Moo Ye Bua Hɛ Yuyuili Nɛ A Kase Yehowa He Ní

1. Mɛni blɔ nɔ nɛ Yesu gu kɛ tsɔɔ kaa e mi mi saa lɛ ngɛ hɛ yuyuili a he?

¹ Benɛ e piɛ bɔɔ nɛ Yesu ma gbo ɔ, e ya Yeriko ma a mi. Benɛ Yesu ngɛ ma a mi jee ɔ, hɛ yuyuili enyɔ komɛ nu kaa e bee, nɛ a kɛ ngmlaa de ke: ‘Nyɔmtsɛ, naa wɔ mɔbɔ!’ E ngɛ mi kaa Yesu ngɛ níhi nɛ e maa gblee mi loko e ma gbo ɔ he susue mohu lɛɛ, se e da si, nɛ e tsɛ nyumu ɔmɛ, nɛ e tsa mɛ. (Mat. 20:29-34) Mɛni blɔ nɔ wa maa gu kɛ kase bɔ nɛ Yesu mi mi sa lɛ ha ngɛ hɛ yuyuili a he ɔ?

2. Mɛni blɔ nɔ wa ma nyɛ maa gu kɛ ye hɛ yuyuili odase ngɛ ma nɔ?

² Moo Ye Bua Mɛ: Ke o na hɛ yuyuilɔ ko ngɛ ma mi ɔ, mo nga lɛ nɛ o de lɛ kaa o suɔ nɛ o maa ye bua lɛ. Akɛnɛ nihi pɔɔ mɛ sisimi he je ɔ, eko ɔ, e yi mi maa pee lɛ enyɔɔnyɔ ngɛ o he. Se ke o je huɛ bɔmi su kpo nɛ o ha nɛ e na kaa o hɛɛ we juɛmi yaya a, e tsui maa nɔ e mi nɛ e yi mi be lɛ enyɔɔnyɔ pee hu. Ha nɛ e hi o juɛmi mi kaa hɛ yumi mi ngɛ slɔɔtoslɔɔto, enɛ ɔ he ɔ, e slo yemi kɛ buami nɛ a ti nɔ tsuaa nɔ hia. Ke o ye bua a ti nɔ ko ta a, o ma nyɛ ma de lɛ kaa o yeɔ bua nihi nɛ a kaseɔ Baiblo ɔ. O ma nyɛ maa kane ngmami komɛ kaa La 146:8 loo Yesaya 35:5, 6 kɛ tsɔɔ lɛ. Ke e ji nɔ ko nɛ e nyɛɔ nɛ e kɛ e nine kaneɔ ní ɔ, mo bi lɛ ke ji e bua maa jɔ he kaa o ma ba ha lɛ wa Baiblo kasemi womihi nɛ a pee kɛ ha hɛ yuyuili ɔ eko nɛ e kase. O ma nyɛ maa gbla munyuhi nɛ a fiaa nɛ a buɔ tue ngɛ jw.org nɔ kɛ ha lɛ. Ke e ngɛ kɔmpiuta blɔ nɔ tomi nɛ kaneɔ ní kɛ haa hɛ yuyuili ɔ, e bua ma nyɛ maa jɔ munyuhi nɛ ngɛ jw.org nɔ ɔ he. O ma nyɛ maa gbla RTF (Rich Text Format) nɔ́ ɔ kɛ ha lɛ.​—Hyɛ daka nɛ ji “Ke O Suɔ Nɛ O Ye Bua Hɛ Yuyuilɔ Ko ɔ, . . .”

