔ, a wo a he ga nɛ a de we nɔ́ ko nɛ ma ha nɛ a ná sane. Lɔ ɔ he ɔ, a de Farisi bi ɔmɛ ke: ‘Nyɛ bi lɛ. E wa nɛ lɛ nitsɛ e ma nyɛ ma je munyu nya.’​​—Yohane 9:19-21.

Lɔ ɔ he ɔ, Farisi bi ɔmɛ kpale tsɛ nyumu ɔ, nɛ a pã a hɛ mi wo lɛ, nɛ a de lɛ kaa a ngɛ odase nɛ tsɔɔ kaa Yesu tɔ̃. A de lɛ ke: “Ka wɔ kita ngɛ Mawu hɛ mi ngɛ hiɛmɛ nɛ ɔ kaa o maa tu wɔ anɔkuale!” A ya nɔ nɛ a de ke: “Wɔɔ lɛɛ wa le kaa nɔmlɔ nɛ tsa mo ɔ, yayami peelɔ ji lɛ.” Nyumu ɔ de mɛ ke: “Yayami peelɔ ji lɛ oo, pi yayami peelɔ ji lɛ oo; imi lɛɛ i li. Nɔ́ kake pɛ i le; be ko nɛ be ɔ, hɛ yuyuilɔ ji mi; se amlɔ nɛ ɔ, i ngɛ nɔ́ hyɛe.”​​—Yohane 9:24, 25.

Farisi bi ɔmɛ ngmɛɛ we munyu ɔ he, mohu ɔ, a bi lɛ ke: “Kɛ e pee mo kɛɛ? Kɛ e pee kɛɛ nɛ e bli o hɛngmɛ ɔmɛ ɔ?” Nyumu ɔ ná kã nɛ e de mɛ ke: “Tse i de nyɛ enɛ ɔ momo nɛ nyɛ bui mi tue. Mɛni nyɛ ngɛ hlae nɛ nyɛɛ nu ekohu. Nyɛ hu nyɛ suɔ kaa nyɛ maa pee e kaseli lo?” Farisi bi ɔmɛ a mi mi fu wawɛɛ, nɛ a de nyumu ɔ ke: “Mo ji jamɛatsɛ ɔ kaselɔ; wɔɔ lɛɛ Mose kaseli ji wɔ. Wa le kaa Mawu kɛ Mose tu munyu, se kikɛmɛ a nɔmlɔ nɛ ɔ lɛɛ, he nɛ e je po wa li.”​​—Yohane 9:26-29.

A he pee ní balɔ ɔ nyakpɛ nitsɛ, nɛ e de mɛ ke: “Mɛni nyakpɛ sane ji nɛ ɔ! Nɔmlɔ nɛ bli ye hɛngmɛ ɔ, nyɛɛ lɛɛ nyɛ ke nyɛ li he nɛ e je!” Nyumu ɔ kɛ mɛ susu sane ɔ he ngɛ blɔ ko nɔ konɛ a na kaa Mawu kplɛɛ Yesu nɔ, nɛ e buɔ lɛ tue. E de mɛ ke: ‘Wa le kaa Mawu bui yayami peeli tue, se nɔ nɛ yeɔ lɛ gbeye, nɛ e peeɔ Mawu suɔmi nya ní ɔ, Mawu buɔ lɛ tue. Kɛ je benɛ a bɔ je ɔ, nɔ ko nɔ ko nui hyɛ kaa a bli nɔ ko nɛ a fɔ lɛ hɛ yuyuilɔ hɛngmɛ.’ Nyumu ɔ mwɔ e munyu ɔ nya ke: “Nɔmlɔ nɛ ɔ, ke pi Mawu ngɔ nɛ e je ɔ, jinɛ e ko nyɛ we nɔ́ ko peemi.”​​—Yohane 9:30-33.

Benɛ Farisi bi ɔmɛ na kaa a be nyɛe maa je nɔ́ nɛ ní balɔ ɔ de ɔ he atsinyɛ ɔ, a tsuaa lɛ ní ke: “Mo nɛ a fɔ mo, nɛ a tsɔse mo ngɛ yayami mi ɔ, o ngɛ hlae nɛ o tsɔɔ wɔ ní?” Kɛkɛ nɛ a fie lɛ kɛ je lejɛ ɔ.​​—Yohane 9:34.

Benɛ Yesu nu sane ɔ, e ya na nyumu ɔ nɛ e bi lɛ ke: “O heɔ Nɔmlɔ Bi ɔ yeɔ lo?” Nyumu ɔ hu bi Yesu ke: “I kpa mo pɛɛ, mɛnɔ ji lɛ, konɛ ma he lɛ ma ye?” Bɔ nɛ pee nɛ nyumu ɔ yi mi ko pee lɛ enyɔɔnyɔ ɔ, Yesu de lɛ ke: “O na lɛ momo. Lɛ ji nɔmlɔ nɛ kɛ mo ngɛ munyu tue ɔ nɛ.”​​—Yohane 9:35-37.

Kɛkɛ nɛ nyumu de ke: “Nyɔmtsɛ, i heɔ yeɔ.” Nyumu ɔ ná hemi kɛ yemi nɛ e kpla si ngɛ Yesu hɛ mi, nɛ Yesu de lɛ ke: “I ba je nɛ ɔ mi nɛ ma ba kojo, konɛ hɛ yuyuili nɛ hyɛ nɔ́; nɛ nihi nɛ susuɔ kaa a ngɛ nɔ́ hyɛe ɔ, a hɛ nɛ yu.”​​—Yohane 9:38, 39.

Farisi bi ɔmɛ nɛ a ngɛ lejɛ ɔ jamɛ a be ɔ mi ɔ le kaa pi hɛ yuyuili ji mɛ. Se ke pi hɛ yuyuili ji mɛ ɔ, anɛ a nyɛ nɛ a ngɛ Mawu we bi blɔ tsɔɔe lo? Akɛnɛ Farisi bi ɔmɛ a yi mi ngɛ mɛ kojoe he je ɔ, a bi Yesu ke: “Anɛ o ngɛ tsɔɔe kaa wɔ hu wa hɛ yu lo?” Yesu de mɛ ke: “Kaa nyɛ hɛ yu mohu ɔ, jinɛ yayami be nyɛ he; se jehanɛ ɔ, nyɛ deɔ ke, ‘Wa ngɛ nɔ́ hyɛe,’ lɔ ɔ he ɔ, nyɛ he yayami ɔ ngɛ nyɛ he kɛ mwɔɔ.” (Yohane 9:40, 41) Ke pi tsɔɔli ji mɛ ngɛ Israel loko a ke a he we Yesu yi kaa lɛ ji Mesia a, jinɛ sisi numi ngɛ he. Se akɛnɛ a le Mawu Mlaa a he je ɔ, e ji yayami agbo kaa a he we Yesu yi.