O Kɛ Nihi Nɛ Sɛɛ Níhi Nɛ A Bua Jɔ He

Nɔ́ Nɛ Yesu Pee

VIDEO: Yesu Kɛ Samaria Yo ɔ Ngɛ Vu ɔ He

1. Moo hyɛ VIDEO ɔ, aloo moo kane Yohane 4:​6-9. Lɔ ɔ se ɔ, mo susu sane bimihi nɛ nyɛɛ se ɔmɛ a he:

1. Mɛni Yesu yɔse ngɛ yo ɔ he loko e kɛ lɛ je ní sɛɛmi ɔ sisi?

2. Yesu de ke: “Ha mi nyu ɔ eko nɛ ma nu.” Mɛni he je nɛ enɛ ɔ ji blɔ nɛ nuɔ tso nɛ e gu nɔ kɛ je ní sɛɛmi sisi ɔ?

Mɛni Wa Kaseɔ Ngɛ Yesu Nɔ Hyɛmi Nɔ́ Nɛ ɔ Mi?

2. Ke waa kɛ munyu nɛ nɔ ko bua jɔ he je ní sɛɛmi sisi ɔ, lɔ ɔ ma ha nɛ ní sɛɛmi ɔ maa ya nɔ saminya.

Moo Kase Yesu

3. Koo pee kpɛii. Ko de ke doo ja o kɛ nɔ ɔ susu munyu nɛ o kɛ dla o he momo ɔ he. Moo ngɔ nɔ́ ko nɛ nihi a bua jɔ he mwɔnɛ ɔ kɛ je ní sɛɛmi ɔ sisi. Mo bi o he ke:

1. ‘Mɛni ji amaniɛ bɔmi nɛ ngɛ nɔ yae?’

2. ‘Mɛni he munyu nɛ nihi nɛ a ngɛ ye kpɔ ɔ mi, nihi nɛ i kɛ mɛ tsuɔ ní, aloo nihi nɛ i kɛ mɛ yaa sukuu ɔ ngɛ tue?’

4. Moo to níhi a he hɛ. Mo bi o he ke:

1. ‘Mɛni nɛ nɔ ɔ ngɛ pee amlɔ nɛ ɔ? Mɛni nɛ eko ɔ, e maa hi he susue?’

2. ‘Mɛni nɛ tade nɛ nɔ ɔ wo, e he dlami, kɛ bɔ nɛ e we ɔ mi ngɛ ha a deɔ mi ngɛ nɔ́ nɛ e heɔ yeɔ loo e kusumi he?’

3. ‘Anɛ be nɛ ɔ ji be nɛ sa kaa i kɛ lɛ nɛ je ní sɛɛmi sisi lo?’

5. Moo bu lɛ tue.

1. Koo tu munyu fuu.

2. Moo wo lɛ he wami nɛ e je e juɛmi kpo. Nɛ ke e maa hi ɔ, mo bi lɛ sanehi.