3. Mɛni blɔ nɔ wa maa gu kɛ hla hɛ yuyuili ngɛ wa zugba kpɔ ɔ mi?

³ Mo Hla Nihi Nɛ A Hɛngmɛ Yu: Ke wa ya wehi a mi fiɛɛmi ɔ, wa pɔɛ hɛ yuyuili nami ngɛ we mi ejakaa a gboɔ zo kaa a kɛ nibwɔhi maa sɛɛ ní. Enɛ ɔ he ɔ, ja wa ‘bi a si’ loko wa ma nyɛ maa na mɛ nɛ waa ye mɛ odase. (Mat. 10:11) Anɛ o kɛ nɔ ko tsuɔ ní, loo o kɛ nɔ ko yaa sukuu nɛ e hɛngmɛ yu lo? Bɔɔ mɔde nɛ o kɛ lɛ nɛ sɛɛ ní. Ke hɛ yuyuili a sukuu ngɛ nyɛ zugba kpɔ ɔ mi ɔ, o ma nyɛ maa ngɔ Baiblo kasemi womihi nɛ a pee kɛ ha hɛ yuyuili ɔ eko kɛ ya ha mɛ konɛ a kɛ fɔ a womi tomi he ɔ. Anɛ o le nɔ ko nɛ e weku no ko hɛngmɛ yu lo? Anɛ kuu ko loo ní tsumi he ko ngɛ nyɛ zugba kpɔ ɔ mi nɛ a yeɔ bua nihi nɛ a hɛngmɛ yu lo? Mo de a weku li, aloo nɔkɔtɔma nɛ hyɛɛ kuu nɛ yeɔ bua hɛ yuyuili a nɔ ɔ kaa Yehowa Odasefohi suɔ kaa a maa ye bua nihi nɛ a hɛngmɛ yu. O ma nyɛ ma de mɛ kaa o ma ba ha mɛ wa Baiblo kasemi womihi nɛ a pee kɛ ha hɛ yuyuili, aloo nɔ́ nɛ a ma nyɛ maa fia nɛ a bu tue. Moo tsɔɔ lɛ si nɛ Mawu wo ngɛ Baiblo ɔ mi kaa e be kɛe nɛ e ma ha nihi tsuo nɛ a hyɛ we nɔ́ maa hyɛ nɔ́ ɔ. O ma nyɛ ma je video nɛ ji “Without It, I Would Feel Lost” nɛ ngɛ jw.org nɔ ɔ kɛ tsɔɔ lɛ. Video nɛ ɔ kɔɔ hɛ yuyuilɔ ko nɛ e ná Baiblo nɛ a pee kɛ ha hɛ yuyuili he se ɔ he. Ke o tsɔɔ a weku li ɔmɛ aloo nɔkɔtɔma nɛ hyɛɛ a nɔ ɔ yi mi tomi he je nɛ o ba slaa mɛ ɔ, a ma nyɛ maa ngmɛ mo blɔ konɛ o kɛ hɛ yuyuili ɔmɛ nɛ sɛɛ ní.

4. Mɛni wa ma nyɛ maa kase ngɛ Janet níhi a si kpami ɔ mi?

⁴ Nyɛmiyo ko nɛ e hɛngmɛ yu nɛ a tsɛɛ lɛ ke Janet ya he ko nɛ hɛ yuyuili ngɛ. E kɛ yiheyo ko nɛ hɛ yuyuilɔ ji lɛ ya sɛɛ ní ngɛ lejɛ ɔ. Janet de lɛ ke, “Yesu tsa hɛ yuyuili kɛ tsɔɔ nɔ́ nɛ e maa pee kɛ ha hɛ yuyuili hwɔɔ se.” Janet kɛ yo ɔ susu Kpojemi 21:3, 4 he, nɛ e tsɔɔ lɛ blɔ nɔ nɛ Mawu Matsɛ Yemi ɔ maa gu kɛ ha nɛ si womi nɛ ɔ maa ba mi. Yo ɔ da si dii nɛ e de ke: “I nui munyu kaa kikɛ hyɛ ngɛ hɛ yuyuilɔ nya mi. Nihi nɛ a hyɛɛ nɔ́ ɔ a kpɛti nihi fuu susuɔ kaa yayami ko nɛ nihi nɛ a hɛngmɛ yu ɔ pee, aloo yayami nɛ a nɛmɛ pee lɛ ha nɛ a hɛngmɛ yu ɔ nɛ.” Janet ngɔ Baiblo Tsɔɔmi womi ɔ he intanɛti adrɛs kɛ mane yo ɔ, nɛ e kɛ lɛ kaseɔ ní si enyɔ daa otsi.

5. E ngɛ mi kaa wa be nyɛe ma tsa hɛ yuyuili kaa bɔ nɛ Yesu pee ɔ mohu lɛɛ, se ke wa je suɔmi kpo kɛ tsɔɔ mɛ ɔ, mɛni maa je mi kɛ ba?

⁵ E ngɛ mi kaa wa be nyɛe ma tsa hɛ yuyuili kaa bɔ nɛ Yesu pee ɔ mohu lɛɛ, se wa ma nyɛ maa ye bua nihi tsuo nɛ je yaya nɛ ɔ mawu ɔ yu a hɛngmɛ ngɛ mumi mi ɔ, kɛ hɛ yuyuili hulɔ konɛ a nu anɔkuale nɛ ngɛ Mawu Munyu ɔ mi ɔ sisi. (2 Kor. 4:4) Yesu tsa hɛ yuyuili enyɔ ɔmɛ ngɛ Yeriko ejakaa e “mi mi sã lɛ ngɛ a he.” (Mat. 20:34) Ke wa je su nɛ ɔ kpo ngɛ fiɛɛmi mi ɔ, wa ma nyɛ maa ye bua hɛ yuyuili konɛ mɛ hu a le Yehowa, nɔ nɛ maa ye bua mɛ konɛ a hyɛ nɔ́ kɛ ya neneene ɔ.